Azaya 9

1Alege daanika a kan ŋman bo baai ale a nam la jigi ya. Dila powa wa jam basi kama ate Zebulun ale Nafitali tɛŋsaŋa a siŋ tɛŋ, alege wa ale nye ate zula a jam Galili baai ale kan daa Juuba la tɛŋka ale bo nyakpiemu suiku nɔi ale Jodan benni la. 2Nuru baai ale a cheŋ legi po la a nya ka bolim kpiem. Baai mɛ ale bo legi kpien po la, bolim a nyaksi ba jigi. 3Naawen ya, fi nye ate tɛŋka a lagri ale ŋman te ba masim a gum ba masimu po. Ba a dɛ masim fi niŋ ase nuruba nyiem ale che ba ŋankpaanta ate ba sue a peenti diila. Ba a dɛ masim ase ka nuruba nyiem ale lab ŋan baai ate ba kɔlim la. 4Midian nak yikka danni fi kaasi niiga diok kuui ale chim jibta a te ba la kama ale diok kuui ale bari vi ba ŋmankpalaŋa zuk la ale baai ale a namsi ba la doani. 5Tugurik tɔŋdɔ meena nuensa ate ba su nye kpaliŋka la ale garuk meena ale lusi ziimu po la a magsi ka pai juka, ba chimka kpaam a magsi bolim. 6Biik ate ba biak a te ti, nidoabili ate ba pai a te ti, ate pagrimu a bo wa ŋmankpalaŋa zuk. Ate ba a wi wa ayen, Sagrɔ Kperikaliik ale Wen Tanjaŋini ale Taam Wuu Koa ale Suiyɔgni Nabiik. 7Wa pagrimu ale wa suiyɔgni zuaka a kan ta kpeglimka. Wa ale kali Deevid naamu zukpaglika zuk. Wa ale basi ate wa naamu a zaani abe wa ta wensie ale nyemagsika a nyini dila po a kasim a cheŋ. Naawen Dii Ale A Dɛ Tugurik Tɔŋdɔma Niŋ La mariŋka ale basi ate kude a nye.

8Nyɔnɔwa a te ka tomtomiŋ a ta chaab ale Jekob. Ka ale lo ka Izirali zuk. 9Nuruma meena ale miŋ ku. Ɛfraim ale Samaria tɛŋ demma ale miŋ wanni de. Alege kanjanta ale tukpari ale bo ba jigi la nyiŋ, ba a weeni kama ayen. 10<<Peelaŋa a lo kama, alege ti le ŋman sɛ ale tintain peesima. Kinkaŋsaŋa a lo kama alege ti ale ŋman tagri si ale nyunyoŋta.>> 11Alege Naawen a basi kama ate Arezin demma dachaasaŋa a nya pagrim a ta chaab ale ba ale choa ba dachaasaŋa a basi. 12Araam demma ale nyini kori la, ale Filistia demma ale nyini yeniŋ la, a lak ka ba noaŋa a pa Izirali a nɛ. Kude meena ŋaaŋnyiŋ wa sui ale diem a puuri ale ba. Wa za wa namsi ba kama.

13Alege nuruma an ŋmani waai ale nak ba la jigi ya, yaase ba gisi Naawen Dii Ale A Dɛ Tugurik Tɔŋdɔma Niŋ La. 14Dila nyiŋla, Naawen ale gebi wadek a nyini Izirali jigi zuk ale juik meena, kpinkparuk naŋ ale wuwɔŋ meena dai yeŋ po. 15Niŋdeerɔma ale kpaŋŋa ale chim zukku, ate biisiteerɔba baai ale ta venta sinsaga a sak la ale chim juiku. 16Baai ale a gani nuruma de la, ba ta ba cheŋ bɛ kama, ate baai ate ba a gani la, ba ta ba cheŋ bɛ. 17Dila nyiŋla, Nyɔnɔwa sui a kan peenti ale nidoabili paalisaŋa, yaase wa ta jiirim ale baai ale kan ta koba ale pukɔga. Dii nyiŋla, waai meena a kan tom wentuima. Ba a nye ka gaasa ale a biisi biem wie. Nyakude meena nyiŋ, wa suinni a an diem a basi ya. Wa za wa namsi ba kama.

18Wensie, gaasa a dɛ ase ka bolim la. Bu dɛ muŋkangɔtisaŋa ale muŋsaŋa ale chogsi gɔnni tikima a dɛ ate nyuisa yiti a jueli wen nna kulkul. 19Naawen Dii Ale A Dɛ Tugurik Tɔŋdɔma Niŋ La suipuurumu nyiŋ, tɛŋka ale dɛ ate nuruma ale chim kpaam a magsi bolim. Ate waai a kan pai wa suok a basi. 20Ba ale cheem a gala ale a juga a pa ŋandiinta a dɛ, alege ba a kan chagi waai meena ale yik ka ba bisa a ŋɔbi. 21Manasa dɔkdemma ale Ɛfraim dɔkdemma ale nye kpaliŋ ate ku ŋaaŋnyiŋ ba ale gum chaab a nye kpaliŋ ale Juda dɔkdemma. Alege kude meena zuk, wa suinni a kan yɔgi. Wa za wa namsi ba kama.

Currently Selected:

Azaya 9: BWU

Highlight

Copy