2 Mga Hari 5
5
Gin-ayo si Naaman
1Si#Luc. 4:27. Naaman nga pangulo sang mga hangaway sang Siria, ginatahod gid kag ginadayaw sang hari sang Siria, tungod kay paagi kay Naaman, ang Ginoo nagpadaog sang mga hangaway sang Siria. Bantog sia nga hangaway, pero aruon sia. 2Sa isa sang ila pagsalakay batok sa Israel, ang mga Sirianhon nakabihag sing isa ka dalagita halin sa Israel nga nanginsuloguon sang asawa ni Naaman. 3Isa ka adlaw nagsiling ang dalagita sa iya ama, “Maayo kuntani nga makapakigkita ang akon amo sa propeta nga nagaestar sa Samaria! Ayuhon gid sia sang iya aro.” 4Sang pagkabati sini ni Naaman, nagkadto sia sa hari kag nagsugid sang ginsiling sang dalagita. 5Ang hari nagsiling, “Kadto ka sa hari sang Israel kag dalha ini nga sulat sa iya.”
Gani si Naaman naglakat, nagdala sia sing 30,000 ka bilog nga pilak, 6,000 ka bilog nga bulawan kag napulo ka ilislan nga bayu. 6Ang sulat nga iya gindala nagasiling, “Ini nga sulat nagapakilala sa imo sang akon opisyal nga si Naaman. Luyag ko nga ayuhon mo sia sang iya aro.”
7Sang mabasa sang hari sang Israel ang sulat, gingisi niya ang iya bayu sa kaakig kag nagsiling, “Ano bala ang pagpaabot sang hari sang Siria nga ayuhon ko ini nga tawo? Nagahunahuna bala sia nga ako Dios,#5:7 Dios: ukonisa ka dios. nga may gahom sa paghatag sang kabuhi kag sa pagpatay? Maathag gid nga nagapangita lang sia sing kabangdanan nga mag-away kami!”
8Sang makabati si Eliseo nga propeta sang natabo, nagpadala sia sining mga pulong sa hari: “Ngaa magkaakig ka gid? Ipadala diri ang tawo sa akon, kag ipakita ko sa iya nga may propeta sa Israel!”
9Gani si Naaman naglakat upod sa iya mga kabayo kag karwahi, kag nagdulog sa pwertahan sang balay ni Eliseo. 10Si Eliseo nagpadala sang iya suloguon sa pagsiling kay Naaman nga magkadto sia kag magpanghugas sang iya kaugalingon sing makapito sa Suba sang Jordan, kag magaayo sia sing bug-os sang iya aro. 11Pero si Naaman naglakat nga naakig kag nagsiling sa iya kaugalingon, “Nagahunahuna ako nga maggwa sia kag magpangamuyo sa Ginoo nga iya Dios, magbayaw sang iya kamot sa ibabaw sang akon aro#5:11 sa ibabaw sang akon aro: ukonsa sini nga lugar. kag ayuhon ako! 12Wala labot sina, indi bala ang mga suba sang Abana kag Farpar didto sa Damasco mas maayo pa sa bisan diin nga suba sa Israel? Kuntani nagpanghugas na lang ako didto kag nag-ayo!”
13Ang iya mga suloguon nagkadto sa iya kag nagsiling, “Sir, kon ang propeta nagsugo sa imo sa paghimo sing mabudlay nga butang, kuntani gintuman mo ini. Karon ngaa nga indi ka na lang magpanghugas sang imo kaugalingon suno sa iya ginsiling agod mag-ayo ka?” 14Gani si Naaman naglusong sa Jordan, nagtum-oy sang iya kaugalingon sing makapito suno sa ginsiling ni Eliseo, kag nag-ayo sia sing bug-os. Ang iya panit nagtinlo kaangay sang isa ka bata. 15Nagbalik sia kay Eliseo upod ang iya mga tinawo kag nagsiling, “Karon nakahibalo ako nga wala sing dios, kundi ang Dios sang Israel; gani, kon mahimo, sir, batuna ining akon regalo.”
16Nagsabat si Eliseo, “Ginasumpa ko sa Ginoo nga buhi, nga akon ginaalagad, indi ako magbaton sing regalo.”
Si Naaman nagpamilit nga batunon niya ini, pero indi gid sia. 17Gani si Naaman nagsiling, “Kon indi ikaw magbaton sang akon regalo, hatagi lang ako sing duta nga madala sang duha ka mula nga dalhon ko pauli,#5:17 SING DUTA…NGA DALHON KO PAULI: Ginatuohan sadto anay nga ang isa ka dios ginasimba lamang sa iya kaugalingon nga duta. tungod kay halin karon indi na ako magdulot sang mga halad ukon mga halad nga sinunog sa iban nga dios luas lamang sa Ginoo. 18Gani nagalaom ako nga ang Ginoo magapatawad sa akon kon mag-upod ako sa akon hari sa templo ni Rimon, ang dios sang Siria, sa pagsimba sa iya. Siguro gid nga ang Ginoo magapatawad sa akon!”
19Si Eliseo nagsiling, “Maayo nga paglakat.” Kag si Naaman naglakat.
Malapit pa lang ang nalaktan niya, 20sang si Gehazi nga alagad ni Eliseo nagsiling sa iya kaugalingon, “Ginpalakat sang akon amo si Naaman nga wala pagpabayara! Kuntani ginbaton niya ang ginhatag sadtong Siriahanon. Ginasumpa ko sa buhi nga Ginoo nga lagson ko sia kag magkuha sang bisan ano nga yara sa iya.” 21Gani ginlagas niya si Naaman. Sang makita ni Naaman nga may tawo nga nagalagas sa iya, nagpanaog sia sa karwahi sa pagsugata kag sa pagpamangkot sa iya, “May malain bala nga natabo?”
22Si Gehazi nagsabat, “Wala man, pero ang akon agalon nagsugo sa akon sa pagsugid sa imo nga bag-o gid lang nag-abot ang duha ka katapo sang mga propeta halin sa kabakuloran sang Efraim, kag luyag niya hatagan sila sing 3,000 ka bilog nga pilak kag duha ka ilislan nga bayu.”
23Si Naaman nagsabat, “Yari dalha ang 6,000 ka bilog nga pilak.” Ginpilit niya sia sa pagdala sini, ginsulod ang mga pilak sa duha ka bag, kag ginhatag ini upod sa duha ka ilislan nga bayu sa duha ka suloguon, kag ginsugo sila nga dalhon nila ini kag mag-una kay Gehazi. 24Sang pag-abot nila sa bakulod sa diin nagaestar si Eliseo, ginkuha ni Gehazi ang duha ka bag nga pilak kag gindala sa balay. Dayon ginpabalik niya ang mga suloguon ni Naaman. 25Nagbalik sia sa balay, kag si Eliseo nagpamangkot sa iya, “Diin ka maghalin, Gehazi?”
Nagsabat sia, “Sir, wala ako sing may ginkadtuan.”
26Pero si Eliseo nagsiling, “Indi bala ako kaupod nimo sa espiritu sang magpanaog ang tawo sa iya karwahi sa pagsugata sa imo? Indi ini tion sa pagbaton sing kwarta kag mga bayu, talamnan sing olivo kag talamnan sang ubas, mga karnero kag mga baka, ukon mga suloguon! 27Kag karon ang aro ni Naaman magatapik sa imo, kag sa imo mga kaliwatan sa walay katapusan!”
Sang paghalin ni Gehazi, nag-aruon sia kag ang iya panit nangintama gid ka puti.
Currently Selected:
2 Mga Hari 5: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
