Azaya 51

1<<Wom mi, nama baai ale chali a vi wayɔrisima ale a gisi Naawen la. Ni nya piuŋ kuui ate ba gebi fu a nyini du la, ale tanaŋa ate ba mobi a yeeri fu la. 2Nya Abrayam, fi kowa ale Saara, baai ale biak fu la. Diipo ate mi a wi wa la, wa jam ka wanyi, ate mi a niak wa ale nye ate wa biak a piisi. 3Naawen ale nye ate Zayon sui a yɔk, abe wa pai wa jiirimu a nya wa jigi kaasuŋku meena zuk. Wa ale nye ate wa gɔnni a nye ase Eden la, ate wa tɛŋ koruta a nye nna se Naawen kaduk la. Masim ale suipeentik ale bo ale wa ale jiam teka ale yiila lennika.

4<<Mi nuruma ni wom mi. M tɛŋ kpieŋka, ni wom mu. Sinsaŋŋa ale nyini mi jigi a cheŋ. Mi nyemagsika ale chim bolim a te tɛŋ kpieŋsaŋa. 5Mi wayɔrisimaŋa a forisi a paari ka nna nwuli, ate m varibasika a bo suik, ate m nisa ale ta nyemagsika a jam tɛŋ kpieŋsaŋa po. Tɛŋ sii ate nyiamu a gilim la a zak nya mi abe ba limisi m nisaŋa ale yiila. 6Zak fi ninaŋa a nya wenŋmazukku, abe fi chuiri nya tɛŋzuk de. Wenŋmazukku ale muriŋ bɛ ase nyuisa la, ate tɛŋ zuk de ale kaasi ase garuk la, ate ka nuruma a kpi nna se nanjuŋsa la. Alege mi varibasika ale boro taam wuu, ate m wayɔrisimaŋa a kan nye wari a kpeeri.

7<<Nama baai ale seba dii ale nala la, ni wom mi ale nama nuru baai ale ta m sinsaga ni suiniima po la. Ni kaa chali nuruba toariŋka yaase ni yɔgsa ale ba lieta. 8Kpayari ale dɛ ba ase gatta la. Nanzuiri ale nɛ ba ase kɔbta la. Alege mi wayɔrisimaŋa ale boro taam wuu, ate m varibasika ale kasim boro a te gaŋ sii meena ale cheen la.>>

9Naawen nisaŋa a yiti ŋmai a pai pagrim a jo ase garuk la, yiti ase da ŋaai ale taam la, ase ŋiaka gaŋ sii ale jam boro la. Daa fi ale jam gebi Arayab nna bunabuna ale chub jachichimini la? 10Ku daa fi ale jam nye ate nyakpiemu a kpeeri la, a nye ate nyaliuŋtaŋa a kpeeri la, waai ale dueni suik nyakpiemu liuŋku po ayen baai ate ba da tuesi la a va du a taamu la? 11Naawen ale da tuesi baai a basi la ale ŋman pilim jam. Ba ale jo Zayon ale yiila lennika. Taam wuu masim ale chim naam zutɔk ba zuimaŋa zuk. Suipeentik ale masim ale paari ba ate sui kaasuŋ ale niniga ale cheŋ.

12<<Ka mi, poom ka mi ale waai ale a yɔk fi sui. Fi ka wana a chali nuru waai ale kaa boro taam wuu, ate wa chim nuru biiga, wa daa jaaboa alege wa ka wuuk, 13ate fi a baŋ Naawen fi Nyeerɔwa, waai ale lagri wenŋmazukku ale dueni tɛŋka nyubaŋa la, ate fi a kasim bo yɔgsum po daa meena ayen namsidɔwa suipuurumu nyiŋŋa, waai ate kaasuŋ a dɛ la? Namsidɔwa suipuurumu yaa bo ka bɛ? 14Baai ate ba lik la, ku kan beni ba ale lak ba a basi. Ba a kan kpi likka dɔkku po yaase ba a silim ŋandiinta. 15Dii nyiŋla mi ka Naawen fi Wenni, waai ale a choa nyakpiemu ate bu nya miisaŋa a wuuri la. Naawen Dii Ale A Dɛ Tugurik Tɔŋdɔma Niŋ La ale wa yuenni. 16Mi pai m wieŋa a nyo ka fi nɔnni po ale pai m nisa yisuŋku a lik fu. Mi waai ale nye ate wenzukku a boro ale dueni tɛŋka nyubaŋa ale waai ale weeni Zayon ayen, <Ni ka mi nuruba la.> >>

17Jerusalem, yiti, yiti! Zaani ŋmai fi nyuka nyini ka Naawen nisa po, wa suipuurum beerika, Fi waai ale nyu zunzunaŋa meena la, beerik kaai ale nye ate nuruba a cheŋ a ja la. 18Wa nidoabilisaŋa meena ate wa biak la, ba waai karo a cheŋ ale wa. Wa nidoabilisaŋa meena ate wa wuuk la, ba waai karo a yik wa nisa. 19Kaasuŋtaŋa de buyewa a jam ka fi zuk. Ka wana ale wa yɔk fi sui ya? Kpaliŋ a lo tɛŋka zuk a ta kaasuŋ ale kɔm ale gebik a jam. Ka wana ale wa yɔk fi suinni? 20Fi nidoabilisaŋa a cha ka vuusum. Ba doa ka suik duak meena po, ase ŋmiak ale yik kab diila. Naawen suipuurumu ale sueriba ale fi Wenni toariŋ ka.

21Be wom nya kude, fi waai ale a nam la, fi buk kama alege daa daam ate fi nyu. 22Fi Nyɔnɔwa Naawen, fi Wen dii ale a maari wa nuruma la weeni ayen, <<Nya, m pai beerik kaai ale bo fi nisa po a nye ate fi a ja la a nyini fi jigi kama. Fi a kan ŋman nyu a nyini m suipuurumu beerika po. 23Mi ale pai ka nyo ka baai ale a namsi fu la nisa po. Baai ale weeni fu ayen, <Lo tɛŋ ate ti cheŋ va fi zuk a taam. Nye fi ŋaaŋka ase tɛŋka la ale suik ate ti va a taam.>>

Currently Selected:

Azaya 51: BWU

Highlight

Compare

Copy