Azaya 60

1<<Yiti, a nyaksi ale fi bolimu a jam kama ate Naawen zulaŋa a yiti bo fi zuk. 2Nya, legi ale lik tɛŋzuk de, ate leg kpienni a bo nuruma zuk, alege Naawen a yiti bo fi zuk, ate wa zulaŋa a jam fi zuk. 3Tɛŋ kpieŋsa ale jam fi bolimu jigi, ate nalima ale nya fi saluiku nyaksika a jam.

4<<Lak fi ninaŋa a nya gilim fidek. Ba meena a tigsi kama a jam fi jigi. Fi nidoabilisaŋa a nyini ka niŋniŋ, ate ba pai fi liema ale nisima. 5Ate fi ale zak nya ate fi ale nyaksi, ate fi suinummu ale nya masim. Nyakpientaŋa jigsika ba ale ta jam a te fu. Tɛŋ kpieŋsaŋa jigsika ale jam fi jigi. 6Laalaakomi boari ale taari lik fi tɛŋka, Midian ale Efa laalaakomi paalisa. Ate baai meena ale bo Siiba jam a ta ligmɔniŋ ale ŋan baai nyum ale masa la a jam a mooli Naawen pimpaukku. 7Kedar piisaŋa meena ale tigsi a jam fi jigi, ate Nebaiot padaasaŋa ale tom a te fu. M le tuesi ŋa ase tiirita la m kuŋkuŋku zuk, abe m gomsi m zula yenni.

8<<Bade ka bana a yiri ase chiŋmaaŋa la ale a nye ase nangbaŋsa ale a cheŋ si tukta po la? 9Chekki tɛŋ sii ate nyiam a gilim si la a nya ka mi. Tarsis ŋaaruŋtaŋa a de ka niŋ, a ta fi nidoabilisaŋa ale bo niŋ la a cheena ale ba kpana ale ba ligmɔniŋ ate ku a te Naawen fi Wenni zula, Waai Ale Welema A Bo Izirali la, diila wa pai ka nalim a basi fi nyiŋ.

10<<Nicham ale ŋman sɛ fi parisaŋa, ate ba nalimaŋa ale tom a te fu. Ku jam va ka suipuurum nyiŋ ate m nak fu, m ŋmanteka nyiŋ m le sak jiirim ale fu. 11Fi nansuiŋtaŋa ale kasim a lak za, ba kan lik ti kantueŋ yaase yowa, ate nuru a baga a ta tɛŋsaŋa paaruŋku a jam te fu, ate ba nalimaŋa ale tom chaab ale nak dɛka. 12Ate tɛŋ kpieŋ kaai yaase naam buui ale kan tom a te fu la ale kpi. Tɛŋka ale kaasi meena.

13Lebanon zulaŋa ale jam fi jigi, dapeelita ale kinkaŋ peruk ale damɔnta ale gum chaab a gomsi juijui ate m boro la. Ate m le nye ate m naŋsaŋa jigini a nya zula. 14Fi namsidɔma nidoabilisaŋa ale jam kpi duna fi niŋ. Baai ale kan pai fu a chim nuru la meena ale kpi duna fi naŋtaata po, ate ba ale wi fu ayen Naawen Tɛŋ Nummu, Waai Ale Welema A Bo Izirali la Zionwa.

15<<Ba zɛri fu kama ale ŋman kisi fu ate waai a kan va fi tɛŋka po a taamu. M le nye ate fi kanjantaŋa a boro taam wuu, abe masim a boro a te gaŋsa meena. 16Fi le nyu tɛŋ kpieŋsa biisim, abe fi ŋoosi naab yeri po. Ate fi yaa le seba ayen mi Naawen m ka fi Varibasidɔ ale fi Da Tuesirɔ Waai Ale Ka Jekob Pagrim Nyɔnɔwa La. 17Ku le magsi ku chim kutuk mɔnuŋ la m le te fu ligmɔniŋ. Ku le magsi ku chim kutuk la m le te fu kpana. Ku le magsi ku chim diok la m le te fu kutuk mɔnuŋ, abe m pai kutuk a tagri tana. Ate m le nye ate suiyɔgni a chim fi kpagi ate wayɔrisima a chim fi niŋdeerɔ.

18Ba kan ŋman wom wɔkwɔk ni tɛŋka po, yaase kaasuŋ mɛ la a bo ni banaŋa po, alege ni ale wi ni parisaŋa ayen Varibasika abe ni wi ni nansuiŋtaŋa ayen Pimpauk. 19Wenbinni a kan ŋman chim ni bolim kantueŋ po, yaase chiika nyaksika a bo ni zuwa, diila Naawen ale chim ka ni taam wuu bolim, abe ni Wenni a chim ni zula. 20Ni wenbinni a kan siŋ nya, ni chiika a kan ŋman bugi. Naawen ale chim ni taam wuu bolim, ate ni niniga daaŋa ale kpeglim.

21Ate ni nuruma meena ale chim wayɔrisima nyam, ate ba ale jam soa tɛŋka taam wuu. Bala ale ŋanbulaŋa ate mi a vuk, ba ka mi nisima tuima, diila ba a sakka m nalimu. 22Baai ale fiisa ni po la ale chim tusidi, ate baai ale pɔsima la ale chim tɛŋ kpieŋ. Ka Mi ale Naawen. Ku danni po m le nye kude nwuli.

Currently Selected:

Azaya 60: BWU

Highlight

Compare

Copy