2 MGA HARI 19
19
Ang Juda Ginluwas gikan kay Senaquerib
(2 Cron. 32:20-23; Isa. 37:1-38)
1Sang pagkabati ni Hari Ezequias sini, iya ginkusnit ang iya mga panapton, kag nagpanabon sia sing panapton nga sako, kag nagsulud sa balay sang Ginoo. 2Kag ginpadala niya si Eliaquim, nga tulugyanan sang panimalay, kag si Sebna nga escriba, kag ang mga tigulang sang mga sacerdote, nga nagpanabon sing panapton nga sako, kay Isaias nga manalagna nga anak ni Amoz. 3Nagsiling sila sa iya, “Amo ini ang ginsiling ni Ezequias, Ining adlaw amo ang adlaw sang kalisang, sang pagsabdong, kag sang pagpakahuya; ang mga anak inug-anak na, kag walay kusug sa pagbun-ag. 4Ayhan nakabati ang Ginoo nga imo Dios sang tanan nga polong ni Rabsaces, nga ginpadala sang hari sang Asiria nga iya agalon sa pagpasipala sa Dios nga buhi, kag magasabdong sang mga polong nga nabatian sang Ginoo nga imo Dios; gani bayawa ang imo pangamuyo tungud sa nabilin nga yara pa.” 5Sang nag-abut ang mga alagad ni Hari Ezequias kay Isaias, 6si Isaias nagsiling sa ila, “Amo ini ang isiling ninyo sa inyo agalon, ‘Amo ini ang ginasiling sang Ginoo: Dili ka mahadluk sa mga polong nga nabatian mo, nga sa ila ginpasipalahan ako sang nga alagad sang hari sang Asiria. 7Yari karon, magabutang ako sa iya sing isa ka espiritu, agud nga magapamati sia sing mga balita kag magabalik sia sa iya kaugalingon nga duta; kag ipapukan ko sia sa espada sa iya kaugalingon nga duta.’”
8Si Rabsaces nagbalik, kag nakakita sang hari sang Asiria nga nagapakig-away sa Libna; kay nabatian niya nga sia nagtaliwan gikan sa Laquis. 9Kag sang nabatian niya ang ginasiling nahanungud kay Tirhaca nga hari sang Etiopia, “Yari karon, naggowa sia sa pagpakig-away sa imo,” nagpadala sia liwat sing mga manugbalita kay Ezequias, nga nagasiling, 10“Amo ini ang isiling ninyo kay Ezequias nga hari sang Juda: ‘Dili ka magpalimbong sa imo Dios nga ginasaligan mo nga nagasiling nga ang Jerusalem indi pag-itugyan sa kamut sang hari sang Asiria. 11Yari karon, ikaw nakabati sang ginhimo sang mga hari sang Asiria sa tanan nga duta, sa paglaglag sa ila sing bug-os. Kag maluwas ka bala? 12Naluwas bala sila sang mga dios sang mga pungsud, nga ginlaglag sang akon mga ginikanan, nga amo ang Gozan, Haran, Rezef, kag ang katawohan sang Eden nga yadto sa Telassar? 13Diin bala ang hari sang Hamat, ang hari sang Arpad, ang hari sang banwa sang Sefarvaim, ang hari sang Hena, ukon ang hari sang Iva?’”
14Ginbaton ni Ezequias ang sulat sa kamut sang mga manugbalita, kag ginbasa ini; kag si Ezequias nagsaka sa balay sang Ginoo, kag ginhumlad ini sa atubangan sang Ginoo. 15Kag nagpangamuyo si Ezequias sa atubangan sang Ginoo, kag nagsiling: “O Ginoong Dios sang Israel, nga nagalingkod sa trono sa ibabaw sang mga querubin,#Ex. 25:22. ikaw ang Dios, ikaw lamang, sang tanan nga ginharian sang duta; ginhimo mo ang langit kag ang duta. 16Ilingig ang imo idulungug, O Ginoo, kag magpamati; muklata ang imo mga mata, O Ginoo, kag magtan-aw; kag magpamati sang mga polong si Senaquerib, nga ginpadala niya sa pagpasipala sa Dios nga buhi. 17Sa pagkamatuud, O Ginoo, ang mga hari sang Asiria naghapay sang mga pungsud kag sang ila mga duta, 18kag nagpilak sa kalayo sang ila mga dios; kay indi sila mga dios, kondi binuhatan sang mga kamut sang mga tawo, kahoy kag bato; busa ginlaglag nila sila. 19Gani karon, O Ginoo nga amon Dios, luwasa kami, ginapakilooy ko sa imo, gikan sa iya kamut, agud nga magkilala ang tanan nga ginharian sang duta nga ikaw, ang Ginoo, amo ang Dios lamang.” 20Niyan si Isaias nga anak ni Amoz nagpadala kay Ezequias, nga nagasiling, “Amo ini ang ginasiling sang Ginoo, ang Dios sang Israel: Sanglit nagpangamuyo ka sa akon batok kay Senaquerib nga hari sang Asiria ginpamatian ko ikaw. 21Ini amo ang polong nga ginpamolong sang Ginoo nahanungud sa iya:
“Ang ulay nga babayi nga anak sang Sion nagtamay sa imo, kag nagkadlaw sa pagyaguta sa imo;
ang babayi nga anak sang Jerusalem naglungolungo sang iya olo sa imo.
22“Sin-o bala ang ginbatoan kag ginpasipalahan mo?
Batok kay sin-o bala nagbaskug ka sang imo tingug
kag nagbayaw sa mataas sang imo mga mata?
Batok sa Balaan sang Israel!
23Paagi sa imo mga manugbalita ginbatoan mo ang Ginoo,
kag ikaw nagsiling, ‘Upud sa kadam-an sang akon mga kangga
nagtaklad ako sa putokputokan sang mga bukid,
sa nasulud gid nga mga bahin sang Libano;
pudlon ko ang mataas nga mga cedro sini,
ang pinili nga abeto nga mga kahoy sini;
sudlon ko ang labi kalayo gid nga puluy-an niya,
ang kagulangan sang iya mabungahon nga katamnan.
24Ako nakakutkut sang mga bubon kag nakainum sang mga tubig nga dumuloong,
kag sa mga dapadapa sang akon mga tiil pamalahon ko
ang tanan nga suba sang Egipto.’
25“Wala ka bala makabati
kon paano ang paghimo ko sini sing madugay na?
Ginhuman ko ini sa dumaan nga mga tion
nga karon ginpahanabu ko,
agud nga malaglag mo ang kabanwaanan nga napamakuran sa mga tinumpok nga kahapayan,
26samtang ang ila mga pumuluyo, diotay sing gahum,
napunaw sila kag nagasalimuang,
kag subong sang hilamon sa latagon sila,
kag subong sang gamhon nga hilaw,
subong sang hilamon sa mga atop;
subong sang uyas nga nakigas sa wala pa maggulang?
27“Apang nahibaloan ko ang imo paglingkod
kag ang imo paggowa kag ang imo pagsulud,
kag ang imo pagsingkal batok sa akon.
28Bangud sang imo pagsingkal batok sa akon
kag bangud nga ang imo pagkabugalon naglambut sa akon mga idulungug,
takdan ko sang akon tohog ang imo ilong
kag sang akon busal ang imo mga bibig,
kag pabalikon ko ikaw sa dalanon nga imo ginhalinan.
29“Kag amo ini ang tanda sa imo: sining tuig magakaon ka sang nagatubo sa iya kaugalingon, kag sa ikaduhang tuig sang nagatubo sa amo; niyan sa ikatlo nga tuig magsab-ug kamo, kag mag-ani, kag magtanum sing mga ulubasan, kag magkaon sang bunga nila.
30Kag ang nabilin nga nakapalagyo sang panimalay ni Juda magapanggamut liwat paidalum, kag magapamunga paibabaw; 31kay magagowa sa Jerusalem ang nabilin, kag gikan sa Bukid sang Sion sila nga magapalagyo. Ang kakugi sang Ginoo magahimo sini.
32“Busa amo ini ang ginasiling sang Ginoo nahanungud sang hari sang Asiria, Indi sia makalambut sini nga banwa ukon makapana sing baslay didto, ukon makalambut sa atubangan niya nga may taming ukon makatampok sing bungsud batok sa iya. 33Sa dalan nga iya gin-agihan, sa amo man magabalik sia, kag indi sia makalambut sini nga banwa, nagasiling ang Ginoo. 34Kay apinan ko ini nga banwa sa pagluwas sa iya, tungud sa akon kaugalingon kag tungud kay David nga akon alagad.”
35Kag sa sinang gab-i naggowa ang manugtunda sang Ginoo, kag naghalit sang dologan sang mga Asiriahanon sing isa ka gatus kag kawaloan kag lima ka libo; kag sang pagbangon sang mga tawo sing aga pa, yari karon, sila tanan mga bangkay na. 36Gani si Senaquerib nga hari sang Asiria nagtaliwan, kag naglakat kag nagbalik, kag nagpuyo sa Ninive. 37Kag sang nagasimba sia sa balay ni Nisroc nga iya dios, si Adramelec kag si Sarezer nagpatay sa iya sa espada, kag nalagyo sila pakadto sa duta sang Ararat. Kag naghari nga tal-us niya si Esarhadon nga iya anak.
Currently Selected:
2 MGA HARI 19: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
