Azaya 11

1Naŋ buli ale pusi nyini Jese kinni po. A nyini wa tɛŋ naŋsaŋa po Naŋ ale yɔn yɔna. 2Naawen Chiika ale bo wa zuk. Chiik kaai ale a te yam ale miŋka ale sinsaga ale pagrim ale sebika ale Naawen yɔgsum chalika. 3Wa ale mariŋ Naawen yɔgsum chala. Wa kan bo buusa a va dii ate wa nya ale wa nina la, yaase dii ate wa wom ale wa tue la. 4Alege a ta nyini wayɔrisima po wa ale bo baai ale a silim ŋanta la buusa ale nyemagsika wa ale poli a magsi te tɛŋka ŋanjaksa. Wa ale pai wa nɔnni po tachekka a nak tɛŋka. Wa ale pai wa nɔngbanvaataŋa vuusumu a ko gaasa nyama. 5Wayɔrisima ale chim wa chiak gbain ate wensie a chim wa garuk pali a gilim wa chiaka.

6Piuk ale posuk ale bo ale chaab, ate yɔŋni ale buuk ale duak jigi yeŋ ale chaab, ate naabiik ale gbeŋli ale duŋsaŋa bisa ale bo ale chaab. Ate bi fiik ale nya ŋa zuk. 7Naab ale gɔi biak ale dɛ ale chaab, ba bisaŋa ale duak ale chaab, ate gbeŋli ale ŋɔbi wuuk ase naab la. 8Biluak ale diini jinkpaŋ vɔrup nɔi, ate bi fiik ale pai wa nisa a su waapiik duaka jigi. 9Ba a kan nye biemmoa yaase ba kaasi mi tuilum guuku zuwa, dii nyiŋla tɛŋka ale sueri ale ka Naawen sebika ase nyaata ale lik nyakpiemu diila.

10Dai dila danni Jese Ŋaaŋbiik ale zaani ase ka tikti a te nuruma, ate tɛŋsaŋa ale tigsi a jam wa jigi, ate wa vuusika jigini ale ta ka zula nna yegayega. 11Dai dila danni Nyɔnɔwa ale ŋman pilim a teeri wa a nye buye a tuesi wa nuru baai ale tali a bo Assiria ale Ejipiti ale Patros ale Kus ale Iilam ale Sinar ale Yamat ale tɛŋ sii meena ale bo nyakpiemu jigini la.

12Wa ale zak tikti a te tɛŋsaŋa, abe wa tigsi Izirali dem baai ate ba yik ta cheŋ tɛŋ yoŋsa la. Wa ale tigsi Juda dem baai ale waaŋ a bo tɛŋka meena la a ta jam jigi yeŋ. 13Ɛfraim nyunni ale bɛ, ate Juda dachaasaŋa kan ŋman boro. Ɛfraim a kan ŋman ta nyuri ale Juda, yaase Juda ale ŋman ta dachaani ale Ɛfraim. 14Ba ale gum chaab a siŋ cheŋ Filistia demma ale bo yeniŋ la po. Ba ale ŋman cheŋ nuru baai ale bo konni po la a nak ba a vari ba ŋantaŋa. Ba ale nak dɛ Edom ale Moab demma ate Ammon demma ale siak te ba. 15Naawen ale basi ate Ejipiti demma nyakpiemu vuuku a kpeeri. Wa ale yuk nisa ate va tuilik fuk va Benni zuk. Wa ale gebi di beli naŋsa si siyopɔi ate nuruba a su nuensa a baga a cheŋ taam. 16Suik duok ale boro ate wa nuru baai ale tali nyini Assiria tɛŋka cheena la a va, ase ku ale jam boro a te Izirali diipo ate ba jam nyini Ejipiti tɛŋka la.

Currently Selected:

Azaya 11: BWU

Highlight

Copy