Azaya 27

1Dai dila danni, Naawen ale pai ka wa gebika ale wa nyinyigsaŋa ale gebik kaai ale zuak ale ta pagrim la, a namsi Jabuui ale a nye ase waab la, Jabuui ale a vili ase waab la. Wa le ko nyakpiemu po jachichimini.

2Dai dila danni, <<Ni pai kaduk kaai ale ta yɔna la a lenni yiili. 3Mi, Naawen, a nya ka zuk kama. M kasim a zaŋti ka kama. Mi a nya ka zuk yok ale kantueŋ, ate waai a kan baga a daani ka. 4Mi sui a kan puuri. Ka kpiluŋbaoŋ ale muŋsa nyiini a nin tu chaab ale mu. Mi le gɔk santiri a ta chaab ale ba kpaliŋ po. Mi ale ju ba bolim. 5Yaase m basi ate ba jam a suk mi jigi. Basi ate ba ta suiyɔgni ale mi. Mm, basi ate ba ta suiyɔgni ale mi.>>

6Daa a cheena Jekob ale feri naŋsa, Izirali ale pusi vaata a busum, a sueri tɛŋka meena ale yɔna.

7Naawen an namsi Izirali demma yegayega ase ba dachaasaŋa la, yaase ba jɔk nuruba yega. 8Wa pai ka kpaliŋ ale yik ta cheŋka a nye le ba, ale wa nyinyigsa nakka wa yiak ba ate ba nyini, ase dai dii dai ate kori vioku a fuk la. 9Kude nyiŋ, ate Jekob foolaawa ale duisi basi, ate dila ale sak ayen biem a ŋman ka wa jigi ya. Ase wa dan nak juka kuŋkuŋku tanaŋa a buksi, ate Asera zaŋŋa ale ŋan baai nyum ale masa la kuŋkuŋtaŋa an ŋman za. 10Tɛŋ kaai ale pagra la a doa ka koruk, a zɛri ba kalika jigini, a zɛri ase gɔi la. Dula ate naabisa a dɛ, dula ate si a duak, ale passi naŋsaŋa a zaani jassi. 11Ase bu naŋsaŋa a dan ko si nyiem wɛ a lo kama ate nipooba a jam a yaali a ga cheem bolim. Dii nyiŋla, nuruma de a kan miŋ biik kiriya. Ate ba Nyeerɔwa a ka jiirim ale ba, wa poom kan ŋmani a te ba.

12Dai dila danni, Naawen ale fɔbi a nyini Yufiretis Benni ale chali a taam la, ga paari Ejipiti Buboalika, ate nama Izirali demma ale tigsi wanyi wanyi. 13Ate da dila danni, damuniŋ kpieŋ ale peeri. Ate baai ale jam a kpi Assiria tɛŋka po la, ale baai ate ba ta cheŋ Ejipiti la ale jam puusi Naawen tuilum guuku zuk Jerusalem po.

Currently Selected:

Azaya 27: BWU

Highlight

Copy