2 MGA HARI 21
21
Ang Paghari ni Manases
(2 Cron. 33:1-20)
1Nagsugud sa paghari si Manases sang napulo kag duha ka tuig sia, kag naghari sia sing kalim-an kag lima ka tuig sa Jerusalem. Ang ngalan sang iya iloy si Hefzi-ba. 2Kag ginhimo niya ang malaut sa itololok sang Ginoo,#Jer. 15:4. sono sa mga kalangil-aran sang mga pungsud nga ginsobol sang Ginoo gikan sa atubangan sang katawohan sang Israel. 3Kay ginpatindug niya liwat ang mataas nga mga duug nga ginlaglag ni Ezequias nga iya amay; kag nagpatindug sia sing mga halaran kay Baal, kag naghimo sing Ashera, subong sang ginhimo ni Acab nga hari sang Israel, kag nagsimba sang bug-os nga kadam-an sang langit, kag nag-alagad sa ila. 4Kag nagpatindug sia sing mga halaran sa balay sang Ginoo, nga nahanungud sa iya nagsiling ang Ginoo, “Sa Jerusalem ibutang ko ang akon ngalan.”#2 Sam. 7:13. 5Kag nagpatindug sia sing mga halaran nga sa bug-os nga kasoldadosan sang langit sa duha ka luwang sang balay sang Ginoo. 6Kag ginpaagi niya sa kalayo ang iya anak nga lalaki, kag nagmanuglagpat kag naggamit sing mga pagbabaylan, kag naghisayo sa mga manugpagowa sang mga espiritu kag sa mga salamangkero. Naghimo sia sing madamu gid nga malaut sa itololok sang Ginoo, sa pagpaakig sa iya. 7Kag ginpahamtang niya ang larawan nga tinigban sang Ashera nga nahimo niya sa balay nga nahanungud sini nagsiling ang Ginoo kay David kag kay Salomon nga iya anak, “Sa sining balay, kag sa Jerusalem, nga ginpili ko gikan sa tanan nga kabikahan sang Israel ibutang ko ang akon ngalan sa gihapon; 8kag indi ko na pagpalagawon ang mga tiil sang Israel sa gowa sang duta nga ginhatag ko sa ila mga ginikanan, kon lamang magbantay sila sa paghimo sono sa tanan nga ginsogo ko sa ila, kag sono sa bug-os nga kasogoan nga ginsogo sa ila sang akon alagad nga si Moises.”#1 Hari 9:3-5; 2 Cron. 7:12-18. 9Apang wala sila magpamati, kag ginpahaylo sila ni Manases sa paghimo sang malaut labi pa sa ginhimo sang mga pungsud nga ginlaglag sang Ginoo sa atubangan sang katawohan sang Israel.
10Kag ang Ginoo nagpamolong sa iya mga alagad nga mga manalagna, 11“Bangud nga si Manases nga hari sang Juda naghimo sini tanan nga kangil-aran, kag naghimo sing malaut labaw sa tanan nga ginhimo sang mga Amornon, nga una sa iya, kag ginpapakasala niya ang Juda man tungud sa iya mga diosdios; 12busa amo ini ang ginasiling sang Ginoo, ang Dios sang Israel, Yari karon, nagadala ako sing subong nga kalaut sa Jerusalem kag sa Juda nga ang bisan sin-o nga makabati sini tinglan ang duha niya ka idulungug. 13Kag untayon ko sa ibabaw sang Jerusalem ang latid sang Samaria, kag ang tonton sang balay ni Acab; kag pahiran ko ang Jerusalem subong sang tawo nga nagapahid sang pinggan, nga nagapahid sini kag nagapakolob sini. 14Kag isikway ko ang nabilin sang akon panublion, kag itugyan sila sa kamut sang ila mga kaaway, kag sila mangintulukbon kag mangin-alagawon sa tanan nila nga kaaway, 15bangud nga ginhimo nila ang malaut sa akon itololok kag ginpaakig ako, kutub sa adlaw nga ang ila mga ginikanan naggowa gikan sa Egipto, tubtub sini nga adlaw.”
16Labut pa si Manases nagpaagay sing madamu gid nga dugo nga wala sing sala, tubtub nga natugub niya ang Jerusalem kutub sa isa ka ukbung tubtub sa isa, luwas sa iya sala nga tungud sini ginpapakasala niya ang Juda sa paghimo sang malaut sa itololok sang Ginoo.
17Karon ang nabilin sang mga binuhatan ni Manases, kag ang tanan nga ginhimo niya, kag ang iya sala nga ginpakasala niya, wala bala sila masulat sa Tolon-an sang mga Maragtas sang mga Hari sang Juda? 18Kag si Manases nagtolog upud sa iya mga ginikanan, kag ginlubung sa katamnan sang iya kaugalingon nga balay, sa katamnan ni Uza; kag naghari nga tal-us niya si Amon nga iya anak nga lalaki.
Ang Paghari ni Amon
(2 Cron. 33:21-25)
19Si Amon duha ka pulo kag duha ka tuig sang nagsugud sia sa paghari, kag naghari sia sa Jerusalem sing duha ka tuig. Ang ngalan sang iya iloy si Mesulemet nga anak ni Haruz sang Jotba. 20Kag ginhimo niya ang malaut sa itololok sang Ginoo, subong sang ginhimo ni Manases nga iya amay. 21Naglakat sia sa bug-os nga dalanon nga ginlaktan sang iya amay, kag nag-alagad sa mga diosdios nga gin-alagad sang iya amay, kag ginsimba sila; 22ginbayaan niya ang Ginoo, ang Dios sang iya mga ginikanan, kag wala maglakat sa dalanon sang Ginoo. 23Kag ang mga alagad ni Amon nagpuhon batok sa iya, kag ginpatay ang hari sa iya kaugalingon nga balay. 24Apang ang katawohan sang duta nagpatay sang tanan nga nagpuhon batok kay Hari Amon, kag ang katawohan sang duta naghimo nga hari kay Josias nga iya anak sa tal-us niya. 25Karon ang nabilin sang mga binuhatan ni Amon nga ginhimo niya, wala bala sila masulat sa Tolon-an sang mga Maragtas sang mga Hari sang Juda? 26Kag ginlubung sia sa iya lulubngan sa katamnan ni Uza; kag naghari nga tal-us niya si Josias nga iya anak.
Currently Selected:
2 MGA HARI 21: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
