1 Jɔɔn 2

1M dek bisa, mi a ŋmarisi gbaŋka de a te ka nama ayen ni ka a tom wabaata. Alege waai a dan tom wabiok, ti ta ka nuru wanyi waai ale wa saalim ti Kowa Wen a te ti la. Wala ale, Yeezu Kirisita waai ale ka Wamaŋsa Nyɔnɔ la. 2Wala a kpi ka ti wabaataŋa nyiŋ ayen Wen baga vari ti ti wabaataŋa po a basi. Be daa tama wabaataŋa nyiini nyiŋŋa, alege wa kpi ka tɛŋka meena demma wabaataŋa nyiŋ.

3Ase ti daa va Wen sinsaŋŋa meena, ti le sum a seba ayen ti seba wa kama. 4Ase nuru waai a dan weeni ayen wa seba Wen alege a kan va wa sinsaŋŋa meena, wa a velim kama. Wensie a ka wa jigi ya. 5Nuru waai abe daa va wa sinsaŋŋa, wa sum a yaali wa kama nalimnyiini. Ti daa a va dila, ti le seba ayen tama ale wa a sum ka bunyi. 6Ase nuru a dan weeni ayen wa bo ale ka Wen, ku a fɛ ate wa va wa ase Yeezu ale va wa diila.

7M dek doaba, ku daa sinsak paala ate mi a ŋmarisi a te ni. Di diem ka sinsak kpagsaŋa ate nama a wom a ta nyini ku piilimka po la. 8Alege ŋa diem ka wapaala yɔgyɔgla, dii nyiŋla, sinsak paani de a nye ase ka yok ale a tagri danni kantueŋ la. Be ka Yeezu ale jam va di ale ge ate nama mɛ a yaa maa va di.

9Nuru waai abe dan weeni ayen wa bo ka danni kantueŋka po ale ge kisi wa choa. Ku a nye ase wa diem bo ka legi po la. 10Waai a dan ta yaalika ale wa choa, wala a nye ase wa bo ka danni kantueŋka po la. Wari a ka wa jigi a baga a nye ate wa a tom tuimbiowa. 11Nuru waai a dan kisi wa choa, ku a nye ase wa diem a bo ka legini po ale zɛ juijui ate wa a cheŋ la. Legini a lik ka wa ninaŋa ate wa a nye ase yio la.

12M bisa, mi a ŋmarisi gbaŋka de a te ka nama, dii nyiŋla Wen a va ka Yeezu nyiŋ a vɔŋ nama wabaataŋa a te ni. 13Nisɔmma mɛ, mi a ŋmarisi gbaŋka de a te ka nama, dii nyiŋ la nama a poom seba waai ale boro a nyini ku piilimka po la kama. Nama bi paalukku mi a ŋmarisi gbaŋka de a te ka nama, dii nyiŋla, nama nak dɛ jabioku kama.

14M bisa, mi a ŋmarisi a te ka nama dii nyiŋla, nama poom seba waai ale boro a nyini ku piilimka po la kama. Nisɔmma mɛ, mi a ŋmarisi gbaŋka de a te ka nama, dii nyiŋla nama seba Wen kama waai ale boro a ta nyini ku piilimka po la. Nama bi paalukku mɛ ta pagrim kama ale diem ta Wen wieŋa ni suiniimaŋa po. Ka dila ale soa ate ni baga nak dɛ jabioku la.

15Ni kan a yaali ayen ni a va tɛŋka meena demma ale a va diila. Nama a daa yaali tɛŋka meena demma ŋantaŋa, ku a sak kama ayen ti Kowa Wen yaalika a ka ni jigi ya. 16Ŋan baai ate nuruba nyiŋsa a yaali la ale ŋan baai ate ba ninaŋa a yaali ayen ba a nya la abe ba yik ba a nyo ba nisa po a ta kanjanta ale ba la, ŋantaŋa de meena an nyini daa ti Kowa Wen jigi ya. Bala meena ka tɛŋzuk de ŋanta. 17Tɛŋka meena ale ŋan baai meena ate tɛŋzuk de demma a yaali la, a kan beni, alege waai ale a va Wen yaalika la, le jam tuesi ka nyuvuri dii ale kan ka kpeglimka la.

18M bisa, tɛŋka meena kpeglimka danni a moata kama. Ni wom ayen da ŋala po Yeezu Kirisita dachiaka ale jam. Ti seba ayen tɛŋka meena kpeglimka danni a moata kama, dii nyiŋla wa dachaasaŋa po ba yega poom boro kama. 19Nuruma de ba gela a poom jam bo ale ti kama, alege ba daa tama po. Ase ba dan jam ka tama po, ba ti diem bo ale ti kama, alege ba le basi tama diila a sak kama ayen ba daa tama po.

20Alege Yeezu potim lueri ni kama a basi ate Wen Chiika a bo le ni ayen ni meena seba ku wensie ale ka diila. 21Mi a kan ŋmarisi gbaŋka de a te nama ayen ka nama ale kan seba wensieŋa la, alege ka ni ale seba wensieŋa la nyiŋ ale soa ate mi a ŋmarisi a te ni. M be ŋman seba kama ayen venta kan nyini wensie jigi ya.

22Be ka wana ale venta nyɔnɔ? Ka waai ale a weeni ayen daa Yeezu ale waai ate Wen a tom la. Wala choa ka Kirisita dachiak. Wala a zɛri ka Kowa ale wa Nidoabinni. 23Nuru waai abe ale kan ta siaka ayen Yeezu ka Wen Nidoabinni la, wala mɛ a zɛri ka Wen dila. Nuru waai ale ta siaka ayen Yeezu ka Wen Nidoabinni la, wala mɛ a seba wa Kowa Wen kama.

24Nama abe kan baŋ ba le liŋ sak ni diila. Ni dan kasim a ta ku dila ale a teeri ku mɛ, nama ale ti Kowa Wen ale wa Nidoabinni Yeezu le jam a gum chaab. 25Yeezu Kirisita abe puulim kama ayen wa le te ti nyuvuri dii ale kan ta kpeglimka la.

26Mi a ŋmarisi gbaŋka de a kaam ni ayen ni seba baai ale a paasi ni la. 27Alege nama, Yeezu Kirisita a pai Wa Chiika a nyo ka ni suiniimaŋa po. Wa Chiika abe le bo ale ni la, ni kan ŋmaa yaali waai ayen wa sak ni. Wa Chiika ale sak ni wari meena. Wa a sak ka wensie daa venta. Ni be va sinsaŋŋa de ate ni le Kirisita chim bunyi.

28M bisa, ni basi ate ti a va Wen Chiika, ate Yeezu a dan ŋman pilim jam abe ti ta nyiŋbiiri ti kan chali yɔgsummoa ate chivie a yik ti ate ti suk ti dega. 29Nama seba ayen Yeezu jigi wie meena a yɔrisi kama. Kula be a sak ti kama ayen ku a fɛ kama ayen baai meena ale a tom wayɔrisima tuima la, ka Wen bisa.

Currently Selected:

1 Jɔɔn 2: BWU

Highlight

Copy

Compare