Azaya 61

1Nyɔnɔwa Naawen Chiika a bo ale mu kama, dii nyiŋla, wa lueri mu kama ayen m pai Naawen wapaalaŋa a sak baai ale ka ŋanjaksa la. Wa tom mu mɛ kama ayen m ga tebi baai suiniima ale kaasi la, abe m mooli fasiyaa wie a te baai ate ba yik la abe m yeeri ligrɔba legi po a basi. 2Abe m mooli Naawen benni ŋmanteka ale ti Wenni tutunaŋa danni, a yɔk baai ale a kum la sue, 3abe baai ale bo Zayon a kum la, wa le te ba ŋan baai ate ba a yaali la. Abe m pai nalim naam zutɔk a vuk ba alege daa buntuemmoa, suipeentik kpaam alege daa kumsa, ale pimpauk garuk alege daa sui kaasuŋ chiiga. Ba le wi ba ayen wayɔrisima dapagrisa tiisa, ate Naawen a vuk ayen wa sak wa nalimu.

4Ba le ŋman pilim sɛ yie ŋaai ale kaasi la, abe ba ŋman gomsi kab tii ale kaasi la. Ba ale nye ate tɛŋ ninaŋa ale kaasi a paari gaŋsa dii choa la a ŋman paala. 5Nicham ale nya ni duŋ buulimu zuk. Ba ale tom ni laŋsaŋa ale ni kaduksaŋa po. 6Ate ba ale wi ni ayen Naawen kaabteerɔba, ba le wi ni ayen ti Wenni tuimtomdɔba. Ni ale dɛ tɛŋ kpieŋsaŋa jigsika masim, ate ba jigsika po ate ni ale nak kuusidi. 7Mi nuruma ale ta ba nitalimu a paarika naŋtuok nɔi buye, alege daa chivie. Ba ale dɛ ba nitalimu nyiŋ masim, alege daa chivie. Ate ba ale ta nitalim naŋtuok nɔi buye ba tɛŋka po. Ate ba ale soa masim buui ale boro taam wuu la.

8<<Dila mi, Naawen, a yaali ka nyemagsika. Mi kisi varuk ale biem kama. M wensieŋa nyiŋ m le tuni ba, abe m nye taam wuu nɔiyeŋ ale ba. 9Ba le seba ba ŋaaŋbisaŋa tɛŋ kpieŋsaŋa po ale ba bisaŋa nuruba suŋsuŋ. Baai meena ale a nya ba la ale miŋ ayen ba ka nuru baai ate Naawen a niak la.>>

10Mi sui a peenti ka nna yegayega ale Naawen. M chiika a dɛ ka masim ale m Wenni. Diila wa pai ka varibasika gatta a jɔ mu ale gomsi mu ale wayɔrisima garuk woŋ, ase duerɔ ale gomsi wa zuk ase kaabteerɔ la ale ŋman nye ase pok fiak ale gomsi wadek ale ŋiri chɔrima la. 11Dila ase tɛŋka ale a nye ate ŋanta a na a pusi la, ate kaduk a nye ate ŋanbie a nyini a chim la, dila ate Nyɔnɔwa Naawen ale nye ate wayɔrisima ale pimpauk a nyini tɛŋ kpieŋsa meena po.

Currently Selected:

Azaya 61: BWU

Highlight

Compare

Copy