2 Mga Hari 6
6
Ang Pagkakita liwat sang Ulo sang Wasay
1Karon ang grupo sang mga propeta nga gindumalahan ni Eliseo nagreklamo sa iya, “Ang lugar nga amon ginaestaran gutok sa amon! 2Tugoti kami sa pagkadto sa Jordan sa pagpulod sing mga kahoy, agod nga makapatindog kami sang amon pagaestaran.”
Si Eliseo nagsabat, “Sigi.”
3Ang isa sa ila nagpilit kay Eliseo sa pag-upod sa ila. Nagsugot sia, 4kag naglakat sila. Sang pag-abot nila sa Jordan, nagpamulod sila sing mga kahoy. 5Sang nagapulod sing kahoy ang isa sa ila, sa hinali ang ulo sang wasay nag-apok sa tubig. Nagsinggit sia kay Eliseo, “Sir, ano ang akon himuon? Ginhulam ko lang yadto!”
6Si Eliseo nagpamangkot, “Diin bala nayon nagtupa?”
Gintudlo sang tawo ang lugar nga gintup-an kag nag-utod si Eliseo sing kahoy, ginhaboy ini sa tubig, kag naglutaw ang wasay. 7Nagsugo sia, “Kuhaa na!” Dayon gindab-ot sang tawo ini kag ginkuha.
Ginlutos ang mga Hangaway nga Sirianhon
8Ang hari sang Siria nagapakig-away batok sa Israel. Nagpakigsapol sia sa iya mga opisyales, kag nagpili sing isa ka lugar nga patindugan niya sang iya kampo. 9Pero si Eliseo nagpadala sing pahibalo sa hari sang Israel, nga nagapaandam sa iya nga indi sia magpalapit sa sadto nga lugar, tungod kay ang mga Sirianhon nagahulat sa pagsalakay didto. 10Gani ang hari sang Israel nagpaandam sa mga tawo nga nagaestar didto, kag nagbantay sila. Natabo ini sa madamo nga beses.
11Ang hari sang Siria natublag gid tungod sini, gintawag niya ang iya mga opisyales kag ginpamangkot sila, “Sin-o bala sa inyo ang nagadampig sa hari sang Israel?”
12Nagsabat ang isa sa ila, “Wala gid bisan isa, Mahal nga Hari. Si Eliseo nga propeta nagasugid sa hari sang Israel sang bisan ano nga imo ginahambal, bisan sa sulod sang imo kaugalingon nga kwarto.”
13Ang hari nagsugo, “Pangitaa ninyo kon diin sia, kay ipadakop ko sia.”
Sang ginsugiran sia nga si Eliseo didto sa Dotan, 14nagpadala sia didto sing madamo nga mga soldado nga may mga kabayo kag mga karwahi. Nag-abot sila sa banwa sang gab-i kag ginkibon nila ini. 15Aga pa gid sang madason nga adlaw ang suloguon ni Eliseo nagbugtaw, naggwa sia sa balay kag nakita niya ang mga hangaway nga taga-Siria nga may mga kabayo kag mga karwahi nga nagakibon sang banwa. Nagbalik sia kay Eliseo kag nagsiling, “Sir, tapos na kita! Ano ang aton himuon?”
16Si Eliseo nagsabat, “Indi ka magkahadlok! Ang nagaapin sa aton mas madamo pa sang sa nagaapin sa ila.” 17Dayon nagpangamuyo sia, “O Ginoo, buksi ang iya mga mata agod makakita sia!” Ang Ginoo nagsabat sang iya pangamuyo, kag ang suloguon ni Eliseo nagtangla kag nakita niya ang bakulod nga napuno sang mga kabayo kag mga karwahi nga kalayo sa palibot ni Eliseo.
18Sang magsalakay ang mga taga-Siria, nagpangamuyo si Eliseo, “O Ginoo, bulaga ini nga mga tawo!” Ang Ginoo nagsabat sang iya pangamuyo kag ginbulag sila. 19Dayon si Eliseo nagkadto sa ila kag nagsiling, “Nagtalang kamo, indi ini ang banwa nga inyo ginapangita. Sunod kamo sa akon, kay tuytoyan ko kamo sa tawo nga inyo ginapangita.” Kag gintuytoyan niya sila pakadto sa Samaria.
20Sang makasulod na sila sa siudad, si Eliseo nagpangamuyo, “O Ginoo, buksi ang ila mga mata, agod makakita sila.” Ang Ginoo nagsabat sang iya pangamuyo; ginpabalik niya ang ila panulok kag nakita nila nga yara sila sa sulod sang Samaria.
21Sang makita sang hari sang Israel ang mga taga-Siria, nagpamangkot sia kay Eliseo, “Sir, pamatyon ko bala sila? Pamatyon ko?”
22Nagsabat sia, “Indi, bisan gani ang mga ginbihag mo sa inaway nga mga soldado indi mo pagpatyon. Hatagi sila sing pagkaon kag tubig, kag pabalika sila sa ila hari.” 23Gani ang hari sang Israel nagpapunsyon para sa ila, kag sa tapos sila makakaon kag makainom, ginpabalik niya sila sa hari sang Siria. Halin sadto ang mga Siriahanon wala na maggubat sa duta sang Israel.
Ang Pagkibon sang Samaria
24Sang ulihi, si Haring Benhadad sang Siria nagpangulo sang iya bug-os nga hangaway batok sa Israel kag nagkibon sang siudad sang Samaria. 25Tungod sang pagkibon, may daku nga gutom sa siudad nga ang ulo sang asno nagabili sing otsenta ka bilog nga pilak, kag ang tunga sa letse nga monggo nagabili sang lima ka bilog nga pilak.
26Ang hari sang Israel nagaagi sa pader sang siudad sang magpanawag ang isa ka babayi, “Tabangi ako, Mahal nga Hari!”
27Nagsabat sia, “Kon ang Ginoo indi magbulig sa imo, ano ang akon sarang mahatag? May trigo ukon bino bala ako? 28Ano ang imo palaligban?”
Nagsabat sia, “Sang isa ka adlaw ini nga babayi nagsiling nga kaunon namon ang akon anak nga lalaki kag ang iya naman anak nga lalaki sa madason nga adlaw. 29Gani#Deut. 28:57; Pan. 4:10. ginluto namon ang akon anak kag ginkaon. Sang madason nga adlaw ginsingganan ko sia nga ang iya naman anak ang amon kaunon, pero iya sia gintago!”
30Sang pagkabati sini sang hari, gingisi niya ang iya bayu sa kaakig, kag ang mga tawo nga malapit sa pader nakakita nga nagasuksok sia sang sako sa sulod sang iya bayu. 31Nagsiling sia, “Kabay nga patyon ako sang Dios kon indi ko mapapugotan si Eliseo karon nga adlaw!” 32Kag nagpadala sia sing tawo sa pagkuha kay Eliseo.
Sa pihak nga bahin, si Eliseo yara sa balay upod sa mga katigulangan nga nagbisita sa iya. Sa wala pa mag-abot ang ginsugo sang hari, si Eliseo nagsiling sa mga katigulangan, “Ina nga manugpatay nagpadala sang isa ka tawo sa pagpatay sa akon! Karon, kon mag-abot sia diri, sirahi ninyo ang pwertahan kag indi sia pagpasudla. Ang hari mismo yara nagasunod sa likod niya.” 33Wala pa sia makatapos hambal sini, sang nag-abot ang hari kag nagsiling, “Ang Ginoo amo ang nagpadala sing gutom sa aton! Ngaa bala maghulat pa ako nga buligan niya?”
Currently Selected:
2 Mga Hari 6: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
