Nyinika 20

1Ate Naawen yaa biisi wieŋa de meena, 2<<Mi ale Naawen dii ale ka ni Wen la, waai ale ta ni nyini Ejipiti a nyini yɔntidi tɛŋka po a nyini la.

3<<Kan ta wen yona a gum mi po.

4<<Kan nye bɔgluk ate ku a neesi jaab wenŋmazuk yaase tɛŋzuk yaase nyiam po a te fi dega. 5Kan koori tɛŋ a zuli ba yaase fi puusi ba, diila mi Naawen dii ale ka fi Wen la, ka nyuri Wen, a namsi bimbaansa ba koba biem nyiŋ a ta ga paari ba gaŋ sii ale a saari buta ale bunaansi la baai ale kisi mi la. 6Alege a sak ŋmanteka ale gaŋ sii ale saari tusidi a yaali mi ale ŋman ta m wieŋa la.

7<<Kan wi Naawen dii ale ka fi Wen la yuenni kinla, diila Naawen a kan basi waai ale a wi Wa yuenni kinla la.

8<<Kpesi Vuusum Danni abe fi basi ate di ta tuilum. 9Daa ŋayuebi pai tom fi tuimaŋa meena, 10alege daa ŋayopɔiwa danni ka Vuusum dai a te Naawen dii ale ka fi Wen la. Dai dila danni kan tom tuin yoŋŋoa. Fi dek kan tom yaase fi nidoabili yaase fi lie yaase tomteerɔ yaase dɔklie yaase niiga yaase nichaanɔ ale bo ale fu la. 11Diila ka daa ŋayuebi ate Naawen a pai nye wenzukku ale tɛŋka ale nyakpiemu ale ŋan baai ale bo bu po la, alege a vuusi daa ŋayopɔiwa danni. Dila nyiŋ Naawen yaa niak Vuusum danni ale basi ate di chim tuilum dai.

12<<A zuli fi ko ale fi ma ate fi goa tɛŋ kaai ate Naawen dii ale ka fi Wen la a pai a te fi la a benni.

13<<Kan ko nuru.

14<<Kan nye kaboŋŋa.

15<<Kan zu.

16<<Kan chim venta seerɔ a velim te fi vaanchoa.

17<<Kan ta kɔrisa ale fi vaanchoa yeri ya. Kan ta kɔrisa ale fi vaanchoa powa yaase wa tomteerɔ yaase wa dɔklie ale wa naab yaase wa boniŋa yaase jabuui ate fi vaanchoa a soa la.>>

18Nuruma ale wom nanpansaŋa ale nya nyaksika ale wom damuniŋka peeka ale nya guuku ale ta nyuisaŋa la, ba nyiŋsaŋa yaa gɔk ate yɔgsum a ta ba. Ba yaa wari za niŋ 19ale weeni Moosis ayen, <<Fidek a biisi a te ti, ate ti wom kan te Wen a biisi a te ti, kan daa di ti le kpi.>>

20Moosis yaa weeni nuruma ayen, <<Ni kan chali yɔgsum. Wen jam kama ayen wa nye ni nya, ate Wen yɔgsum a bo le ni ate ku kasi ni biem tomka.>>

21Nuruma a jam za ka niŋniŋŋa, ate Moosis a cheŋ legini po nna kpitɔ juijui ate Wen a boro la.

22Ate Naawen yaa weeni Moosis ayen, <<Weeni sak Izirali demma ayen. <Nidek nya kama ayen m biisi ale ni a nyini ka wenŋmazuk. 23Ni kan nye wena gela a gum mi po. Ni kan pai kpana yaase ligmɔniŋ a nye wena a te ni dega.

24<< <Ni pai tanta a nye kuŋkuŋ a kaab ni juka tiiritaŋa ale ni suiyɔgni tiiritaŋa ale ni piisaŋa ale ni booŋa ale ni niiŋa a te mi. Juijui meena ate mi a nye ate m yuenni a nya zula la, m le jam ni jigi a jam niak ni. 25Ni dan nye tana kuŋkuŋ a te mi, ni kan pai tana ŋaai ate ba a gomsi ŋa la a sɛ, diila ni ale taŋ ku kama ase ni a nin pai sɛka tana a sɛ ku. 26Abe ni kan jueli m kuŋkuŋku zuwa, dan kan daa di ba ale nya ni chaboala ku zuk.>

Currently Selected:

Nyinika 20: BWU

Highlight

Copy