Azaya 59

1Chekki Naawen nisa an gela ayen si an baga vari a basi, yaase wa tueŋa a kpari ayen wa kan wom. 2Alege ka ni biemu ale gaari ni ale ni Wenni. Ni wabaataŋa a nye kama ate wa suk wa nimbidiaka a nyini ni jigi, ate wa kan wom ni. 3Dii nyiŋla ni nisaŋa a tiri ka ziim ate bu kan sugri a nyini, ate ni nandubsaŋa a nye kaasi. Ni nɔngbanvaataŋa a biisi ka venta, ate ni giŋgeluŋtaŋa a lerigi gaasa wie.

4Waai karo a biisi a wi nyemagsika wie. Waai a karo a yaali wensie. Ba pai ba sebchakka a basi ka nanpaga kɔta ale venta biisa po. Ba yik ka daanika puuk a yaa biak biem. 5Ba a wɔgri ka waapiisa jena ale a yɔk nari batta. Waai a dan ŋɔbi ŋa jenaŋa wa a kpi kama, ate jenni dinyi a dan mobi, di a wɔgri ka waapiik. 6Ba naribattaŋa a ka kiri ya ayen fi pai a nye gatta. Ba an baga a pai jabuui ate badek a nye la a lik ba dega. Ba tuimaŋa ka biem tuima, ate wɔkwɔk tuima a bo ba nisa po. 7Ba a cheŋ ka nna nwuli a ga a nye wabiok. Ba yeenti kama ale nuru baai ale kan nye wari a kaasi la kɔka. Ba popolaŋa ka popola baata. Juijui meena ate ba a cheŋ la kaasuŋ a sak ba suitaŋa. 8Ba zɛ suiyɔgni suiku. Nyemagsika a ka ba suitaŋa po. Ba labri ti kama ate ti chim suik goliŋta. Waai karo a va ti po a seba suiyɔgni.

9Dila nyiŋ nyemagsika wie a yalima ale ti kama, ate wayɔrisima a kan paari ti. Ti a gisi ka bolim, alege ka legi nyiini ale gilim ti. Ti a yaali kama ayen ku peela a te ti, alege ti a cheŋ ka yisuŋ kpienta po. 10Ase yioba la, ti a ta kama a gilim parika, a bo suiku po a nye ase nuru baai ale kan ta nina la. Kantueŋ ti a cheŋ a nak ka naŋsa ase tɛŋ sob paalik la. Baai ale pagra la suŋsuŋ ti a nye ase ka kpieba la. 11Ti meena a ŋuuni ase ka piina la. Ti a kum kama se nangbaŋsa la. Ti a gisi ka nyemagsika, alege ti an nya ya. Ti a yaali ka varibasika alege ka a yalima ale ti.

12Dii nyiŋla ti kaasuŋku a piisi kama fi nina po, ate ti wabaataŋa a sum a sak ti le ka diila. Ti nye kaasuŋku a kasim bo ale ti kama, ate ti miŋ ti biemu. 13Ti nye ka tukpari ale zɛri Naawen ale cheem ti ŋaaŋsa a te ti Wenni ale ta namsika ale wɔkwɔk ale a velim ti suiniimaŋa ale ta diila.

14Ate nyemagsika a forisi ga ŋaaŋ, ate wayɔrisima a za nna niŋniŋa, ate wensie a nak naŋ suitaŋa po, ate wensie nyeka an baga a jɔ. 15Jigi a karo ate wensie a boro, ate waai ale a yeeri wa nina a nyini biem po la a chim ka waai ate ba a gisi ayen ba ko ŋɔbi. Naawen a nya kama ate ku daani wa nyemagsika ale kan boro la nyiŋ. 16Wa nya kama ayen waai karo, ku jam a cha wa kama ayen waai karo a jo wanni po. Ate wadek nisaŋa a tom varibasika tuima a te wa, ate wadek wayɔrisimaŋa a maari wa.

17Wa pai ka wayɔrisima a jo ase kuusidi jaligim la ale varibasika ase zukchin la a vuk. Wa pai ka kpaliŋ tunika garuk a jo ale pob wadek ale ninmuna ase tankaluŋ la a yi. 18Ba ale tuesi tutuna a magsi chaab ale dii ate ba nye la. Suipuurum ale cheŋ wa dachaasaŋa zuk ale namsi kaai ale magsi ayen ku jam wa dachaasaŋa jigi la. Wa ale ŋman tuni tɛŋ sii ate nyiam a gilim ba dii ale a magsi ba la. 19Nuruba ale chali Naawen yuenni a nyini yeniŋ, a nyini wenbinni pusika jigini ba le mariŋ wa zulaŋa. Diila wa ale jam ase ka nyiam ale mobi a jueli diila ate Naawen vuusumu a ta bu a cheŋ la.

20Naawen a weeni ayen, <<Da Tuesirɔwa ale jam Zayon, baai ale bo Jekob po a tagri a nyini ba wabaata po la.>>

21Naawen a weeni kama ayen, <<Mi jigi togni, nye kude ale mi nɔiyeŋka ate m ta ale ba. M chiika ale bo fi zuk la, ate m wieŋa ate m pai nyo fi nɔnni po la, a kan nyini fi nɔnni po a nyini, yaase fi bisaŋa nɔi po, a nyini, yaase ba ŋaaŋbisaŋa nɔi po a zaani yɔgyɔgla de a taa cheŋ.>> Naawen ale weeni.

Currently Selected:

Azaya 59: BWU

Highlight

Compare

Copy