Azaya 52

1Zayon yiti, pai pagrim a jo fidek ase garuk la. Pai fi garuk naliŋsaŋa a jo. Jerusalem, tuilum tɛŋka. Baai ate ba an gebi ba yua la ale baai ale daŋ la a kan ŋman jo fi po. 2Jerusalem, kpaanti fi paasuku. Yiti zaani ŋmai, a kali naam zukpaglika zuk. Zayon liewa ate ba yik la. Yeeri fidek a nyini chɔrimaŋa ate ba pai a su fi ŋinni po la a basi.

3Naawen ale weeni diila ale nna: <<Ba an pai jaab a da fu, ba ka ligri a da tuesi fu.>> 4Nyɔnɔwa Naawen ale biisi diila ale nna, <<Piilimka mi nuruma a cheŋ ka Ejipiti ayen ba boro, ku ŋaaŋnyiŋ, Assiria a namsi ba.

5Naawen a weeni kama ayen, <<Yɔgyɔgla de ka boa ate mi ta dela?>> Naawen a weeni kama ayen, <<Ba pai m nuruma a ta cheŋ kama ale an tuni jaaboa, ate baai ale a nya ba zuk la, a nye ba a la. Ate daa meena ba kaasim ta m yuenni a biisi a kaasi. 6Dila nyiŋla mi nuruma ale seba m yuenni. Dila dai dila danni ba ale miŋ ayen ka mi ale ŋaam weeni ku. Mm, ku ka mi.>>

7Nya waai ale bo guutaŋa zuk a ta wamaŋsa a jam la naŋtaata ale nala soa dii ya. Waai ale a mooli suiyɔgni ale suipeentik wamaŋsa ale waai ale a mooli varibasika wie ale a weeni Zayon ayen, <<Fi Wenni a dɛ naam!>> 8Ni wom de, fi limisidɔma a lak ka ba luelutaŋa. Ba gum ka chaab a nuem ale masim. Ase Naawen a dan ŋman pilim jam Zayon. Badek nina ale nya ku. 9Ni gum chaab a lɔnsi masim yiila, nama Jerusalem ale chim guura la, diila Naawen a yɔk wa nuruma sue kama ale da Jerusalem a tuesi. 10Naawen ale dueni wa tuilum nisaŋa tɛŋ kpieŋsa meena niŋ, ate tɛŋzuk de kpeglimka meena ale nya ti Wenni varibasika.

11Basi dula, basi dula, cheŋ nyini dula jigini? Kan tiri jabuui ale daŋ la. Cheŋ nyini ku po ate fi nye cheri, nama baai ale a ji Naawen ŋantaŋa la. 12Alege fi kan yeenti a basi dula yaase fi nyiŋ a gɔgi. Diila Naawen ale de fi niŋ, Izirali Wenni ale cheŋ ale fu.

13Nya m tomteerɔwa ale tom ale yam. Ba ale zak wa a zaani ate wa ale bo ŋmai, ate wa le nya zak zaanika nna wenwen ya. 14Ase nuruba ale jam piisi a yɔgsa ale wa na nyinika la, ba jam kaasi wa nyiŋka kama ate wa kan nye ase nurubiik la, ate wa nyiŋka a kaasi gaam nurubiik miŋka. 15Dila nyiŋ wa abe le yarinti tɛŋsa nna yega, ate nalima ale mum ba noaŋa wa nyiŋ. Dila ba le kan weeni ba diila, ba le nya. Ba ale kan wom diila ba le miŋ di kiri.

Currently Selected:

Azaya 52: BWU

Highlight

Compare

Copy