Azaya 8

1Naawen a yaa weeni mi ayen, <<Pai gbaŋ kpieŋ ale ja ŋmarisim a ŋmarisi ku zuk ayen Mayer Salal Yas Baz. 2Ate m le wi Yuraya ale ka kaabteerɔ la, ale Zakaria ale ka Jeberekia nidoabinni la ate ba chim wensie seerɔba a te mu.>>

3Ate mi a yaa jam cheŋ nipok biisiteerɔwa jigi, ate wa yik puuk a biak nidoabilik. Ate Naawen a weeni mi ayen. <<Te wa yuei ayen Mayer Salal Yas Baz. 4Alege ate nidoabinni a seba wa le wa nye dii a weeni ayen, <M kowa yaase m mawa,> Assiria naawa ale pai Damasikus jigsika ale Samaria ŋan baai ate ba kɔlim la a ta cheŋ.

5Naawen a ŋman weeni mi ayen, 6<<Nuruma de ale zɛri nyiam maŋ kaai ale nyini Siloa la ale a dɛ ba masim Arezin ale Aremaliya nidoabinni zuk la nyiŋ, 7dila nyiŋ, Nyɔnɔwa za wa ta ka Assiria naawa ale wa tugurik tɔŋdɔma ate ba jam ta chaab ale ba ase Benni nyaata ale mobi a pagra diila. Di ale sueri a waaŋ va di bimbimaŋa meena zuk a cheŋ 8ate bu chuiri a cheŋ Juda a vilinti a va ka zuk, a va ka po a cheŋ ale a paari ŋiri. Bu ale teeri dii ase kinkaŋŋa la ale lik ni tɛŋka labsimu la, Immanuel!

9Nama tɛŋsa demma, ni kaari kpaliŋ kaarik abe ni seba ayen ni za ni kaasi kama! Ni be wom nama tɛŋ sii ale yalima la. Ni gomsi a magsi kpaliŋ abe ni kaasi! Ni gomsi a magsi kpaliŋ abe ni kaasi! 10Ni dan poom tagri ni zɔŋŋa ŋa ale labri a chim wari yoŋ, ate ni dan poom weeni ni zɔŋŋa ŋa kan tom tuima. Dii nyiŋla Wen a bo ale ti kama.

11Naawen a pai ka wa nisim pagrika a vi m zuk ale a kaam mu a ayen, kan va nuruma de suiku. Wa weeni kama ayen. 12<<Ni kan a wi biem zɔga ate nuru meena a wi ayen biem zɔga la. Abe ni kan a yɔgsa ale jabuui ate ba yɔgsa la, abe ni kan te ni kpaziim a nagi. 13Naawen Dii Ale A Dɛ Tugurik Tɔŋdɔma Niŋ La ale magsi ayen ni nya wa ase wa ale welema la. Wala ale magsi ayen ni a chali wa. Wala ale magsi ayen ni kpaziita a nak ale wa. 14Ate wa ale chim yeri. Alege Izirali yie ŋayewa ale chim ka tintain dii ale nye ate nuruba a nak naŋsa ale piuŋ kuui ale nye ate nuruba a lo. Ate Jerusalem demma wa ale chim ka baruk a te ba. 15Ba yega ale nak naŋsa, ate ba ale lo a kaasi. Ba ale bari a yik ba.>>

16Ni yik m wieŋa a tara abe ni a nya ŋa zuk ate ŋa kan siŋ tɛŋŋa a bo m ŋaaŋviirɔma po. 17Mi ale limisi Naawen dii ale a suk wadek a nyini Jekob demma jigi la. M le ta mariŋka ale wa.

18Mi ale nna, ale bi sii ate Naawen a pai te mu la. Tama ka daana ale magsa a bo Izirali a nyini Naawen Dii Ale A Dɛ Tugurik Tɔŋdɔma Niŋ La jigi waai ale bo Zayon Guuku zuk la.

19Ase nuruba a dan weeni ni ayen ni kpesi wie a nyini sampoporisa ale chichiri wiirisa jigi, baai ale a waasi wie la. Ka boan nyiŋ ate nuruba a kan bek a nyini Wen jigi ya? Boan nyiŋ ate ba a bek wie a nyini kpieba jigi a te ŋanvuta? 20Ba sinsaŋŋa ale ba wieŋa a dan ka a va chaab ale wanni de, ku kiri ale ba a bo ka legi po. 21Ninam ale kɔm ale yik ba, ate ba ale gilim tɛŋka meena, alege kɔm ale kasim a ta ba ate ba ale zak a nya wenŋmazuk ate ba ale ka a te ba Naawa, ale ba Wenni. 22Ate ba ale nya tɛŋ zuk de, a nya ninam ale legi ale yɔgsum, ate ba ale bo ka legi kpien po.

Currently Selected:

Azaya 8: BWU

Highlight

Copy