Azaya 43

1Alege yɔgyɔgla de, Naawen ale weeni diila ale nna. Wa waai ale nye fi Jekob la. Wa waai ale nye fi Izirali la ayen, <<Kan chali yɔgsummoa, diila m da tuesi fu a basi kama. Mi ale wi fi yuenni. Ka mi ale soa fu. 2Fi dan va nyaataŋa po. M le bo ale fu. Fi abe daa va belaŋa po ŋa kan ji fu a ta cheŋ. Fi dan poom va bolim po, bu kan dɛ fu. Bolim ŋiaka a kan baga a chɔgsi fu. 3Dii nyiŋla Mi ale Naawen fi Wenni, Waai ale Welema Izirali po la, fi varibasidɔwa. M pai Ejipiti a te ka fi varibasika nyiŋ ale pai Kus ale Sɛba a tagri fu.

4Ni ale toalim ta dobrim ale zula mi nina po la, mi ale a yaali ni la nyiŋ, m le pai nidoaba a tagri ni, abe m pai nuruba a tagri ni nyuvooŋa. 5Ni kan chali yɔgsummoa, diila m bo ale ni kama. M le ta ni bisaŋa a nyini konni po, abe m tigsi ni a nyini yeniŋka. 6M le weeni wiilukku ayen, <Pai ba a te.> Abe weeni yeseoku ayen, <Kan peri a tara.> Ta m nidoabilisaŋa ale bo niŋ la ale m liema ale bo tɛŋka kpeglimka la a jam. 7Baai meena ale a wi mi yuenni la, baai ate m nye ba a magsi m zulaŋa la, baai ate m gomsi ale nye ba la.>>

8De baai ale ta nina alege yi la niŋ ale baai ale ta tue alege kan wom la niŋ. 9Tɛŋ kpieŋsaŋa meena ale tigsi la ate nuruma jam jigi yeŋ la, ka ba wana dek ale weeni nyakude ale weeni ti wakpaksa? Basi ate ba ta seerɔba a jam sak ayen ba nye magsi kama, ate nuru yonta a wom a weeni ayen, <<Ku ka wensie.>> 10Naawen a weeni kama ayen, <<Nama ka mi seerɔba ale m tomteerɔba, ayen ni seba abe ni ta siaka ale mi, abe ni miŋ ku kiri ayen ka mi ale wala. Wen a karo a bo mi niŋŋa yaase di choa mɛ la ale bo mi ŋaaŋŋa. 11Mi, poom ka Mi ale Naawen, mi tɔga varibasidɔ wa choa a ŋman karo a gum mi po. 12Mi pai sak kama ale vari basi ale mooli. Mi, daa wen chaŋŋa ale bo ale ni. Naawen a weeni kama ayen, <<Nama ka baai ale mi seerɔba ayen, mi ka Wen la. 13Mm, a nyini ŋiaka mi ale la. Waai karo a baga a vari a nyini mi nisa po. M dan nye wari, ka wana ale baga a yik di a labri?>>

14Naawen fi Da Tuesirɔwa, Waai ale Welema Izirali po la ayen, <<Fi nyiŋ m le tom ate ba cheŋ Babilon po, ate ba ale ta Kaldiya demma meena a siŋ tɛŋ ale ba ŋaaruŋtaŋa ate ba ta kanjantaŋa ti nyiŋla. 15Mi ale Naawen, fi Waai ale Welema la, Izirali Nyeerɔwa, fi Naawa.>>

16Naawen ale weeni diila ale nna. Wa waai ale jam nye suik nyakpiemu po ale suik nyapagrisaŋa po la. 17Wala ale waai ale jam yiak wusuma ale ŋa torokoba ale tugurik tommu ale maarɔba a gum ba po ate ba lɔ dula, an ŋman yiti ya ase zeuŋ bolim ale kpi la.#43:17 Nya fotowa, Nyinika 14:9. 18<<Ni baŋ wakpagsaŋa. Ni kan kali wie ŋaai ale nye taam la ŋaaŋŋa. 19Nya, m boro a nye ka wapaali. Yɔgyɔgla ku boro a yiti kama. Nama a poli a miŋ ku? M boro a nye ka suik gɔnni po ale beli naŋsa tɛŋ koroku po. 20Duŋ waarisa ale gɔi baasa ale viuta a zuli mi kama, dii nyiŋla m basi ate ka nyiam a bo gɔnni po, ale benaŋsa a bo tɛŋ koroku po, a te m nuruma ale baai ate m lueri la nyiam. 21Nuru baai ate mi a nye ba a te m dek la, ayen ba weeni m pimpaukku.

22<<Alege fi Jekob an wi mi. Fi Izirali an jiak fidek a te mi. 23Fi an ta piisa a jam nye juka tiirita a te mi, yaase fi nye kaabka a zuli mi, Mi an te ate ku chim jib a te fu ale ŋandiinta tiirita yaase m yaali ŋan baai juka nyum ale masa la a nyini fi jigi ate ku nye ate fi jiak ale mu. 24Fi an da ŋan baai juka nyum ale masa la a te mi, yaase fi nye kaabka ale duŋ kaai ale biigi la a te mi. Alege fi te ate ka fi wabaataŋa a chim jib a te mi ale te ate m jiak ale fi nye kaasuŋku.

25<<Mi, poom ka mi waai ale duisi fi kaasuŋku a basi m dek nyiŋla, m kan ŋman teeri fi wabaataŋa diipo meena. 26Teeri mu wakpagsaŋa. Te ate ti gum chaab a nak nampaga wanni zuk. Ŋmarisi fi ale kan seba dii nɔi po la a dueni. 27Fi ko waai ale dɛ niŋ la a nye ka biem. Fi nuru baai ale biisi a te fu la a zɛri mi nɔi kama. 28Dila nyiŋ fi nuru kpientaŋa ale bo fi yenni po la a bo chivie po, abe m gomsi Jekob a magsi kaasika, abe Izirali a chim ja laam.

Currently Selected:

Azaya 43: BWU

Highlight

Compare

Copy