1 Jɔɔn 3

1Nama a poli ti Kowa Wen ale a yaali ti nna yegayega diila. Wa yaalika ale ti a zuak ka nna yegayega ate wa yaa a wi ti ayen Wen bisa. Ti be sum ka wa bisa. Baai abe ale a va tɛŋzuk de demma suiku la a zɛ tama, dii nyiŋla ba zɛ Wen dega. 2M dek doaba, yɔgyɔgla de tama yaa ka Wen bisa. Alege, Wen an diem sak ti ti le ti chim nuru baai chaab la. Alege ti seba ayen Yeezu a dan ŋman pilim jam, ti za ti a nye ase ka wadek la. Ti be le nya wadek ale sum ka diila ale ti nimbie dai yeŋ po. 3Baai meena abe ale ta nya kude yiila la, bala le chim nuru weleŋsa ase Yeezu ale ka diila.

4Baai meena ale a tom tuimbaata la, kan va Wen sinsaŋŋa. Nya kude abe nye a kaasi ka sinsaŋŋa. 5Ni seba ayen Yeezu a siŋ jam tɛŋzuk de ayen wa vari ka nuruba ba tuimbaata po a basi. Wabiok abe jam ka wadek jigi ya. 6Baai meena ale ka bunyi ale Kirisitawa la, bala a kan ŋman a tom tuimbaata. Alege, baai meena ale kasim a tom tuimbaata la, a nye dila kama, dii nyiŋla ba zɛ wa.

7M doaba, ni kan basi ate nuru waai a paasi ni. Baai meena ale a tom tuimaŋsa la, bala ka nuru weleŋsa ase Yeezu la. 8Baai meena ale a tom tuimbaata la, bala ka jabioku bisa. A nyini ku piilimka po a ta jam paari jinla, jabioku a kasim a tom ka tuimbaata. Ka dila ale soa ate Wen a tom Wa nidoabinni ate wa siŋ jam tɛŋzuk de meena ayen wa yik jabioku tuimaŋa a kaasi.

9Baai meena ale ka Wen bisa la, a kan tom wabaata dii nyiŋ la, Wen ale ka diila a bo ale kula nyɔnɔwa kama. Wen abe ale ka wa ko la nyiŋ ale soa ate ku a fɛ ayen kula nyɔnɔwa a kan a tom tuimbaata. 10Suiku de po ni le baga a miŋ baai ale ka Wen bisa la ale baai mɛ ale ka jabioku bisa la. Baai ale kaa a tom tuimaŋsa la ale baai mɛ ale kan a yaali ba chaab la, bala meena a daa Wen bisa.

11Wen sinsaŋŋa ate nama a liŋ a wom la ale, ti a yaali ti chaab. 12Ku a fɛ kama ayen ni kan a nye ase Keen la. Wala a jam ka jabioku biik, dii nyiŋla wa jam ko ka wa suoku Abel. Nama a seba jabuui nyiŋ ale soa ate Keen a ko wa la? Wa ko wa kama, dii nyiŋ la wadek a jam a tom ka tuimbaata alege wa suoku a jam a tom tuimaŋsa.

13M suata, ase baai ale a va tɛŋzuk meena demma suiku la a dan kisi ni, ni wamaŋsa nyiŋ, ni kan basi ate kula cha ni. 14Tama seba kama ayen tama basi kum kama ale nya nyuvuri dii ale kan ka kpeglimka la. Tama seba kama dii nyiŋla, tama ta yaalika ale ti chaab kama. Nuru waai abe ale kan ta yaalika la, a diem bo ka kum po. 15Baai ale kisi ba chaab la, a nye ase ka nuru koorisa la. Nama seba ayen nuru bala chaab a ka nyuvuri dii ale kan ka kpeglimka la. 16Tama ale seba yaalika ale ka diila ale nna. Ku kiri ale, Yeezu Kirisita ale kpi a te ti diila, a sak ti ka wensie yaalika ale ka diila. Ku nala kama ayen tama mɛ pai ti nyuvooŋa a te ti chaab mɛ ase ku dan poom ka kum wari. 17Ase nama a dan poom ka ŋanta nyam alege ate ni nya ni choa ale wa a nam alege ni kan maari wa, kula a sak kama ayen Wen yaalika a ka ni jigi ya. 18M bisa, ni kan basi ate ti a yaali ti chaab ale ti nɔi po wie nyiini, alege ni basi ate ti sum a yaali ba abe ti a tom tuimaŋsa a te ba.

19Kude ale ku basi ate ti seba ayen ti va wensieŋa kama. Ale a basi ate ti seba a chak ayen Wen a bo le ti. 20Tama popola abe dan kaasi ate ti jɔk nyiŋbiiri ti seba ayen Wen a gaam wie meena kama ale seba wie meena. 21Dila nyiŋla, m dek doaba tama popola abe dan kan kaasi ya, ti ta nyiŋbiiri kama ayen Wen a bo ale ti. 22Ti dan juisi jaab wa jigi, wa le te ti, dii nyiŋla tama ale a va wa nɔi ale a tom tuim ŋaai ale a peenti wa poi la. 23Suik kula po, Wen ale a weeni ti ayen ti nye diila ale, ti ta siaka ale Wa Nidoabinni Yeezu Kirisita abe ti a yaali chaab ase wa ale poom a weeni ti diila. 24Baai meena ale a va Wen nɔi la a bo ale wa kama ate wa mɛ a bo ale ba. Ti seba ayen nya kude ka wensie, dii nyiŋla wa pai ka wa Chiika a nyo ti suiniimaŋa po.

Currently Selected:

1 Jɔɔn 3: BWU

Highlight

Copy

Compare