Azaya 55

1<<Jam, nama baai meena ate nyanyuila a ta la, ni jam nyiamu jigini, nama baai ale kan ta ligra la, ni jam a da abe ni dɛ! Ni jam da daam ale biisim, daa ligri ate ni pai a da yaase jaaboa. 2Ka boa ate ni pai ligra a kaasi jabuui ale kan daa ŋandiinta la zuk ale a nam jabuui ale kaa chak ni la zuwa? Wom, wom mi, a dɛ jabuui ale nala la, ate ni nya masim a nyini ŋandiin maŋsa po. 3Lak tue a wom a jam mi jigi. Wom mi, ate ni chiisaŋa a baga a boro. Mi ale nye nɔiyeŋ kaai ale kaa taam la ale ni, m ŋmanteka ate m sak ale Deevid la. 4Nya, m nye kama ate wa chim seerɔ a te nuruma, ate wa chim niŋdeerɔ ale kpagi nuruma zuk. 5Chekki ni ale wi tɛŋ sii ate ni zɛ la, ate tɛŋ sii ale kan seba ni la ale kpabi a wom ayen Naawen ni Wenni nyiŋ, Waai Ale Welema Izirali po la, diila wa te ni ka nalim.

6Gisi Naawen ale ni diem baga a nya wa. Wi wa ale wa diem moata ni. 7Te ate gaasa nyɔnɔwa a basi wa nyeka ate nuru bioku a basi wa popolaŋa. Te ate wa cheŋ Naawen ti Wenni jigi, wa le ta jiirim ale wa a vɔŋ te nna fasiyaa.

8<<Mi ale a poli diila daa ni ale a poli diila yaase ni suitaŋa ka mi suitaŋa,>> Ka Naawen ale weeni.

9<<Ase wenŋmazukku ale jueli a gaam tɛŋzuk de diila, dila mɛ ate m suitaŋa a jueli a gaam ni suitaŋa, ate m popolaŋa a gaam ni popolaŋa. 10Ase ŋmorukku ale ŋmoruk tanaŋa ale nyini wenzukku a siŋ ale kan ŋmani la, a kan zaŋti tɛŋzuk de a yɔgi ate ŋanta a pusi la, ate ŋa a nye bie a te bodɔwa ale ŋandiinta a te dɛɛrɔwa la, 11dila mɛ ate m wanni ale nyini mi nɔnni po a nyini. Di kan ŋman jam m jigi kinla, alege di le nye mi ale a yaali diila abe di tom dii ate m tom di la. 12Ni ale nyini peelim ale masim abe suiyɔgni a de ni niŋ. Guutaŋa ale pinaŋa ale lenni yiila ni niŋ, ate tiisaŋa meena ale bo kaduksaŋa po la ale nak si nisaŋa. 13Ku le magsi ku chim munsa la, ku le tagri chim ka dapeelita tiisa, ku le magsi ku chim muŋkangɔtisa la, ku le tagri chim ka puuta tiisa a nyini du. Kude ale ta ka yuei a jam te Naawen ate ku chim daana ŋaai ale ŋa boro taam wuu la, ŋaai ale kaa kaasi.>>

Currently Selected:

Azaya 55: BWU

Highlight

Compare

Copy