2 Mga Hari 4
4
Si Eliseo Nagbulig sa Isa ka Imol nga Balo
1Ang isa ka balo nga babayi nga katapo sang grupo sang mga propeta nagkadto kay Eliseo kag nagsiling, “Sir, ang akon bana napatay! Ikaw nakahibalo nga sia isa ka tawo nga nagakahadlok sa Ginoo, pero karon nag-abot ang tawo nga iya nautangan sa pagkuha sang akon duha ka mga anak nga lalaki agod mangin-ulipon bilang bayad sang utang sang akon bana.”
2Nagpamangkot sia, “Ano bala ang akon mabulig sa imo? Sugiri ako, ano bala ang yara sa imo balay?”
Ang balo nagsabat, “Wala gid bisan ano, luas lamang sa isa ka magamay nga tibod nga lana sang olivo.”
3Si Eliseo nagsiling sa iya, “Kadto ka sa imo mga kaingod kag magpanghulam sang madamo nga mga banga nga wala sing unod. 4Dayon ikaw kag ang imo mga anak nga lalaki magsulod sa balay, siraduhi ang pwertahan kag sudli sing lana ang mga banga. Ang mapuno nga sulodlan imo painon.”
5Gani ang balo nagsulod sa iya balay upod sa iya mga anak nga lalaki, ginsiraduhan ang pwertahan, ginkuha ang magamay nga tibod nga may lana sang olivo kag nagsugod sa pagsulod sang lana sa mga sulodlan samtang ginadala ini sang iya mga anak sa iya. 6Sang mapuno nila ang tanan nga mga banga, nagpamangkot sia kon may yara pa nga nabilin. Ang isa sang iya mga anak nagsabat, “Amo na lang ina ang katapusan.” Kag nag-untat ang pag-ilig sang lana sang olivo. 7Nagkadto sia liwat kay Eliseo nga propeta kag si Eliseo nagsiling sa iya, “Ibaligya ang lana sang olivo kag bayari ang tanan mo nga utang, kag may mabilin pa ikaw nga kwarta nga imo mapangabuhian upod sa imo mga anak nga lalaki.”
Si Eliseo kag ang Manggaranon nga Babayi nga Taga-Sunem
8Isa ka adlaw, si Eliseo nagkadto sa Sunem, sa diin nag-estar ang isa ka manggaranon nga babayi. Gin-agda niya si Eliseo sa pagkaon upod sa iya, kag halin sadto sa tagsa ka tion nga magkadto didto si Eliseo nagakaon sia sa balay sadto nga babayi. 9Nagsiling sia sa iya bana, “Nahibal-an ko nga ining tawo nga nagahapit diri pirme sa aton isa ka balaan nga tawo sang Dios. 10Himuan naton sia sing isa ka magamay nga kwarto sa may atop, butangan naton sia sing higdaan, lamisa, pulongkuan kag suga, kag didto makatener sia kon mag-abot sia diri.”
11Isa ka adlaw, nag-abot si Eliseo sa Sunem kag nagsaka sia sa iya kwarto sa pagpahuway. 12Ginsingganan niya si Gehazi nga iya alagad sa pagtawag sang babayi. Sang pag-abot sang babayi kay Eliseo, 13ginsingganan ni Eliseo si Gehazi, “Pamangkuta sia kon ano ang luyag niya himuon ko sa iya tungod sang iya maayo nga pagtatap sa aton. Ayhan luyag niya nga makadto ako sa hari ukon sa pangulo sang mga hangaway sa pagsiling nga maayo sia nga babayi.”
Nagsabat ang babayi, “Kontento na ako sang akon kahimtangan upod sa akon mga tawo.”
14Nagpamangkot si Eliseo kay Gehazi, “Ano karon ang akon himuon sa iya.”
Nagsabat si Gehazi, “Wala sia sing anak kag ang iya bana tigulang na.”
15Nagsugo si Eliseo, “Singgana sia nga magpalapit diri.” Nag-abot ang babayi kag nagtindog sa pwertahan, 16kag#Gen. 18:4. si Eliseo nagsiling sa iya, “Sa sini nga panahon sa madason nga tuig magakugos ikaw sang isa ka bata nga lalaki.”
Sa kakunyag sang babayi nagsiling sia, “Sir, indi ka magbutig sa akon. Ikaw isa ka alagad sang Dios!”
17Pero, suno sa ginsiling ni Eliseo, sa amo nga tion sa madason nga tuig nagbata sia sing lalaki.
18Nagligad ang pila ka tuig kag daku na ang bata. Isa ka adlaw nagkadto sia sa iya amay nga yadto sa uma sa tion sang tig-alani upod sa mga mangangani. 19Sa hinali nagsinggit ang bata sa iya amay, “Ang ulo ko masakit! Ang ulo ko tama ka sakit!”
Ang amay nagsiling sa iya suloguon, “Dalha ang bata sa iya iloy.” 20Ginhakwat sang suloguon kag gindala ang bata pabalik sa iya iloy. Ginsabak sia sang iya iloy tubtob mag-udto, kag napatay sia. 21Gindala niya ang bata sa kwarto ni Eliseo, ginpahamyang niya sa higdaan, ginsirahan niya ang pwertahan kag naggwa. 22Dayon gintawag niya ang iya bana kag ginsingganan, “Padalhi ako sang isa ka suloguon kag isa ka asno. Kinahanglan makadto ako kay Eliseo nga propeta. Mabalik man ako gilayon.”
23Nagpamangkot ang iya bana, “Ngaa makadto gid ikaw karon nga adlaw, indi man ini Adlaw nga Inugpahuway ukon Piesta sang Lati?”#4:23 ADLAW NGA INUGPAHUWAY UKON PIESTA SANG LATI: Ining balaan nga mga adlaw ginahunahuna nga labing maayo nga tion sa pagpamangkot sa propeta.
Nagsabat sia, “Sigi lang.” 24Dayon ginbutangan niya sing hampilo ang asno kag nagsugo sa suloguon, “Padasiga ang asno, kag indi pagpahinaya kon indi ako magsiling sa imo.” 25Gani naglakat sia, kag nagkadto sa Bukid sang Carmel sa diin didto si Eliseo.
Nakita sia ni Eliseo nga nagapalapit samtang malayo pa sia, kag ginsingganan niya ang iya suloguon nga si Gehazi, “Tan-awa, nagapalapit ang babayi nga taga-Sunem! 26Dalagan kag sugataa sia kag pamangkuta kon kumusta sia, ang iya bana, kag ang iya anak nga lalaki.”
Ginsugiran sang babayi si Gehazi nga ang tanan maayo man, 27pero sang pag-abot niya kay Eliseo nagluhod sia sa iya atubang kag nagkapyot sa tiil ni Eliseo. Itiklod sia kuntani ni Gehazi, pero nagsiling si Eliseo, “Pabay-i lang sia. Wala mo bala makita nga daku gid ang iya kalisod? Kag ang Ginoo wala magsugid sa akon nahanungod sini nga butang.”
28Ang babayi nagsiling kay Eliseo, “Sir, nagpangayo bala ako sa imo sing isa ka anak nga lalaki? Wala bala ako nagsiling sa imo nga indi mo ako pagdayaan?”
29Si Eliseo nagliso kay Gehazi kag nagsiling, “Dalidali ka! Dalha ang akon sungkod kag maglakat. Indi ka magbugno sa kay bisan sin-o nga imo masugata, kag kon may magbugno sa imo indi ka magsabat. Sulod ka dayon sa balay kag ibutang ang sungkod ko sa ibabaw sang bata.”
30Ang babayi nagsiling kay Eliseo, “Nagasumpa ako sa akon pag-unong sa buhi nga Ginoo kag sa imo nga indi ako magbiya sa imo!” Gani nagtindog si Eliseo kag nagsunod sa iya. 31Si Gehazi nag-una kag nagbutang sang sungkod ni Eliseo sa ibabaw sang bata, pero wala gid nagatingog ukon nagaginhawa ang bata. Gani nagbalik si Gehazi sa pagsugata kay Eliseo kag nagsiling, “Ang bata wala gid magmata.”
32Sang pag-abot ni Eliseo, nagsulod sia nga isa lang sa kwarto kag nakita niya ang bata nga patay nga nagahamyang sa higdaan. 33Ginsirahan niya ang pwertahan, kag nagpangamuyo sa Ginoo. 34Dayon#1 Hari 17:21. ginhap-an niya ang bata, ginbutang ang iya baba sa baba sang bata, ang iya mga mata sa mga mata sang bata, kag ang iya mga kamot sa mga kamot sang bata. Samtang nagahapa sia sa bata, ang lawas sang bata nag-amat-amat init. 35Nagbangon si Eliseo, naglakat pakadto pakari sa kwarto, kag dayon nagbalik sia kag naghapa liwat sa bata. Ang bata nagpangatsi sing makapito, kag dayon nagmuklat ang iya mga mata. 36Gintawag ni Eliseo si Gehazi kag ginsingganan nga tawgon ang iloy sang bata. Sang pagsulod sang iloy, si Eliseo nagsiling sa iya, “Yari ang imo anak.” 37Naghapa sia sa atubang ni Eliseo, dayon ginkuha niya ang iya bata kag naglakat.
Ang Duha pa gid ka Milagro
38Sang may tiggulotom sa bug-os nga duta, si Eliseo nagbalik sa Gilgal. Samtang nagatudlo sia sa grupo sang mga propeta, ginsingganan niya ang iya suloguon sa pagsun-ad sing daku nga kolon kag magluto sang linaga para sa ila. 39Ang isa sa ila nagkadto sa uma sa pagpangutan. Nakakita sia sing atimon nga talunon, kag nagpang-ipo sia sang mga bunga nga masarangan niya sa pagdala. Gindala niya ini pauli, ginkihad, kag ginbutang sa linaga nga wala niya mahibal-i kon ano ini. 40Ang linaga ginhuwad kag ginpakaon sa mga tawo, pero sang matilawan nila ini nagsiling sila kay Eliseo, “Makahililo ini!”—kag indi sila magkaon. 41Si Eliseo nagpangayo sing harina, ginbutang ini sa kolon kag nagsiling, “Magkuha pa gid kamo sing linaga para sa mga tawo.” Kag karon indi na ini makahililo.
42Sa isa sadto ka tion, may isa ka tawo nga nag-abot halin sa Baal-salisa, nga may dala kay Eliseo nga baynte ka bilog nga tinapay nga nahimo sa nahauna nga patubas sang sebada sina nga tuig, kag ang iban nahimo sa bag-o lang maani nga trigo. Ginsingganan ni Eliseo ang iya suloguon nga pakan-on sini ang grupo sang mga propeta, 43pero ang suloguon nagsabat, “Nagahunahuna ka bala nga makaigo ini sa 100 ka tawo?”
Nagsabat si Eliseo, “Ihatag sa ila agod kaunon, tungod kay ang Ginoo nagsiling nga magakaon sila kag may mabilin pa gid.” 44Gani ginbutang sang suloguon ang kalan-on sa atubang nila, kag suno sa ginsiling sang Ginoo nagkaon sila tanan kag may nabilin pa.
Currently Selected:
2 Mga Hari 4: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
