Azaya 24

1Ni nya, Naawen a za wa te tɛŋzuk de a duak ka koruk abe wa kaasi ka. Wa ale kaasi jaab meena ale bo ka po la abe wa kati ka nuruma a waaŋ. 2Ku ale nye kaabteerɔ ka dila dekdega ase nuruma la, a nye kpagi ase tomteerɔ la, a nye nipok ase pɔkdɔklie la, a nye dateerɔ ase daarɔ la, a nye peemdɔ ase peemteerɔ la, a nye pamideerɔ ase pamiteerɔ la. 3Tɛŋka meena ale duak koruk, abe ba koaliŋ ka meena, ka Naawen ale biisi wanni de.

4Tɛŋzuk de a jak kama a kɔ, tɛŋka a jɔk ka pagrimu ale a kpi, baai ale ta zula la a nam kama. 5Tɛŋka nuruma a taŋ ka kama, ba nye ka tuikpari ale sinsaŋŋa, ale tom kaasi wieŋa, nɔiyeŋ kaai ale kan ta kpeglimka la ba kaasi ka. 6Dila nyiŋ kikaasa ale kaasi tɛŋka. Ka nuruma dek ale magsi ba siak ba kaasuŋku. Dila nyiŋ bolim ale dɛ tɛŋka demma ate maga dek a tali. 7Da paalika a kpieri kama ate tiisaŋa a kpi. Baai meena ale a de masim la a bo ka ŋuunika po. 8Kayaksaŋa masimu a nye diki, baai ale a dɛ masim la nuemka a basi ya, kpanuŋku masimu a nye chorr. 9Ba kan ŋman nak yiila a nyu daamoa. Daam toa kama a te bu nyuiriba. 10Tɛŋ kpieŋka a kaasi kama a doa koruk. Yeri meena nansuiŋ a lik kama. 11Ba a kum a yaali ka daam suitaŋa po. Masim meena a labri chim ka niniga. Masim a ŋman ka tɛŋka zuwa. 12Tɛŋ kpieŋka a kaasi kama, ba nak ka tuataŋa a kaasi ka nna bunabuna. 13Ku be le nye ka dila tɛŋka zuk ale tɛŋ kpieŋsa, ase ba le fɔbi kpaam tiib diila, yaase ba ale gbesi ŋanta ale tali ate ba a yiisi diila.

14Ba lak ba lueluta, ale a nuem ale masim. A nyini yeniŋka, ba weeni Naawen zuaka ale ka diila. 15Dila nyiŋ, a nyini konni po, ni pai zula a te Naawen. Ni zak Naawen yuenni a zaani, waai ale ka Izirali demma Wen la, a bo tɛŋ sii ate nyiam a gilim la. 16A nyini tɛŋka kpeglimka tama wom yiila lennika ayen, <<Zula a paari Waai ale ka Wayɔrisima Nyɔnɔ la.>> Alege mi a yaa weeni ayen, mi bɛ ya, mi bɛ ya. Ku le toa a te mu. Velimvendika a bobri ya. Velimvendika ale wa ventaŋa a bobri.>>

17Yɔgsum, ale goluk ale baruk ale a limisi ni tɛŋzuk demma. 18Waai ale za wa yiti a chali yɔgsum nyiŋla, ale lo ka goluk po. Waai ale za wa nyini golukku po a nyini la, baruk ale yik wa. Wenŋmazuk tuataŋa a lagri, ate tɛŋka nyubaŋa a choa. 19Tɛŋka a na lagri, tɛŋka gaari buye, tɛŋka a choa. 20Tɛŋka a ja kama ase danyuirik la, ka a zaŋ ase ka viok ale a fuk kusuŋ diila. Dila dobrim buui ale bo ka zuk la ale ka biemu ate ka yaa lo ka kan ŋman yiti.

21Dai dila danni, Naawen ale namsi pagritaŋa ale bo wenŋmazuk la ale nalimaŋa ale bo tɛŋzuk de la. 22Ba ale gum ba chaab ase ligrɔba ale bo likka dɔk po la. Wa le lik ba a namsi ba da boari. 23Chiika ale nye ŋoomaa ate chivie a yik wenbinni. Naawen Dii Ale A Dɛ Tugurik Tɔŋdɔma Niŋ La ale dɛ naam Zayon Guuku zuk ale Jerusalem po ale nisɔmma niŋ ale zula.

Currently Selected:

Azaya 24: BWU

Highlight

Copy