1 Petero 1
1
Khuusheesa
1Ibaluwa yino yaama isiise Petero umurume wa Yesu Kristo. Ingironela baarobole ba Wele babaawuyisibwa baasalanila mu bibala nga Pontusi, Galatiya, Kapadokiya, Asiya, ni Bisiniya. 2Babaandu babarobolewa lwe shitsilililwa sha Wele Paapa, bawaanibwayo buraawa lw'Omwoyo weewe, khuuba babawulila Yesu Kristo, luundi babamiliisibwa lwe kamafuki keewe.
Bubweela ni lukoosi bibe mus'iinywe mu bukali bwoosi.
Khukhwiyikina khuulamu
3Khakhusiime Wele luundi Paapa w'Omukasya Yesu Kristo, lwe shiisa sheewe shikali, uwakhuwa ife khusaalikha bushaakha mu bulamu bwe kumwiyikino khulwe khulamusibwa khwa Yesu Kristo khukhwaama mu bafu. 4Lwashino, kane ifwe khufune busikha bubukhanyala khuubola, namwe bwonekha, namwe bwabakho lisaanda ta. 5Inywe mwaliindibwa bulayi ni kamaani ka Wele khuubirira mu khufukiilila, khukhwoolesa buwonesi bubwirekefu ni bulibonesebwa khu mbuka imalilisi.
6Ni mwikhoyele shino naabi, ikhaba nga imbuka iyaari ifwiiti iyi, mwatsiinisibwa mu bye khukhakibwa bikali bibikhali bitweela ta. 7Shitsiilililwa shabyo nikhwo khuukhaka khuufukiilila khweenywe noola khuli khwa ŋali. Ikhaba ni zaabu nayo iwawo, ikhakibwa ni kumulilo, ni khufukiilila khweenywe khukhuuli khwe lisuno khukhufuurisa izaabu, khwakha nakhwo khwakhakibwa, nio manya mwikhalilikhe. Ulwo nio lwanyuma munyoole lubuyi, ni shiriifwa ni lukoosi khu shifukhu khweesi Yesu Kristo alibonesebwa. 8Inywe ikhaba nga mushiili khumubonakho ta, mumukana. Ikhaba nga simumubonakho ari ta, ne mumufukiilisamo luundi mwitsusibwa ni kumwikhoyo kumukali kwe shiriifwa kukukhanyala khulomewakho mu bilomo ta. 9Lwekhuuba mulikho mufuna shitsilililwa she khuufukiilila khweenywe, nikhwo khuuwonesebwa khwe kimyoyo kyeenywe.
10Yaba khulwe buwonesi buno kila baŋoosi baareebelesa, luundi baawentselesela ilala, luundi bakanikha khu shiwaanwa shino shishaba shitsya khubaweebwa. 11Bakhakakho khumanya imbuka shiina, na saambo shiina isi Umwoyo wa Kristo mu nibo aba okesanisa, nga niye n'aboola nga bushiili khu bye khubonabona khwa Kristo, ni shiriifwa shishaba shitsya khwiitsa. 12Shino shabonesebwa isi baŋoosi shiri sibaaba beyakaanisa babeene khu bwaabwe ta, nenjeeba khulwe bulayi bweenywe, nga ni bakanikha khu biindu ibyo ari byeesi muwulila nga bibaboolelwa ni naabo babaababoolela Kamakhuuwa Kamalayi khulw'Omwoyo Umukhosefu uwakaanisibwa khukhwaama Mwikulu. Bibiindu byeenebyo nibyo byeesi bamalayika nabo bakana khuumanya.
Khuulaangibwa isi buulamu bukhosefu
13Nashiryo ni mwirekekhe kimyoyo kyeenywe, nga mwiliindila ilala. Ni mureere ilala khukhwiyikina khweenywe khu bweela bubuutsya khubaweebwa nga Yesu Kristo atsya khubonesebwa. 14Ni mube babaana babawulila Wele, mukhayilibwayilibwa ni khukhwiwotooma khweenywe khukhwanyoowa khweesi mwaba nakhwo nga mushiili khumanya bya ŋali ta. 15Ne nga uwabalaanga n'ali umukhosefu, nanywe ni mube bakhosefu mu byoosi byeesi mukhola. 16#Lev 11.44,45; 19.2Lwekhuuba bibyaronebwa biloma biri, “Ni mube bakhosefu lwekhuuba ise ndi umukhosefu.”
17Ni muba nga muloomba, mumulaanga muri Paapa, umweeneyo niye ukhala kimisaango, nga bibikholewa bya buli mutweela ni bili, nga s'aromboora ta. Ni mumenye buulamu bweenywe ano mu shiibala nga mumurya niye. 18Lwekhuuba mwamanya bulayi muri, simwasikuliwa ni bibiindu bibiwawo nga ifeeza, namwe izaabu, khukhwaama musaambo tseenywe tsiimbi tsitsikhalimo tseesi mwaweebwa khukhwaama khu bakuuka beenywe ta. 19Ne mwasikuliwa ni kamafuki ke lisuno ka Kristo, uwaba nga khasheese khakhakhaabakho lisaanda namwe likoondo lyoosi ta. 20Niye arobolewa khaale nga shiibala shishiili khubuumbibwa ta, ne abonesebwa khu mbuka imalilisi yino khulwe bulayi bweenywe. 21Khulweewe mufukiilila mu Wele, uwamulamusa mu bafu, wamuwa shiriifwa. Ni lweesho khufukiilila khweenywe ni kumwiyikino bili mu Wele.
22Ne ari nga ni shili ndi inywe mwayipyeluusa kimyoyo kyeenywe nga muwulila bwa ŋali nio mube ni khuukana khwa ŋali khwe be buulebe beenywe. Ni mukanane mwenyene na mwenyene ni kimyoyo kyeenywe kyoosi. 23Lwekhuuba mwasaalikhile bushaakha, akhuba ni miitso ibola ta, ne ikhabola ta, lwe Lomo ya Wele inamu luundi ikhawawo ta. 24#Isay 40.6-8Lwekhuuba bibyaronebwa biloma biri;
“Babaandu boosi bafwaana nga bunyaasi,
ni shiriifwa shaabwe shoosi shili nga biimuli bye mwirome,
bunyaasi buniaala, ni bimuli bikwa.
25Ne Ilomo y'Omukasya ibawo biilo ni biilo.” Ni ilomo yino niko kamakhuuwa kamalayi kakaaboolelwa isi muli.
Currently Selected:
1 Petero 1: LPE
Highlight
Copy
Compare
Share
Want to have your highlights saved across all your devices? Sign up or sign in
The Bible in Lumasaaba © Bible Society of Uganda, 2016.
