1 Petero 2
2
Libaale Liilamu ni Linaambo Likhosefu
1Nashiryo, ni mwirusekho bumoyaani bwoosi, bubeeyi, libuba, ni kamakuto koosi. 2Ni mufwaane nga babaana babasaalikhile baŋaalye, mwikoombe kamabeele k'Omwoyo kakaakhalimo shiibi shoosi ta, nio kabatsowese khuboolesa inywe khu buwonesi bweenywe. 3#Zab 34.8Ilala mwatsemakho mwamanya muri Umukasya umulayi.
4Ni mwiitse isi Umukasya, niye libaale lilamu lyeesi babaandu bekaana, ne isi Wele nilyo liirobole, lye liisuno. 5Ni nanywe muryo, muli nga kamabaale kamalamu, mulikho mwombekhewa khukhwikyela intsu iye kumwoyo, khuuba busaayi bukhosefu, bubuuwayo tsisaayilo tse kumwoyo tsitsifukiilisibwa isi Wele khulwa Yesu Kristo. 6#Isay 28.16Lwekhuuba bibyaronebwa bikhosefu biloma biri,
“Bona, naara libaale mu Sayuuni,
libaale lirobole, lye lisuno, lye mu soonda,
ni nooyo umufukiililamo, s'aliwaambisibwa tsisoni ta.”
7 #
Zab 118.22
“Nashiryo, isi inywe babafukiilila, libaale lino lili lye lisuno. Ne isi ibo babaakhafukiilila ta, libaale tsana lyeesi babombekhi bekaana nilyo lilyekyela likhulu lye musoonda.”
8 #
Isay 8.14,15 Ni shisharonebwa shishiindi shiloma shiri,
“Libaale lino nilyo lyeesi babaandu betuyakho
naluundi nilwo lulwaanda luluukila baakwa.”
Betuya baakwa lwekhuuba ikwo nikwo kumutaambo kwaabwe kweesi abe baakha batsyamo.
9 #
Luky 19.5,6; Isay 43.20;
Luky 19.5; Maka 4.20; 7.6; 14.2; Tito 2.14;
Isay 43.21;
Isay 9.2
Ne inywe muli babaandu barobole, basaayi be buyiinga, linaambo likhosefu, babaandu ba Wele babeene, nio munyale khuboola bye kamakaanga bya Wele uwabalaanga khurura mu shilima mwinjile mu buwaanga bweewe bwe kamakana. 10#Hos 2.23Yabawo lutweela nga simumanyikha nga babaandu ta, ne ari muli babaandu ba Wele. Khaalekho simwawaambilwa shiisa ta, ne ari mwawaambiwiile shiisa.
Baakulwa ba Wele
11Bebuulebe bakanwa, imbekontselela nga ni muli bakyeni luundi bakyeendaani mu shiibala, mukhewaanayo isi khukhwiwuuma khwe kumubili kukusoolana ni kumwoyo ta. 12Tsisaambo tseenywe mu Banaambo tsibatsake tsindayi, nio bari ikhaba nga babawaabila lwe khukhola buubi, banyale khubona buraambi bweenywe bulayi, babuyile Wele khu shifukhu khweesi alikobolelakho.
13Ni muwulilatsake buli buwuli bwoosi bubwarebwawo ni babaandu khulw'Omukasya. Namwe isi umuyiinga nga niye umukhulu, 14namwe isi ba gafana babarumaniwa n'umuyiinga khuuwa shitaambiso abo babaakhola buubi, ni khubuyila ibo babaakhola biilayi. 15Lwekhuuba khuli khuukana khwa Wele ndi iwe khuukhola buulayi usilisa inganikha iye busilu iye babaandu babaakhamanya ta. 16Ni mumenye nga babaandu baalekhuule, ne mukharaambisa lukoosi lweenywe khubiimbilila buubi bwoosi ta. Ne ni mumenye nga babakaanisi ba Wele. 17Ni mwisatsakemo babaandu boosi shiriifwa, mukanaatsake be buulebe baafukiilisi, muryatsake Wele, mwisatsakemo umuyiinga lukoosi.
She khuubonelakho she khutsiinisibwa khwa Kristo
18Inywe babakaanisi, ni muwulilatsake bakoosi beenywe, luundi ni mubawatsake lukoosi lwoosi, akhuba isi ibo babaali balayi babenaanayo bonyene ta, ne n'isi barafu. 19Lwekhuuba shino nisho shishisiimibwa, noola umuundu ekhaliilikha butsiina bubumwiitsila akhali ilomo yoosi ta, ne nga mu mwoyo kweewe waamanyile sheesi Wele akana. 20Lwekhuuba buulayi shiina bweesi unyoola, n'uba nga baakhupile lwe shishoonako sheesi ukholele, ne wekhaliilikha? Ne n'utsiinisibwa lwe khuukhola buulayi, naluundi wekhaliilikha, shino shisiimibwa mu moni tsa Wele. 21Shino nisho sheesi mwalaangibwila, lwekhuuba Kristo aatsiinisibwa khulweenywe, aryo waabalekhela she khuubonelakho, ari nanywe mulondelele mu bikyele byeewe.
22 #
Isay 53.9
Niye s'akholakho shishoonako shoosi ta,
namwe mbaawo uwawulilakho bubeeyi bwoosi khukhwaama mukhanwa mweewe ta.
23 #
Isay 53.7
Nga n'akhomewa s'elamo ilomo yoosi ta;
nga n'atsiinisibwa
s'ariisariisa ta,
ne ewaanayo isi uyo ukhala kimisaango bulayi.
24 #
Isay 53.5,6 Kristo umweene asuta
bibyoonako byeefwe mu mubili kweewe khu musalaba,
nio akile ifwe khube bafu isi bibyoonako,
ne khube balamu mu bukwalaafu.
Lwe kamakoontsyo keewe,
inywe mwawonesebwa.
25Lwekhuuba mwaba nga kamasheese
kakatiimatiima busa,
ne ari mwakoboole isi umwaayi
luundi umuliindi we kimyoyo kyeenywe.
Currently Selected:
1 Petero 2: LPE
Highlight
Copy
Compare
Share
Want to have your highlights saved across all your devices? Sign up or sign in
The Bible in Lumasaaba © Bible Society of Uganda, 2016.
