Nyinika 19

1Izirali demma ale basi Ejipiti tɛŋka la, chiisa sitawa po dai dila danni dek ate ba jam Sinai Gɔi Kosikka po. 2Ba le basi Arefidim la ŋaaŋnyiŋ, ba jo ka Sinai Gɔi Kosik po ate Izirali demma yaa tigsi gɔnni guuku niŋ.

3Moosis yaa jueli Wen jigi, ate Naawen yaa wi wa guuk zuk a weeni ayen, <<Fi le fi weeni dii a te Izirali demma ale Jekob ŋaaŋ bisaŋa la ale nna. 4<Nama dek a nya mi le nye dii ale Ejipiti demma la kama ale mi ale ji ni ale jiiruk kinkaŋŋa a ta ni jam m dek jigi la kama. 5Yɔgyɔgla de ni dan wom ale ta m nɔiyeŋka, tɛŋsa meena po ni le chim m tuilum nuruba. Tɛŋka meena poom ka mi ale soa, 6ni le chim ka m kaabteerɔba ale tɛŋ weleŋ. Wie ŋaai ate fi le biisi a te Izirali demma la ale nna.>>

7Moosis yaa ŋman ga wi nuruma niŋdeerɔma a pai wie ŋaai meena ate Naawen a weeni ayen wa biisi la a dueni ba niŋ. 8Nuruma yaa maa chaab a siak ayen, <<Ti le nye dii meena ate Naawen a weeni la.>> Moosis yaa ta ba le tulisi diila a jam Naawen jigi.

9Naawen yaa weeni Moosis ayen, <<Mi le jam fi jigi ale chiŋmai sobluk, ate nuruma a wom mi le a biisi ale fu la ate ba kasim ta mariŋka ale fu.>> Moosis yaa weeni Naawen nuruma ale weeni diila.

10Ate Naawen a weeni Moosis ayen, <<Cheŋ nuruma jigi a gaari a magsi jinla ale chum. Basi ate ba sugri ba gattaŋa 11abe ni gomsi magsi daa ŋatawa danni, dii nyiŋla dai dila danni Naawen ale nyini Sinai Guuku zuk a siŋ nuruma meena niŋ. 12Te nuruma bana a gilim guuku abe fi weeni ba ayen, <Ni kpesi ate ni kan jueli guuku yaase ni tiri guuku kinni. Waai dek ale a tiri guuku la se ba ko wa. 13Ku a fɛ ate ba yuk wa ale tana yaase ba tɔŋ wa ale peema, ba kan pai nisa a tiri wa. Nurubiik yaase duŋ ba kan te wa boro yaase ka boro.> Ka ba nin peeri padiaka nyiini a mooli di ate ba yaa jueli guuku.>>

14Moosis ale nyini guuku zuk a siŋ nuruma jigi la ŋaaŋnyiŋ, wa yaa gomsi nuruma, ate ba sugri ba gattaŋa. 15Wa yaa weeni nuruma ayen, <<Ni gomsi nidek a magsi daa ŋatawa danni. Ni yeeri nidek chaab bobi goom po.>>

16Daa ŋatawa danni saluiku nanpansa ale nyaksika ale chiŋma sobluk a yaa bo guuku zuk ate damuniŋ a peeri ate ku jueli. Waai meena ale bo dula la nyiŋsa a gɔk. 17Moosis yaa dɛ nuruma niŋ a ta ba nyini ba boka jigini a nyini ayen ba tu Wen. Ate ba zaani guuku kiri. 18Sinai Guuku jam lik ale ka nyuisa, dii nyiŋla Naawen ale siŋ ku zuk ale bolim. Nyuisaŋa kasim a jueli wen ase bolim ŋiak nyuisa la. Guuku meena jam kasim a choa ka nna girigiri. 19Damuniŋka mɛ kasim kum a jueli nna yegayega. Moosis yaa biisi ate Wen a tulisi wa.

20Naawen yaa siŋ Sinai Guuku zuk a wi Moosis ayen wa jueli guuku zuk. Moosis yaa jueli 21ate Naawen a weeni wa ayen, <<Siŋ ga kaam nuruma ate ba kan fɛ jam ayen ba nya Naawen ate ba yega a kpi. 22Dan poom ka kaabteerɔma ale a jam Naawen jigi la, ku a fɛ ate ba gomsi badek a welema, dan kan daa di Naawen ale yik sui ale ba.>>

23Moosis yaa weeni Naawen ayen, <<Nuruma a kan baga a jueli Sinai Guuku, dii nyiŋla fidek ale kaam ti ayen, <<Te bana a gilim guuku abe fi gaari ku.>>

24Naawen yaa tulisi ayen, <<Siŋ tɛŋ a ta Aaron a jueli a jam ale fu. Alege kaabteerɔma ale nuruma kan fɛ jueli jam Naawen jigi ya, dan kan daa di wa le namsi ba.>>

25Moosis yaa siŋ nuruma jigi a weeni ba.

Currently Selected:

Nyinika 19: BWU

Highlight

Copy