2 MGA HARI 20
20
Ang Pagmasakit ni Ezequias
(2 Cron. 32:24-26; Isa. 38:1-8)
1Sa sadtong mga adlaw si Ezequias nagmasakit nga sa ikamatay. Kag si Isaias nga manalagna nga anak ni Amoz nag-abut sa iya, kag nagsiling sa iya, “Amo ini ang ginasiling sang Ginoo, ‘Ipahamtang sing nagakaigo ang imo panimalay; kay mapatay ka, indi ka magkabuhi.’” 2Niyan ginliso niya ang iya nawung sa dingding, kag nagpangamuyo sa Ginoo, nga nagasiling, 3“Ginapakilooy ko sa imo, dumduma karon, O Ginoo, kon paano nga naglakat ako sa atubangan nimo sa kamatooran kag sa himpit nga tagiposoon, kag naghimo sang maayo sa imo itololok.” Kag si Ezequias naghibi sing tama. 4Kag sa wala pa si Isaias makagowa sa natunga nga bahin sang banwa, nag-abut sa iya ang polong sang Ginoo: 5“Balik ka, kag isiling kay Ezequias nga pangolo sang akon katawohan, Amo ini ang ginasiling sang Ginoo, ang Dios ni David nga imo amay: Ginpamatian ko ang imo pangamuyo, nakita ko ang imo mga luha; yari karon, ayohon ko ikaw; sa ikatlo nga adlaw magataklad ka sa balay sang Ginoo. 6Kag dugangan ko ang imo mga adlaw sing napulo kag lima ka tuig. Luwason ko ikaw kag ini nga banwa gikan sa kamut sang hari sang Asiria, kag apinan ko ini nga banwa sa akon kaugalingon kag tungud kay David nga akon alagad.” 7Kag si Isaias nagsiling, “Kuha kamo sing pighol nga mga higos. Kag magkuha sila, kag maghampol sini sa hubag, agud nga mag-ayo sia.”
8Kag si Ezequias nagsiling kay Isaias, “Ano bala ang tanda nga ayohon ako sang Ginoo, kag nga magataklad ako sa balay sang Ginoo sa ikatlo nga adlaw?” 9Kag si Isaias nagsiling, “Ini mangintanda sa imo gikan sa Ginoo, nga himoon sang Ginoo ang butang nga iya napamolong: magapadayon bala ang landong sing napulo ka alintaga, ukon magaisol sing napulo ka alintaga?” 10Kag si Ezequias nagsabat, “Mahapus nga butang nga ang landong mag-isol sing napulo ka alintaga; indi, apang paisola ang landong sing napulo ka alintaga.” 11Kag si Isaias nga manalagna nagtuaw sa Ginoo; kag ginpaisol niya ang landong sing napulo ka alintaga, nga sa sini nagpaubus ini sa taknaan ni Acaz.
Si Ezequias Nagabaton sang mga Manugbalita gikan sa Babilonia
(2 Cron. 32:27-31; Isa. 39:1-8)
12Sa sadto nga tion si Berodac-baladan nga anak ni Baladan, hari sang Babilonia, nagpadala sing mga sulat kag dolot kay Ezequias; kay nabatian niya nga si Ezequias nagmasakit. 13Kag ginpamatian sila ni Ezequias, kag ginpakita sa ila ang bug-os nga balay sang iya bilidhon nga mga butang, ang pilak, ang bulawan, ang mga pahumut, ang mga lana nga bilidhon, ang bug-os nga balay sang iya hinganiban, ang tanan nga yara sa iya mga bahandi; wala gid sing bisan ano sa iya balay ukon sa bug-os niya nga ginharian nga wala mapakita sa ila ni Ezequias. 14Niyan ang manalagna nga si Isaias nag-abut kay Hari Ezequias, kag nagsiling sa iya, “Ano bala ang ginasiling sini nga mga lalaki? Kag sa diin sila naggikan pakari sa imo?” Kag si Ezequias nagsiling, “Naghalin sila gikan sa malayo nga duta, bisan sa Babilonia.” 15Nagsiling sia, “Ano bala ang nakita nila sa imo balay?” Kag si Ezequias nagsabat, “Nakita nila ang tanan nga yara sa akon balay; wala gid sing bisan ano sa akon mga bahandi nga wala ko mapakita sa ila.”
16Niyan si Isaias nagsiling kay Ezequias, “Pamatii ang polong sang Ginoo: 17Yari karon, magaabut ang mga adlaw, nga ang tanan nga yara sa imo balay, kag ang ginsuput sang imo mga ginikanan tubtub sini nga adlaw, dalhon sa Babilonia; wala gid sing mabilin, nagasiling ang Ginoo.#2 Hari 24:13; 2 Cron. 36:10. 18Kag nahanungud sang imo mga anak nga magagikan sa imo, nga ianak mo, kuhaon nila; kag mangin-eunuco sila sa palacio sang hari sang Babilonia.#2 Hari 24:14-15; Dan. 1:1-7.” 19Niyan si Ezequias nagsiling kay Isaias, “Maayo ang polong sang Ginoo nga napamolong mo.” Labut pa nagsiling sia, “Indi bala ini mahanabu, kon ang paghidait kag kamatuuran manginsa akon mga adlaw?”
Ang Pagkapatay ni Ezequias
(2 Cron. 32:32-33)
20Ang nabilin sang mga binuhatan ni Ezequias, kag ang bug-os niya nga gahum, kag kon paano ang paghimo niya sang ponong kag sang kalog kag pagpadayon sing tubig sa banwa, wala bala masulat sa Tolon-an sang mga Maragtas sang mga Hari sang Juda? 21Kag si Ezequias nagtolog upud sa iya mga ginikanan; kag naghari nga tal-us niya si Manases nga iya anak.
Currently Selected:
2 MGA HARI 20: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
