Azaya 42

1<<M tomteerɔwa ale nna, waai ate mi a maari la, waai ate m lueri a ta popeentik ale wa la. M le pai m Chiika a basi wa zuk ate wa ale ta nyemagsika a jam tɛŋ kpieŋsaŋa po. 2Wa kan nuemu yaase wa kaari yaase wa lak wa lueluku suitaŋa po. 3Wobi dii ale koani la, wa kan kaasi di, ate boom buui ale kan nya a paari la, wa a kan kpimsi. Wensie po wa ale ta nyemagsika a jam. 4Ku kan daani wa suinum yaase wa jɔk nyiŋbiiri ate ku ga paari diipo ate wa le ta nyemagsika a jam tɛŋ zuk de la. Wa sinsaŋŋa po ate tɛŋ sii ate nyiam a gilim si la ba ale pai ba yiila a basi du.>>

5Dii ate Wen, Naawen a weeni la ale nna, wa waai ale nye wenŋmazukku ale nye ate ku lagri la, wa waai ale lak tɛŋzuk de la ale ŋan baai meena ale nyini ka po a nyini la, waai ale a te ka nuruma vuusum ale a te baai ale a cheŋ ka po la nyuvuri. 6<<Mi, Naawen, a wi fu kama wayɔrisima po. M le yik fi nisa. M le ta fu abe m nye ate fi chim nɔiyeŋ a te nuruma. Abe fi chim bolim a te baai ale kan daa Izirali dem la, 7abe m lak baai ale yi la nina, abe m lak baai ate ba lik la a basi abe m yeeri baai ale bo tɛŋ vie po a kala legi po la a basi.

8<<Ka Mi ale Naawen m yuenni ale la. M kan pai m zulaŋa a te waai ya yaase m pai m pimpaukku a te bɔgta. 9Nya wakpagsaŋa a poom boro a nye kama, wapaala ate mi a weeni. Alege ate ŋa nyini boro la ka mi ale mooli ŋa a te fu.>>

10Ni lenni yipaali a te Naawen. Wa pimpaukku a nyini tɛŋka kpeglimka. Nama baai ale a siŋ nyakpiemu tɛŋka la ale ŋan baai meena ale bo bu po la, nama tɛŋ sii ate nyiam a gilim si la ale baai meena ale bo bu po la. 11Basi ate gɔnni ale tɛŋsaŋa lak ba luelutaŋa. Basi ate baai ale bo Kedar la a dɛ masim. Basi ate nuru baai ale bo Sela la a lenni yiila ale masim. Basi ate ba nuem a nyini guutaŋa zuk. 12Basi ate ba te Naawen zula abe ba weeni wa pimpaukku tɛŋ sii ate nyiamu gilim si la. 13Naawen ale gɔk santiri ase nuru pagrik la. Ase nakdeerɔ la, wa nyiŋ ale zeenti a yaali kpaliŋ nyeka. Wa ale nye nuemka ate ka chim kpaliŋ kaarik, ate wa ale nya pagrim wa dachaasa zuk.

14<<M nye ka chim ate ku beni, m nye chim kama ale yik m dek a ga ŋaaŋ. Alege yɔgyɔgla de, m le kaari ase nipok ale boro a biak diila. M kaari kama a lak nɔi a vuusi a kpeeri. 15M le nye ate pinaŋa guutaŋa a chim kinla, abe m nye ate ba tiisaŋa ale ba wuutaŋa a kɔ. M le labri bela ate ŋa chim tɛŋsa abe m nye ate ba nyaataŋa a kpeeri. 16M le de yioba niŋ a ta ba va suik kuui ate ba poom zɛ la. Suik tii ate ba zɛ ti la m le gani ba. M le labri legi ate di chim bolim ba niŋ, abe jigi ŋaai ale zaksa la, m le nye ate ŋa saala. Wieŋa de ate mi za ayen m nye. M kan zɛri ba. 17Alege baai ale ta sebchakka ale bɔgta ale a weeni ŋanmɛɛnta ayen, <Ni ka ti wena la,> ale viriŋ a jɔ ka chivie po.

18<<Wom de, fi tuikpari nyɔnɔ. Nya de, fi yiewa abe fi nya! 19Ka wana ale yi alege ka mi tomteerɔwa? Ka wana tue ale kpari ya ase waai ate mi a tom la? Ka wana ale yi ase waai ale paari wadek a te mi la? Ka wana ale yi ase Naawen tomteerɔwa la? 20Fi nyaka ŋanta nna yegayega alege fi niŋ karo. Fi tueŋa a lak kama alege fi kan wom wari ya.>> 21Ku a peenti Naawen sui kama wa wayɔrisimaŋa nyiŋ ayen wa nye ate wa sinsaŋŋa a zuak abe ŋa ta zula. 22Alege nuruba ale nna ate ba vari ba ale ŋman zu ba. Ba tu ka gola a bari ba meena, yaase ba pai suk likka diina po. Ba ta ba cheŋ kama ate waai a karo a vari ba a basi. Ba chim ka baai ate ba ta nyini badek tɛŋ po a ta ba cheŋ jigi yoŋ ate waai a karo a weeni ayen, <<Ŋman ta ba cheŋ.>>

23Ka ni po wana ale a wom nya kude yaase wa kpesi a wom chum diipo? 24Ka wana ale pai Jekob a te ate ba zu ba, wana abe le basi ate ba kɔlim Izirali? Daa Naawen, waai ate ti tom kaasi wa la? Dii nyiŋla ba an va wa suitaŋa. Ba an wom wa sinsaŋŋa. 25Dila nyiŋ wa yaa kpiiri wa suipuurum buui ale a dɛ ase bolim la ale wɔkwɔk kpaliŋ a basi ba zuk. Bu lik ba ase ka bolim ŋiak la, alege ba an miŋ ku kiriya. Bu dɛ ba kama alege ba an pai a nyo ba suiniima po.

Currently Selected:

Azaya 42: BWU

Highlight

Compare

Copy