Azaya 25

1Naawen yaa, fi ale mi Wen. M le zak fu zaani abe m pak fi yuenni, dii nyiŋla fi va ka wensie maŋsa po a tom tuim kpien ŋaai ate fi gomsi ŋa a nyini dipo la. 2Fi nye kama ate tɛŋ kpieŋka a chim guuk, ate tɛŋ kaai ale pagra la a kaasi, nichamma pagrimu jigini tɛŋ a ŋman ka, ba kan ŋman sɛ ka. 3Dila nyiŋ nuru pagrisa ale zuli fu. Tɛŋ kpieŋ sii ale kan ta jiirim la ale zuli fu. 4Fi chim ka ŋanjaksa sukka jigi a chim sukka jigi a te waai ale a silim la wa daanika po, a chim kusuŋ a lik viok ale yɔgsum a lik kantueŋ. Diila baai ale kan ta jiirim la vuusumu a nye ase ka viok ale a fuk parik diila 5ale a nye ase tɛŋ kosik tuiluk la. Fi basi ate nicham baai ale a nye wɔkwɔk la a nye diki, ase chiŋmari yɔgsum ale a baliŋ tuiluk diila, dila baai ale kan ta jiirim la ale basi ba yiini.

6Guuku de zuk ate Naawen Dii Ale A Dɛ Tugurik Tɔŋdɔma Niŋ La a gomsi ŋan dii maŋsa tigi a te nuru meena, ale daam tigi a magsi baai ale pak la, lam maŋsa ale da maŋsa tigi. 7Guuku de zuk ate wa ale kaasi jabuui ale a lik nuruba meena la, garuk kuui ale a lik tɛŋsaŋa meena la. 8Wa ale nɛ kum ate bu a kan ŋman boro. Nyɔnɔwa Naawen ale duisi waai meena ninyaata a basi. Wa ale yeeri wa nuruma ale bo tɛŋka zuk la chivieŋa a basi. Ka Naawen ale biisi dila.

9Da dila danni ba ale weeni ayen, <Wensie ti Wenni ale la. Ti mariŋ wa kama ate wa vari ti a basi. Naawen ale nna, ti mariŋ wa kama. Ni basi ate ti dɛ masim abe ti sue a peenti ale wa varibasika.>>

10Naawen nisa ale bo guuku de zuk. Alege wa ale tabi Moab kama ase kinkaa ate ba tigsi ŋa tabi ŋa ate ŋa chim bibaam diila. 11Ba ale teeri ba nisa ku po, ase nyapuŋdoa ale a teeri nisa a de diila. Wen ale ta ba kanjantaŋa a siŋ tɛŋ ba ale ba nisaŋa kperika meena. 12Wa ale basi ate ni parik woŋsaŋa a lo a duak tɛŋ, wa le ta si siŋ dueni tɛŋ tantaŋa dek po.

Currently Selected:

Azaya 25: BWU

Highlight

Copy