Azaya 10

1Ku ale toa a te baai ale a nye venta sinsaga ale a dueni namsika wie la, 2ate ŋa a kasi ŋanjaksa a nyini ba wensie po la, ale kan weeni nyemagsika a sak mi nuru baai ale bo ninam po la. Ale a tuesi ba ŋandiinta a nyini pukɔga jigi ale a vari ŋanta a nyini baai ale kan ta koba la jigi. 3Ni ale nye ka sɛ ninammu danni ase kaasuŋ a nin nyini niŋ a jam? Ka wana jigi ate ni ale chali a cheŋ ayen wa maari ni? Ni ale pa ni jigsika a basi ka bɛ? 4Jaab a kan tali alege ni ale maa bo ka baai ate ba yik la po ale chivie, yaase ni lo gum baai ate ba ko la po, alege kude meena wa suipuurumu an diem basi ya wa nisaŋa a diem zak ka wen.

5<<Assiria demma, ku ale toa a te ni dii nyiŋla, ka nama ate m pai a namsi baai ate m suinni a puuri ale ba la. 6Mi tom Assiria demma ate ba ga yik tɛŋ kpieŋ dem baai ale kan seba Naawen la kama. Mi basi ba kama ate ba ga yik nuru baai ale nye a te mi sui a puuri la kama. Mi tom ba kama ayen ba ga zu abe ba vari ba ŋantaŋa, abe ba tabi ba zuk a taam ase suik po tanta la. 7Alege daa wa ale yaali ayen wa nye diila ale la, daa wa ale ta dii wa popola po la ale la. Wa a yaali kama ayen wa kaasi ate tɛŋsa yegayega a jam kpeglimka jigi. 8Wa weeni kama ayen, <baai meena ale chim mi tugurik tɔŋdɔma kpaŋŋa meena daa nalima?> 9Kalno an nye ase ka Karchemis la? Ate Yamat a nye ase Arpad la? Ate Samaria a nye ase Damasikus la? 10Tɛŋ sii bɔgta ale gaam Jerusalem ale Samaria bɔgtaŋa la, m nisaŋa pagrimu a nya nakdeka ba zuk kama. 11Ase m le nye Samaria ale wa bɔgtaŋa diila, m kan nye Jerusalem ale wa bɔgtaŋa dila?>>

12Ase Nyɔnɔwa a dan nueri dii ate wa pai ta chaab ale Zayon Guuku ale Jerusalem la, wa yaa le weeni ayen, <<Mi ale namsi Assiria naawa, wa kanjantaŋa ate wa ta wa suinummu po la, ale wa kayerinni nyaasimu wa ninaŋa po. 13Dii nyiŋla, wa weeni kama ayen, <<Mi dek nisa pagrim ate m pai a nye kude ale m dek yam, dii nyiŋla m le baga a miŋ wie kiri la nyiŋ. Mi a yeeri tɛŋ kpieŋsa bana ale kɔlim ba tuilum ŋanta. Ase pagrɔ la m nya pagrim ba nalimaŋa zuk. 14Ase nuim ale a jo tuk po diila, dila wa mɛ ate mi nisaŋa paari tɛŋ kpieŋsa a tuesi ba jigsika ate ba ta la. Ase nuruba nyiem ale tigsi jena ŋaai ate ba zɛri ŋa la, dila wa mɛ ate mi a tigsi tɛŋsa a ta si a jam jigi yeŋ. Bunyi an poom baga a fuk bu kinkaŋni yaase bu lak bu nɔi a kum.>>

15Liak ale baga a zak ka dek a gaam waai ale a zak ka la? Yaase gebik nyina a kuulim ale waai ale pai ka a tom la? Nna se tachek an poom yik waai ale a zak ka la, yaase doari a baga a yulum waai ale kan daa diok la! 16Dila nyiŋla, Nyɔnɔwa, Naawen Dii Ale A Dɛ Tugurik Tɔŋdɔma Niŋ La ale basi ate nyiŋtuila a jam ba tugurik tɔŋdɔma zuk. Wa ale za wa pai jabuui a lɔnsi ba po la ale chɔgsi ase ka bolim ŋiak la a dɛ ba. 17Naawen dii ale ka Izirali bolim buui ale nyaksi la ale chim ka bolim buui ale za bu a dɛ. Waai ale Welema a bo Izirali la ale nye ase ka bolim ŋiak. Wa ale pa ka dai yeŋ a ju wa muŋsaŋa ale muŋkangɔtisaŋa meena. 18Wa gɔnni nalimu ale laŋ sii ale ta poosuk la ale kaasi meena, ase yɔgnyieŋ ale kpeeri a bɛ diila. 19Ate wa ti sii ale tali gɔnni po la ale soa ka nna fii fiiga ate biik ale poom a ŋmarisi dueni.

20Dai dila danni Izirali dem baai ale tali la, Jekob dɔkdem baai ale vuuk la, a kan ŋman pai ba yiila a nyo waai ale jam a kaasi wa la po, alege ba ale ta siaka ale ka Naawen, Waai ale Welema a bo Izirali la. 21Nuru baai maga ale vuuk la ale pilim ŋmani, Jekob nuru baai maga ale vuuk la ale pilim ŋmani Wen Tanjaŋini jigi. 22Izirali nuruma a dan poom piisi ase tintain busuŋku ale bo nyakpiemu nɔi la, ku ale chim ka nuruba maga ale za ba ŋman pilim jam. Kaasuŋ a gomsi kama dua ale diirika ale nyemagsika. 23Nyɔnɔwa, Naawen Dii Ale A Dɛ Tugurik Tɔŋdɔma Niŋ La ale za wa basi ate kaasuŋku a paari tɛŋka meena.

24Dila nyiŋ, Nyɔnɔwa, Naawen Dii Ale A Dɛ Tugurik Tɔŋdɔma Niŋ La ale weeni diila ale nna, <<Mi nuruma baai ale bo Zayon la, ni kan chali Assiria demma yɔgsummoa, baai ale a nak ni ale tachek ale zak doari a ta chaab ale ni ase Ejipiti ale jam a nye ni diila. 25Ku a kan beni, m kan ŋman ta suipuurum ale ni, m suinni a yaa ale bo ale ka bala ate m za m kaasi ba.>>

26Naawen Dii Ale A Dɛ Tugurik Tɔŋdɔma Niŋ La ale miiri ba kama ale fiŋ ase wa ale jam nak Midian ale bo Oreb piuŋku zuk la. Ate wa ale zak wa tachekka nyaataŋa zuk ase wa ale jam nye dii Ejipiti po la. 27Da dila danni, ba jiptaŋa ale zak ni ŋmankpalaŋa zuk, ba niiga diokku ni ŋieŋa zuk. Niiga diokku ale wɛ dii nyiŋla ni biigi kama.

28Ba jo Aiat tɛŋka po. Ba jam va Migron tɛŋka po a taam, a yaa pai ba ŋantaŋa a dueni Mikmas tɛŋka po. 29Ba va ka guutaŋa zuk a taam, ale a weeni ayen, <<Ti ale bo ka Geba yokku de.>> Ate Arama demma kpaziita a yaa a nak. Gibea ale ka Sɔɔl tɛŋ dem la a yiti chali. 30Gallim liewa abe kaari ate kaarika a chim kaamka a te Laisa. Anatot demma ka niniga! 31Madmena demma a yiti chali bɛ kama ate Gebim demma mɛ a chali suk. 32Danni de po ba ale bo ka Nob tɛŋka po. Ba ale gurum ka ba nisa a basi Zayon nuruma ale bo Jerusalem guuku zuk la.

33Ni nya, Nyɔnɔwa, Naawen Dii Ale A Dɛ Tugurik Tɔŋdɔma Niŋ La ale gebi naŋ kpieŋsaŋa ale wa pagrim kpiemu. Ti sii ale wɔŋa nna yegayega la wa ale che lɔnsi, ate wa ale basi ate sii ale wɔŋa mɛ la a siŋ tɛŋ. 34Wa ale che gɔnni tikima ale liak a lɔnsi. Lebanon ale ti kpieŋsaŋa ale lo.

Currently Selected:

Azaya 10: BWU

Highlight

Copy