Azaya 44

1<<Alege yɔgyɔgla de wom, Jekob m tomteerɔ, Izirali waai ate m lueri la. 2Dii ate Naawen a weeni la ale nna. Wa waai ale nye fu la, waai ale nye fu fi mawa ponni po la. Wala ale waai ale wa maari fu. Kan chali yɔgsummoa Jekob m tomteerɔ, Jesurun, waai ate m lueri la. 3Ale mi ale kpiiri nyiam a nyo tɛŋ sii ate nyanyuila a ta la zuk, ale buboalisaŋa ale bo tɛŋ kosik zuk la po. M le basi ate m Chiika a jam fi bisaŋa zuk abe m niauŋku a bo fi ŋaaŋbisa zuk. 4Ba le chim ase wuuk ale a jueli diila, ase niak tiisa ale za buboalik nɔi la. 5Waai ale weeni ayen, <Ka Naawen ale soa mi.> Wa choa ale pai Jekob yuenni a te wadek ayen ba a wi wa. Wa choa ale diem a ŋmarisi wa nisa nyiŋ ayen, <Ka Naawen ale soa,> abe wa pai Izirali yuenni a te wadek.

6<<Dii ate Naawen a weeni la ale nna, Izirali Naawa ale ba Da Tuesirɔwa, Naawen Dii Ale A Dɛ Tugurik Tɔŋdɔma Niŋ la. Mi ale piilimka mi abe le kpeglimka. Dan kan daa mi, Wen di choa a karo. 7Ka wana ale a nye ase mi la? Basi ate wa mooli. Basi ate wa weeni a dueni mi niŋ, dii ale nye a nyini diipo ate m nye ŋiak nuruma la, ale dii ale diem za di jam la mm, basi ate wa ŋaam weeni dii ale di jam la. 8Kan te fi nyiŋ a gɔgi, be kan chali yɔgsummoa. Mi mooli kude ale ŋaam weeni ku wari ka dipo. Ni ka baai ale chim mi seerɔba. Wen di choa a boro a gum mi po? Aaya, Piuŋ ku choa a ŋman karo. Mi zɛ kunyi nɔi po.>>

9Baai meena ale a nye bɔgta la a ka kiriya, ate ba ale pai ba popola a dueni ŋan baai zuk la a ka kiriya. Baai ale biisi a te ba la a yi kama. Ba ale kan seba wari nɔi po la a te ba ka chivie. 10Ka wana ale a peesi wen ya, be ka wana ale a nye bɔgluwa, ku kan te wa nyuenta? 11Wa ale wa vaanchaama meena ale nya chivie. Peesirɔma a ka kiriya alege ka nuruba kama. Basi ate ba meena a jam ba zaana jigi. Ba ale siŋ tɛŋ ate kpazinagsuk ale chivie a yik ba.

12Choa biik a pai ka jaab a nyo bolim kaala po a tom. Wa a pai ka kutuk a nak a nye bɔgluk. Wa a nye ku ale ka wa nigiri. Wa sui nyiem puuri ate wa jɔk wa pagrimu. Wa kan nyu nyiamoa ate jianta a paari wa. 13Danagrɔwa a pai ka miik a magsi. Wa pai ka liaka a chiisi ale pai jaab a kpesi nya. Wa a peesi ku ase ka nuru la ku nalimu meena po, ate ku bo wa tangbanaŋa po. 14Wa che nyunyoŋta a lɔnsi, yaase dai dii dai wa pai damɔnta tiisa yaase tiib kpiensa. Wa basi ate bu maa bo tiisaŋa po a chim a bo gɔnni po, yaase wa vuk kinkaŋ peruk, ate ŋmorukku a nye ate ku a chim. 15Ka nuru ale pai ku a cheem bolim. Wa pai ku gela a cheem bolim a ŋuuŋ wadek ale pai ku mɛ a cheem bolim a sɛ boroborok. Alege pai ku a nye wen a kaab ku. Wa pai ku a nye bɔgluk a koori tɛŋ a te ku. 16Wa pai daataŋa geli a ju bolim. Ku zuk ate wa a dik ŋandiinta ale a sɛ wa lammu a ŋɔbi a chak. Wa nyiem ŋuuŋ wadek kama ale weeni ayen, <<M nya bolim a ŋuuŋ m dek.>> 17Tii ale tali la ate wa pai a nye wen ate di chim wa bɔgluk. Wa koori tɛŋ a te ale a puusi ku. Wa a puusi a te ale a weeni ayen, <<Vari mu a basi. Fi ale m wen.>>

18Ba zɛ jaaboa, ba kan miŋ wari kiri ya. Ba taari lik ba ninaŋa kama ate ba kan nya, ate ba popolaŋa a lik ate ba kan miŋ wari kiri ya. 19Waai karo a basi polika. Waai a ka yam wie miŋka yaase wa ta miŋka a weeni ayen, <<M pai ku gela a cheem bolim. M poom pai ku bolim kaalaŋa a sɛ boroborok ale pai ku a sɛ lam a ŋɔbi. M pai dii ale tali la a nye kisuk jaaboa? M koori tɛŋ a zuli dokoluwa? 20Wa a dɛ ka buntuem, ate suinum buui ale kaasi la a ta wa cheŋ be. Wa an baga a vari wadek a basi, yaase wa weeni ayen, <<Jaamu de ale bo m juga nisa po la daa venta?>>

21Jekob, teeri ŋantaŋa de, diila fi ka m tomteerɔ Izirali. Mi ale nye fu, fi ka m tomteerɔ. Izirali, m kan baŋ fu. 22M duisi fi nye kaasuŋku a basi ase ka chiŋmari la ale nye ate fi wabaataŋa a muriŋ bɛ ase saluik pik la. Ni pilim ŋman jam mi jigi dii nyiŋla m da tuesi ni a basi kama.

23Wenŋmazukku a yi masim yiila, diila ka Naawen ale nye nna. Tɛŋ zuk de a nye nuemka. Guutaŋa ale gɔnni ale tiisaŋa lɔnsi yiili mob, diila Naawen a da Jekob a tuesi kama. Wa a sak wa zulaŋa Izirali po kama.

24Naawen ale weeni diila ale nna: <<Fi Da Tuesirɔ waai ale nye fu fi mawa ponni po la. Mi ale Naawen dii ale nye jaab meena la. Waai ale lagri wenŋmazukku. Mi dek ale waai ale nye ate tɛŋka a teeri la. 25Waai ale nye ate venta biisiteerɔba an baga a nye ba ale a yaali diila ale nye ate chichirik wiirisa a chim betta, waai ale yiak yam nyam zamsika a basi ale labri ate ku a chim wie kayaata la. 26Waai ale a pai wa tomteerɔma wie a tom tuima, ate wa basi ate wa ale a tom baai la ale a weeni diila a sum a nye ale a weeni ayen, nuruba a ŋman jam kali Jerusalem tɛŋka po. Juda tɛŋsaŋa ale pilim ŋman sɛ, ate m le ŋman pai ba ŋan baai ale kaasi la a te ba. 27Waai ale weeni ayen nya liuŋku kpeeri la, ate m sum a nye ate fi buboalisaŋa a kpeeri. 28Waai ale weeni ayen Sairus ka m naapeerik ate m le nye dii meena ate m sui a peenti la. Wa ale weeni Jerusalem wie ayen, basi ate ka ŋman pilim a sɛ, abe wa weeni mi yenni wie ayen, basi ate ba ŋman dueni di nyubaŋa.>>

Currently Selected:

Azaya 44: BWU

Highlight

Compare

Copy