Azaya 28

1Ku le toa a te wuuta puuta tulika, Ɛfraim danyuirisa kanjantaŋa, nalim buui ale a nyini la, wa zula nalimu, a doa viak poosuk zuk la, tɛŋ kala jigi baai kanjanta ate daam a basi ate ba siŋ tɛŋ la. 2Nya, Nyɔnɔwa a ta ka waai ale pagra. Nna ase ŋmoruk tana ale kaasuŋ viok la, nna ase ŋmoruk niuŋ ale a fɔbi la ale ŋmoruk kuui ale chuiri a chali la, wa le yuk ka ale pagrim a lɔnsi tɛŋ. 3Wuuta puuta tulika de, Ɛfraim danyuirisaŋa kanjantaŋa, ba le tabi ba ale naŋsa. 4Nalim buui ale nyini la, zula nalimu, a doa viak poosuku po la, ale nye ase ka kiŋkama ale muni a magsi gbesika diila, nuru a dan ga nya a gbesi nyo nisa po, wa a dɛ kama.

5Dai dila danni, Naawen Dii Ale A Dɛ Tugurik Tɔŋdɔma Niŋ La, ale chim ka zula naam zutɔk, wuuta puuta tulik kaai ale nala a te wa nuru baai ale tali la. 6Wa le ta nyemagsika popola a te waai ale a bo buusa la, abe wa te baai ale ka tugurik tɔŋdɔba a za nansuiŋku nɔi la pagrim.

7Ate daam a basi ate bade a ja, a basi mɛ ate ba cheŋ a bɛ. Daam a basi ate kaabteerɔba ale biisiteerɔba a ja ale basi ate ba a butim ale basi ate ba cheŋ a bɛ. Ba dan boro a nya wie ba a ja kama, ba dan boro a poli wie ba a nak ka naŋsa. 8Ŋan zaanitaŋa meena a lik ale ka chichiita ate jigi a karo an daŋ ya.

9<<Tin ka wana ate wa a yaali ayen wa sagi? Tin ka wana ate wa boro a sak wa wanni kiri ya? Wa a biisi a te ka bi sii ale gaari ŋoosika, ale baai ale gaari biisiri. 10Ku ale ka diila ale nna. Nye abe fi ŋman nye, nye abe fi ŋman nye, a nya ku zuk abe fi ŋman nya ku zuk, magadek de la, ale magadek dula.>>

11Ku yaa be nala, Wen ale pai bi chaŋ a biisi a te nuruma de, 12a te baai ate wa weeni ayen, <<Vuusumu jigini ale nna, basi ate baai ale jiak la a vuusi. Ate dela a chim vuusum jigi, alege ba kan wom.>> 13Dila nyiŋ Naawen wanni ale a te ba la ale chim ka nna: Nye abe fi ŋman nye, nye abe fi ŋman nye, a nya ku zuk abe fi ŋman nya ku zuk. Magadek de la, magadek dula. Dila ba yaa le ga lo ŋaaŋnyiŋ, a nya tuem a jo baruk po ate ba yik ba.

14Dila nyiŋla, ni wom Naawen wanni, nama baai ale nye nuruba a la, nama baai ale a nya Jerusalem nuruma zuk la. 15Ni a kuulim kama ayen, <<Ti nye ka nɔiyeŋ ale kum, ale nye nɔiyeŋ ale boosuku. Ate kaasuŋ a dan poom cheena, ku a kan paari ti. Dii nyiŋla, ti te ate ka venta a chim ti varibasika, ate venta wie a chim ti sukka jigi.>>

16Dila Nyɔnɔwa Naawen ale biisi diila ale nna, <<Nya mi dueni ka tintain Zayon po, chamsi nyaka tintain, tintain dii ale ta yuei ale magsi nyubini, waai ale ta siaka la sui a kan kaasi. 17Mi ale pai nyemagsika a chim magsika miik abe wayɔrisima a chim ja magsim. Ŋmoruk tana ale chuiri ni varibasika jigini a ta cheŋ ale ni ventaŋa nyama, ate nyiam ale mobi a sueri ni sukka jigini. 18Ni nɔiyeŋka ate ni nye ale kum la ale kaasi. Ni nɔiyeŋka ate ni nye ale boosuku la a kan ŋman boro. Ase kaasuŋ kuui ale a taam la a dan jam ku le nak ni a dueni. 19Ku a dan ga jam, ku a ta ni a taam kama. Dan poom ale saluita yaase danni po, yaase yok po, ku a ta ni a taam kama. Biika de kiri miŋka ale ta yɔgsum a jam ni jigi.>>

20Gaduokku a gela ka yegayega ate fi an baga a tienti fi dega, ate kuntuŋku a mɛta a kan pili fi nyiŋka meena. 21Naawen ale yiti ŋmai ase wa ale jam nye dii Perazim Guuku zuk la, Wadek ale yiti ase wa ale jam nye dii Gibeon Viaka po la ayen wa tom wa tuini la, wa tuin chaŋka, abe wa tom wa ale magsi ayen wa tom diila, wa tuin chaŋ kaai ale magsi wa tom la. 22Yɔgyɔgla de ni basi ni nye laka dan kan daa di ni chɔrimaŋa ale dobra. Ka Nyɔnɔwa Naawen Dii Ale A Dɛ Tugurik Tɔŋdɔma Niŋ La ale weeni mi kaasuŋku ate wa ta chaab ale tɛŋka meena la.

23Wom, abe fi wom m lueluku, kpesi a wom dii ate mi a weeni la. 24Ase kpaarɔ a dan kpa a magsi borik, wa kasim a kpa kama? Wa kasim a guti kama ale a labri tantaŋa? 25Wa a dan chalisi bu a magsi chaab wa kan bori ŋan baai nyum ale masa la bieŋa ale bie ŋaai nyum ale masa la? Wa kan bori daa ŋanbie kadukka po ale ŋan yona laŋka po? 26Wa Wenni ale dak wa abe wa sak wa suik maŋka.

27Ba kan pai laarik a fɔbi ŋan baai nyum ale masa la, yaase toroko wiiliba a tabi ŋan bie ŋaai nyum ale masa la. Ba a fɔbi ŋan baai nyum ale masa la ale ka doari ale ŋan bie ŋaai nyum ale masa la ale diok. 28Ku a fɛ ate ba num ŋan bie a nye maasa, dila waai a kan fɔbi ŋa taam wuu. Wa dan poom ta wa toroko wiilima a tabi ŋa zuk, wa wusumaŋa a kan num ŋa. 29Kude meena mɛ a nyini ka Naawen Dii Ale A De Tugurik Tɔŋdɔba Niŋ La jigi, dii ale kperi ale sakka ale zuak ale yam la.

Currently Selected:

Azaya 28: BWU

Highlight

Copy