Nyinika 21

1<<Sinsaŋŋa de ale a magsi fi pai dueni ba niŋ.

2<<Ase fi dan da Yiburu tomteerɔ, wa magsi wa tom te fu ka bena ŋayuebi. Alege bena ŋayopɔiwa po basi wa fasiyaa, wa kan tuni jaaboa. 3Ase wa dan jam ka wadek wa nyiini, ku a magsi ka wa ŋman cheŋ wadek wa nyiini. Alege wa dan ta ka nipok diipo ate wa jam la, nipowa a va wa cheŋ. 4Ase wa kpagni a dan faari nipok a te wa ate wa biak nidoa yaase lie a te wa, nipowa ale wa bisaŋa ka wa kpagni ale soa, ka nidoawa nyiini ale wa cheŋ fasiyaa.

5<<Alege ase tomteerɔwa a dan weeni ayen, <Mi a yaali m kpagni ale m powa ale bisaŋa, m kan yaali m cheŋ m dek nyiini fasiyaa,> 6ate wa kpagni a ta wa cheŋ boteerɔma jigi. Wa yaa ta wa a cheŋ tuoku ate ba yaa vuri wa tuiri. Wa yaa le kasim chim ka wa kpagni tomteerɔ wa boka po meena.

7<<Ase nuru a dan yik wa lie a da ase tomteerɔ la, wa kan boro fasiyaa ase nidoa tomteerɔba ale ka diila. 8Ase wa dan kan nye ate wa kpagni waai ale lueri wa a te wadek la sui a yɔk ya, ku a fɛ ate wa kowa a da tuesi wa. Wa ka suik a pai wa da a te nichamma, wa ale kan ŋman ta siaka ale wa la nyiŋŋa. 9Ase wa dan lueri wa a te wa biik, ku a fɛ ate wa te wa suik ase lie la. 10Ase wa dan faari nipok wa choa, ku a fɛ ate wa kan mini pok kpagni ŋandiinta ale kɔlima yaase wa kan goa ale wa. 11Ase wa dan kan te nipowa ŋantaŋa de butawa, nipowa a baga a cheŋ fasiyaa kama a kan tuni ligri ku nyiŋŋa.

12<<Ase waai a dan kpaliŋ a ko nuru, ku a fɛ ate ba ko wa mɛ. 13Alege wa dan kan potim seba ale nye ya, alege ka Wen ale basi ate ku nye wa chali cheŋ juijui ate mi ale dak la. 14Alege nuru a dan potim seba ale ko waai, ni ta wa a nyini m kuŋkuŋku zuk a nyini a ko wa.

15<<Nuru waai a dan nye kpaliŋ ale wa ko yaase wa ma, ku a fɛ ate ba ko wa.

16<<Nuru waai a dan zu nuru a da, yaase wa ta nuruwa ate ba yik wa, ku a fɛ ate ba ko wa.

17<<Nuru waai a dan ka te wa ko yaase wa ma, ku a fɛ ate ba ko wa.

18<<Ase nuruba a dan kpaliŋ chaab ate wanyi a zak tintain a yuk wanyi yaase wa gurum nisa alege ate wa an kpi ya alege a ta doa a yuak, 19nuru waai ale chubi la ba kan nye wa wari ya ase nwala a nin yiti boro a cheŋ ale wa tachekka, ku a fɛ ate nuru waai ale chubi la a tuni waai ale koani la, wa le nye ate wa nya nyiŋyɔgsa a paari.

20<<Ase nuru a dan nak wa yɔma waai ale ka nidoa yaase nipok la ale doari, ate yɔmawa a deri kpi dila nyiŋ, ku a fɛ ate ba te waai ale nye dila la namsika, 21alege ba kan dari wa turi ase yɔmawa a nin yiti da dila danni yaase ku daa ŋaye po a boro a cheŋ dii nyiŋla, ka wa ale soa yɔmawa.

22<<Ase nuruba a dan kpaliŋ a nak nipok puuk ate wa biak diipo ale kan magsi la alege a potim nya tuemoa, waai ale nye dila la ku a fɛ ate wa tuni nipowa chorɔwa ale a weeni diila ate buusa boka dɔkku a te suik. 23Alege wa dan nya tuem yega, ni ko wa, 24wa dan kaasi ka wa num, ni kaasi wa mɛ num, dan ka nyin ni voori wa mɛ nyin, be dan ka nisa ni gebi wa mɛ nisa ku be dan ka naŋ ate wa gebi ni gebi wa mɛ naŋka. 25Fi dan ju waai ba ju fi mɛ, fi dan koani waai ba koani fu, fi bɛ dan te waai tuem ba te fi mɛ tuem.

26<<Ase nuru a dan nak nidoa yaase nipok tomteerɔ num a kaasi, ku a fɛ ate wa basi ate tomteerɔwa a cheŋ fasiyaa wa nummu ate wa kpagni a kaasi la nyiŋ, 27Ase wa be a dan nak nidoa yaase nipok tomteerɔ nyin a voori, ku a fɛ ate wa basi ate tomteerɔwa a cheŋ fasiyaa wa le voori wa nyini la nyiŋ.

28<<Ase lalik a dan chub nidoa yaase nipok a ko, ku a fɛ ate ba yuk lalikka ale tintana a ko, ni kan ŋɔbi ka lammu. Alege waai ale soa lalikka la, ni kan nye wa wari ya. 29Alege lalikka a daa chub ate ba kaam ka nyɔnɔwa alege ate wa an yik ka, ate ka ko nidoa yaase nipok, ku a fɛ ate ba yuk lalikka ale ka nyɔnɔwa a ko. 30Alege ku dan magsi wa tunika, wa baga tuni dii ale magsi la kama a vari wa nyuvunni a basi. 31Sinsaŋŋa de dek ale a tom tuima ase lalik a nin chub nidoabili yaase nipokbili. 32Ase lalikka a dan chub nidoa yaase nipok yɔma, lalikka nyɔnɔwa a tuni ligra a paari pisita a te yɔmawa kpagni abe ba yuk lalikka a ko.

33<<Ase nuru a dan lak goluk yaase wa tu goluk ale an si ku ate naab yaase boniŋ a lo du, 34golukku nyɔnɔwa ale wa tuni pamini. Ku a fɛ ate wa tuni ku nyɔnɔwa abe wa tanla duŋ kpiuku.

35<<Ase waai lalik kpaaŋ a dan kɔni a waai lalik kpaaŋ ate ka kpi, ku a magsi ka ba yik javukku a da a lab ligraŋa ale duŋ kpiuku a soa ase chaab la a te chaab. 36Alege ba dan seba ayen ka lalikka nyeka ale duŋsa chubika alege ka nyɔnɔwa an yik ka, ku a fɛ ate ka nyɔnɔwa a tuni, wa yik duŋ a tuni duŋka nyiŋ abe wa tanla duŋ kpiuku.

Currently Selected:

Nyinika 21: BWU

Highlight

Copy