Isaias 25
25
Isa ka Ambahanon sa Pagdayaw
1O Ginoo, ikaw ang akon Dios,
pasidunggan ko ikaw kag dayawon ko ang imo ngalan.
Makatilingala nga mga butang ang imo ginhimo.
Imo gid gintuman
ang imo mga plano halin pa sang una nga panahon.
2Ginlaglag mo ang mga siudad,
ginguba mo ang ila mga pamakod.
Ang mga palasyo nga ginpatindog sang amon mga kaaway
indi na pagpatindugon liwat.
3Ang mga tawo sang gamhanan nga mga pungsod magadayaw sa imo,
kag pagakahadlukan ka sa mga siudad sang mapintas nga mga pungsod.
4Ang mga imol kag ang mga maluya nagadangop sa imo
kag wala sila maano sa panahon sang kinagamo.
Ginaapinan mo sila sa mga bagyo
kag ginpasilungan mo sila sa nagatagiti nga init.
Ang mapintas nga mga kaaway nagsalakay kaangay sang bagyo sa tion sang tigtulognaw,#25:4 sa tion sang tigtulognaw: Sa Hebreonga nagabunal sa pader.
5kaangay sang tingadlaw, sa mamala nga duta.
Pero ikaw, O Ginoo, nagpahipos sang amon mga kaaway.
Ginpahipos mo ang mga sininggit sang mapintas nga mga tawo,
subong sang panganod nga nagapabugnaw sang mainit nga adlaw.
Ang Dios Nagaaman sang Isa ka Bangkite
6Diri sa Bukid sang Sion ang Ginoo sang mga hangaway magaaman sang isa ka bangkite para sa tanan nga mga kapungsoran sang kalibutan, isa ka bangkite sang labing manamit nga pagkaon kag sang labing maayo nga bino. 7Diri pagapanason niya ang gal-om sang kasubo nga nagalikop sang tanan nga mga kapungsoran. 8Ang#1 Cor. 15:54; Bug. 7:17; 21:4. Ginoo nga Gamhanan magadula sang kamatayon sa walay katapusan! Pagapahiran niya ang mga luha sa mga mata sang tagsatagsa kag kuhaon niya ang kahuloy-an nga gin-antos sang iya mga tawo sa bug-os nga kalibutan. Ang Ginoo gid amo ang naghambal sini.
9Kon mahanabo ini, ang tagsatagsa magasiling, “Sia amo ang amon Dios! Nagsalig kami sa iya kag ginluwas niya kami. Sia amo ang Ginoo! Nagsalig kami sa iya, kag karon nagakasadya kami kag nagakalipay, tungod kay ginluwas niya kami.”
Ang Dios Magasilot sang Moab
10Ang#Isa. 15:1–16:14; Jer. 48:1-47; Ezeq. 25:8-11; Amos 2:1-3; Sof. 2:8-11. Ginoo magaapin sang Bukid sang Sion, pero ang mga tawo sang Moab pagatasakon pareho sang pagtasak sang dagami sa ipot. 11Magakapaykapay sila nga daw malangoy, pero ang Ginoo magasumpo sang ila bugal upod sa ikasarang sang ila mga kamot. 12Ang Dios magaguba sang mga pamakod sang Moab upod ang ila matag-as nga mga pader kag tiphagon niya ini sa duta.
Currently Selected:
Isaias 25: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
