Azaya 26

1Dai dila danni ba le yi yiini de Juda tɛŋka po ayen, ti ta ka tɛŋ pagrik. Wen a basi kama ate varibasika a chim ka parisa ale ka bimbima. 2Lak tuataŋa ate wayɔrisima tɛŋka a jo, tɛŋ kaai ale ta siaka la. 3Fi ale yik waai popola ale bo jigi yeŋ la ale suiyɔgni, dii nyiŋla wa ta sebchakka ale fu kama. 4Kasim ta sebchakka ale Naawen, diila Naawen, Naawen ka Piuŋ taam wuu. 5Wa nye ate kanjanta nyam a siŋ tɛŋ, ale kaasi ba tɛŋka. Wa palinti ka a magsi chaab ale tɛŋka a yuk ka a basi tantaŋa po. 6Naŋtaata ale tabi ka a lɔnsi, baai ate ba a namsi ba la naŋtaataŋa, ŋanjaksaŋa naŋtaataŋa.

7Gola a ka wayɔrisima nyɔnɔ suiku po. Fi Waai ale kan ta kaasuŋ la, a nye kama ate wayɔrisima nyɔnɔ suiku a nala. 8Wensie, Naawen yaa, ti ale a cheŋ fi buusa suiku po la, ti le limisi fu. Ti suiniimaŋa a yaali ka fi yuenni ale a yiti diila. 9Mi chiika a yeenti a yaali fu kama yok, ate m chiika a zeenti a yaali fu saluiku. Fi buusaŋa a dan jam tɛŋka zuk, nuruma ale bo ka po la a zamsi ka wayɔrisima. 10Niaka a dan poom jam gaasa nuruba jigi, ba kan zamsi wayɔrisima wie. Dan poom ka tɛŋ kaai ale nye a magsi la po ba ale diem a nye biem, ate ba poom a kan pa zula a te Naawen zuaka ale ka diila. 11Naawen yaa, fi nisaŋa a zak ka wen alege ba kan nya. Basi ate ba nya fi popola ale bo fi nuruma zuk diila ate chivie a yik ba. Basi ate fi ale tali bolim buui a magsi fi dachaasaŋa la a de ba.

12Naawen yaa, fi ale te ti suiyɔgni. Ti ale baga a nye dii meena la, ka fi ale tom a te ti. 13Naawen yaa, ti Wenni, kpaga yona a nya ti zuk a nya kama, alege ka fi yuenni nyiini ate tama a zuli. 14Ba yaa kpi kama, ba ŋman karo. Chiik sii ale cheŋ la an yiti ya. Fi namsi ba kama ale ta ba jam kaasuŋ jigi. Fi ko ba kama ate waai a kan teeri ba. 15Naawen yaa, fi nye kama ate tɛŋ kpieŋka a lagri. Fi ale sum nye ate ka lagri nna yegayega. Fi nya zula kama a te fidek. Fi nye kama ate tɛŋka banaŋa a lagri.

16Naawen yaa, ba jam fi jigi kama ale ba daanika. Ase fi ale dari ba tue la, ate ba waasi a puusi fu. 17Ase nipok ale ta lɔgi a dom ayen wa biak a kaari diila, dila ate tama a nye a bo fi niŋ, Naawen yaa. 18Ti jam ta ka puuk, ate ka a dom, alege ti biaka viok. Ti an ta varibasika a jam tɛŋka zuwa. Ti an biak nuruba a basi tɛŋka zuwa.

19Alege ni kpiema ale boro. Ba nyiŋsaŋa ale yiti. Nama baai ale bo tanta po la, ni yiti a nuem ale masim. Ni maglimu a nye ase ka saluik maglim la. Tɛŋka ale ŋman biak ka kpiema.

20Mi nuruma, ni cheŋ, a ga jo ni diinaŋa po, abe ni lik nidek a basi ni diinaŋa po. Ni suk nidek maga ate wa suipuurumu a taam. 21Nya, Naawen a nyini ka wa boka jigini a cheena ayen wa namsi nuru baai ale tom wabaata la. Tɛŋka ale dak baai ale suk a ko nuruba ka zuk la. Tɛŋka a kan ŋman suk baai ate ba ko ba la.

Currently Selected:

Azaya 26: BWU

Highlight

Copy