Azaya 54

1<<Nipok kirigaa, lenni yiili, fi waai ale kan biak biik nya la. Fɔb yiili mobi, nuem a yaali mariŋka, fi waai ale kan dom puuk nya la, diila nipok waai ale kala a ka biik la, bisa a piisi gaam waai ale ta chorɔ la kama,>> ka Naawen ale weeni. 2<<Nye ate fi viuku jigini a zuak, nye ate fi viuku garuk palaŋa a lagri, kan yik a ta ga ŋaaŋŋa. Nye ate fi miisaŋa a wɔŋa, abe fi nye ate fi kpaasaŋa a pagra. 3Diila fi ale teeri cheŋ juga ale gala. Fi ŋaaŋbisaŋa ale tuesi tɛŋsa a kali si tɛŋ kottaŋa po.

4<<Kan chali yɔgsummoa. Chivie a kan yik fu. Kanpiinta a kan yik fu, fi a kan chim ja valiŋŋa. Fi ale baŋ fi paalimu po chivieŋa, fi kan ŋman teeri fi pukɔgini po niniŋŋa. 5Diila fi Nyeerɔwa ale fi chorɔ. Wa yuenni ale Naawen Dii Ale A Dɛ Tugurik Tɔŋdɔma Niŋ la, Waai Ale Welema Izirali po la ale fi Da Tuesirɔwa. Ba a wi wa ayen ka tɛŋzuk de meena Wen. 6Naawen ale ŋman wi fu ase nipok waai ate ba zɛri ate ku a daani wa chiika po la, nipok waai ale yali wa paalim po ate ba zɛri wa la, >> Ka fi Wenni ale weeni. 7<<Ku an beni ya ate mi a banti fu basi, alege jiirim nyiŋ m le ŋman ta fu a jam. 8Suipuurum nyiŋ ate mi jam suk m nimbidiaka a nyini fi jigi maga dega, alege ŋmanteka nyiŋ, m le ta jiirim ale fu,>> Ka Naawen fi Da Tuesirɔwa ale weeni.

9<<Mi jigi kude a nye ase ka Nowa daaŋa po la, ase mi ale jam pɛ ayen Nowa nyaataŋa a kan lik tɛŋzuk de ŋmana la. Dila yɔgyɔgla de mi pɛ kama ayen m sui a kan ŋman puuri ale fu, m be kan ŋman toariŋ fu diipo. 10Guutaŋa a dan poom a choa ate pinaŋa a voori, mi ŋmanteka a kan choa yaase m suiyɔgni nɔiyeŋka a yeeri,>> Ka Naawen dii ale ta jiirim ale fu la ale weeni.

11<<Tɛŋ kaai ate ku jo ka nyiŋla, ate ŋmoruk viok a kuri ka alege daa sui yɔkka la, m le pai tintain ŋmiŋmirita a sɛ fu, fi nyubini m pai tintain ŋaai ale a nye ase gunungoona la a dueni. 12M le pai tintain munta a nye voana a basi fi parisaŋa ŋmazuk abe chɔrima a bo fi tuataŋa noa, abe m pai tintain ŋaai ale ta dobrim la a taari fi parisaŋa meena. 13Naawen ale sak fi nidoabilisaŋa meena, ate fi bisaŋa suiyɔgni ale zuak nna yegayega. 14Wayɔrisima po fi ale zaani paari. Namsika ale yalima ale fu. Fi kan chali yɔgsum ale jaaboa. Yɔgsum ale nyini fi po a cheŋ. Bu kan jam a moata fu. 15Waai a dan ta chaab ale fu, daa mi ale nye ya. Waai ale a ta chaab ale fu la, wa le siak a te fu.

16<<Nya, ka mi ale waai ale nye choabiika la, waai ale fuk kaalaŋa ate ŋa toati bolim ŋiak, a nye kpaliŋ jaab a magsi tuini. Ku be ka mi ale nye kaasirɔwa ate wa a ta butimka a jam. 17Kpaliŋ jabuui ale a tu chaab ale fi la a kan baga nye fu wari ya, ate fi ale zɛri waai ale biisi a ŋma fu la. Naawen tomteerɔma nitalim ale la. Maarika de ate ba nya a nyini mi jigi,>> Ka Naawen ale weeni.

Currently Selected:

Azaya 54: BWU

Highlight

Compare

Copy