Azaya 53

1Ka wana ale ta siaka ale ti wanni? Naawen abe yeeri wa nisa a sak ka wana? 2Wa chim wa niŋ ase ka tiib buli la, ate bu naŋsaŋa a feri tɛŋ kosik po. Nalim yaase kpaŋta a jam ka wa jigi ayen ku nye ate ti nina a cheŋ wa jigi ya, jaab a ka wa jigi ayen ti yaali. 3Nuruba a jam valiŋ wa kama ale zɛri wa ate wa chim niniga nuru ale tu chaab ale ninam. Wa nye ase ka nuru waai ate nuruba a suk ba nina a nyini wa jigi. Ba jam valiŋ wa kama alege ate ti an pai wa a chim jaaboa.

4Wa sum pai ti nyiŋtuilaŋa ale ji ti niniŋŋa, alege ti nya se ka Wen ale namsi wa ale nak wa ale daani wa la. 5Alege ba chub wa ka ti nye kaasuŋku nyiŋ. Ba kaasi wa ka ti biemu nyiŋ. Ninam buui ale ta suiyɔgni a jam te ti la a siŋ ka wa zuk, ate wa mulaŋa nyiŋ, ti nya tebika.

6Ti meena a nye a se ka piisa la, a cheŋ bɛ. Ti wanyi meena a va ka wa suik. Ate Naawen a pai ti meena biemu a basi wa zuk. 7Ba jam daani wa kama ale ŋman namsi wa, alege wa an jam lak nɔi ya. Ba jam ta wa a cheŋ ase ka pabiik la ayen ba te tɔgridɔwa, ase posuk ale za pondɔwa niŋ la, wa jam nye ka chim, wa an jam a lak nɔi ya. 8Ba jam namsi wa kama ale bo wa buusa ale ta wa a cheŋ. Be ka wana ale wa biisi wa ŋaaŋbisa wari ya? Diila ba jam yeeri wa a nyini ŋanvuta tɛŋka po kama. Mi nuruma nye kaasuŋku nyiŋ ale soa ate ba ko wa. 9Ba jam gomsi ka gaasa nyam boosuk a te wa, ba jam a gu wa ka jigsirɔ vɔrup po, wa an jam a nye wari a kaasi ya, yaase nuruba be an jam wom venta wa nɔi po.

10Alege ku jam ka Naawen yaalika ayen wa ŋɔriŋ abe wa nye ate wa nam, Naawen nye wa nyuvunni ka foolaa tiirim, wa ale nya wa ŋaaŋbisaŋa abe wa daaŋa a wɔŋa, ate Naawen yaalika ale jigsi wa nisa po. 11Wa ninammu ŋaaŋnyiŋ, wa ale nya nyuvuri bolimu ate wa ale chak. Wa yam wie miŋka ale m tomteerɔma wayɔrisimaŋa nyiŋ ale ta vɔŋteka a jam nuru boari jigi, ate wa ale tuesi ba biemu. 12Dila nyiŋ, m le pai juijui ale zuak la a te wa, ate wa ale baai ale pagra la ale lab ŋan baai ate ba kɔlim a nyini kpaliŋka po la, dii nyiŋla wa kpiiri ka wa nyuvunni a te kum, ate ba maa chiini wa a gum nye kaasirɔma po. Diila wa tuesi nuru boari biem ale puusi a te nye kaasirɔba.

Currently Selected:

Azaya 53: BWU

Highlight

Compare

Copy