Isaias 26

Ang Dios Magapadaog sang Iya mga Tawo

1Ang adlaw magaabot nga ang mga tawo magakanta sini nga ambahanon sa duta sang Juda:

Ang amon siudad mabakod!

Ang Dios gid amo ang magabantay sang mga pader sini!

2Abrihi ang mga pwerta sang siudad

kag pasudla ang matutom nga pungsod,

ang pungsod nga ang iya mga tawo nagahimo sing matarong.

3Ikaw, O Ginoo, ang magahatag sang paghidait

sa mga nagapadayon sing malig-on sang ila mga tinutuyo

kag nagasalig sa imo.

4Magsalig sa Ginoo sa walay katapusan,

sia magaapin sa aton sa gihapon.

5Ginpaubos niya ang mga bugalon,

ginguba niya ang malig-on nga siudad nga ila ginaestaran,

ginrumpag niya sa duta ang ila mga pader.

6Ginaagyan na ini karon sang mga ginpigos sang una,

kag ila na ini ginatapakan.

7O Ginoo, ginapahapos mo ang dalan sang maayo nga mga tawo,

ang dalan nga ila ginaagyan matapan.

8Ginatuman namon ang imo kabubot-on kag nagasalig kami sa imo,

ikaw lamang ang amon ginahandom.

9Sa kagab-ihon ginahandom ko ikaw sa bug-os ko nga tagipusoon,

kon maghukom ka sa kalibutan kag sa iya mga pumoluyo,

sila tanan magakilala sang pagkamatarong.

10Bisan ikaw maayo sa malaut nga mga tawo,

wala gid sila nagahimo sang matarong.

Bisan diri sa duta sang matarong nga mga tawo

nagahimo sila gihapon sing malaut,

indi sila magkilala sang imo pagkagamhanan.

11Ang#Heb. 10:27. imo mga kaaway wala makahibalo nga ikaw magasilot sa ila.

O Ginoo, pakahuy-i kag paantusa sila,

sa silot nga imo gin-aman.

Ipakita sa ila kon daw ano ang imo paghigugma sa imo mga tawo.

12O Ginoo, imo kami pauswagon,

kay ang tanan namon nga mga binuhatan

nahimo namon tungod sang imo bulig.#26:12 kay ang tanan…imo bulig: ukonginatratar mo kami suno sa amon ginahimo.

13O Ginoo nga amon Dios, gingamhan kami sang iban,

pero ikaw lamang ang amon Ginoo.

14Karon patay na sila kag indi na sila mabuhi liwat,

ang ila mga kalag indi na magbangon,

kay imo sila ginsilutan kag ginlaglag.

Wala na sing may nagadumdom sa ila.

15O Ginoo, ginpadaku mo ang amon pungsod,

ginpasangkad mo ang iya mga sakop sa bug-os nga palibot,

kag ini naghatag sa imo sing kadungganan.

16O Ginoo, ginsilutan mo ang imo mga tawo,

kag sa daku nga kalisod nagpangamuyo sila sa imo.

17O Ginoo, ikaw ang nagpahibi sa amon,

subong sang isa ka babayi nga manugbata nga ginasakitan.

18Kami ginasakitan kag nagaugayong,

pero wala man kami sing may ginbata.

Wala kami sing gindaog para sa amon duta,

wala kami sing nahimo.

19Yadtong amon mga tawo nga nagkalamatay mabuhi liwat!

Ang ila mga bangkay mabanhaw.

Yadtong mga nagakatulog sa ila mga lulobngan

magabangon kag magakanta sa kalipay.

Kaangay sang nagaigpat nga tun-og nga nagapabugnaw sang duta,

amo man ang Ginoo magabuhi sadtong dugay na nga nagkalamatay.

Ang Paghukom kag ang Pagbalik

20Akon mga katawhan, sulod kamo sa inyo mga balay kag sirahi ang pwertahan. Panago anay kamo tubtob mag-ugdaw ang kaakig sang Dios. 21Ang Ginoo magaabot gikan sa iya langitnon nga puloy-an agod sa pagsilot sang mga tawo sa duta tungod sang ila mga sala. Ang pagpamatay nga ginhimo sa kalibutan sa tago pagaipahayag, kag ang duta indi na magtago sadtong mga ginpamatay.

Currently Selected:

Isaias 26: MBBHIL12

Highlight

Copy

Compare