1 Jɔɔn 1

1Mi, Jɔɔn, ale ŋmarisi gbaŋka de ayen m sak ni Nyuvuri Wanni wie. Wa boro kama a nyini ku piilimka po ale chim nyuvuri meena nyɔnɔ. Tama wom wa lueluku ale nya wa ale ti nimbie mɛ ale pai ti nisima a tiri wa. 2Ti Kowa Wen ale tom nyuvuri meena nyɔnɔwa de ate wa siŋ jam tɛŋzuk de. Tama a nya wa kama ale chim wa seerɔba ayen ti a weeni nyuvuri dii ale kan ta kpeglimka la wie a sak ni. Di kasim a bo ale ti Kowa Wen kama ate nyuvuri meena nyɔnɔwa a yaa pai di a sak ti. 3Tama a yaali kama ayen ti sak ni wie ŋaai meena ate wa nye la. Dii nyiŋla tama dek a nya kama ale wom ŋa. Tama ale ti Kowa Wen ale Wa Nidoabinni Yeezu Kirisita a ta ka nɔiyeŋ ale chaab ate tama mɛ a yaali ayen nama a jam gum ti po. 4Tama a yaali kama ayen ni sue a peenti nna yegayega. Ka dila ale soa ate tama ŋmarisi wieŋa de a te ni la.

5Dii ate Yeezu a sak tama wadek wie ate tama a pai a sak ni la ale nna. Wen a nye se ka bolim la. Legi magadek mɛ an baga a moata wa. 6Tama abe dan weeni ayen wa ale tama ta ka nɔiyeŋ ale chaab ale ge bo legini po, tama ka velimvendisa ti biik po ale ti nyeka po. 7Alege tama daa cheŋ bolimu po ase midek ale bo bolimu po diila, dila a sak kama ayen tama ale ti vaanchaab a ta nɔiyeŋ ale chaab kama ate Wen Nidoabinni Yeezu ziimu a vari ti a basi wabaata meena po.

8Tama a dan weeni ayen ti ka wabiowa, ti a paasi ka tidek. Wensie ka ti jigi ya. 9Alege ti dan siak ayen ti ta wabaata, Wen le vɔŋ a te ti abe wa vari ti a basi wabaata meena po. Ti seba ayen wa le nye dila a te ti, kama dii nyiŋla, wa ka wensie nyɔnɔ. Wa tuimaŋa meena po, ka wayɔrisima. 10Ti dan weeni ayen tama an diem tom wabiowa, ti a weeni ayen Wen ka velimvendik. Ti be pai ka ŋaaŋ a te wa wieŋa.

Currently Selected:

1 Jɔɔn 1: BWU

Highlight

Copy

Compare