1 Jon 3

Wana Fùyènà

1Ba ghàn ti yen te Yènfù chwùte kôŋì ha ghàhnà yi ghaka kə ni. Fu ti nî na ghɨ hi toŋte ghàhnà na wana Fùyènà. Yi mô kə nâ hamok. Ghàhnà mô wana Fùyènà. Ghɨt a mbye tà timi hì khə Yènfù, a ni mò gha ye a ghɨna khə wi ghàhnà. 2Ghàhnà mô chîn, mô wana Fùyènà a sun samsu, bu hi tè khə nâ na, ghàhnà bè hì mô nâ yàni. Gha ye a ghàhnà khə hamok mô na, wù bè bûŋtè fwo ma ghàhnà yen wûn kə nâ te wù mò, ma ghàhnà hi boŋa mô kə nâ te wûn. 3Nâbi nde we a wù yute wûn, lèmà ngɨŋ à wûn nì yulînì kəbi yi ghəl te Klistù mò nì yulînì. 4Nâbi nde we a wù nè be khɨma sak yi Fùyènì, beka be mò ni, a mô yi khɨm yi saki. 5Ghàn khə na Klistù tì ben a mbyî hi chikhe besu ghɨ̂tsù. Wù tà timi ni jə be. 6Yi ni chwùtè na wùt lè wi hi tè mò ghê wûn, chyə̂ a be. Nâbi nde we a wù chyə a be ni mò teka wù timè yen wûn, khə wi wûn. 7Kə ghàn de na wùt jiŋhi ghàn a mwəlà mâmù! À ni nâbi nde gha ye a yi mô chilichili, ma wù hi mô kəbi wut à chilichili te Klistù. 8À hì nê nâbi nde be ma wù hi mô wut à deblì beka deblì yisa nê kə a gha a be kə nâ a yìmi. Gha ye a Wâ Fùyèn tì bèna a mbyî mò hi bobhi fêt yi deblì.

9Nâbi nde we a mò wâ Fùyèn chyə wijə a be beka wù kəta chyəna Fùyènà, wu bu hi fè nè be beka Yènfù mò Bè wûn. 10A ni mò lum we a ghɨ yen a khɨle ghɨt ghe a ghɨ mô wana Fùyènà nì ghe a ghɨ mô wana deblì. Wùt we a wù nê wi gha ye a yi mô chilichili wijə wâ Fùyèn. We a wù kòŋà wi wâ nè wûn wù boŋa wijə wâ Fùyèn.

Ghàn hi kôŋà ngɨŋ sanisu

11Ghàn tî yû tum yina kə a yìmi na, ghàhnà kəta hi tè kòŋà sù ngɨŋ. 12Ghàhnà kəta wi hi tê mò te Kên. Wù ndùku mô ghê deblì, ywi wâ nè wûn. Wù ywi wûn njwô ghə? Wù ywi wûn beka wâ nè wûn ndùku nê gha chilichili, wu nê gha a be.

13Ghɨt a mbyî shìki bânà ghàn a wana noma, kə ghàn hi mô nì kani. 14Ghàhnà khə na ghàhnà hì mô ma ghɨ ti fwu a yi kpû hì chyə̂ beka ghàhnà kòŋà wana ne ghàhnà. Wùt we a wù kòŋà wijə wâ nè wûn baha chyə kə a fùtɨ̂n à yi kpû. 15Wùt we a wù bànà wâ nè wûn ywelò, ghàn khə na wùt we a wù ywi kəta wi chyəna ghe ghɨ bè mê wi. 16Ghàhnà yena khɨle gha ye a kôŋì mò yini tohne a Jisòs Klistù te wù tì fo ngɨŋ à wûn hi kpû kum ghàhnà. Ghàhnà boŋa kəta hi tè mò hi fo ngɨŋsu ghàhnàsu hi kpû kum wana ne ghàhnà. 17Kôŋì Fùyènì shìki mô ha wùt, wu kəta mwə, yen a wâ nè wûn wu kəta wi biyani kwohe wi seni ha wûn ma kôŋì Fùyènì nê hi mô yàni ha wûn agha? 18Wana ma, kə ghàhnà hi kôŋà kə a tô yi jwô. Ghàhnà kəta hi tè chwùtì yi kôŋ a gha afa a ghàhnà nè, kôŋà kə nâ hamok. 19À mò a tu lum afân a ghàhnà yen a khɨle na ghàhnà mò a bàh afa a ghɨ mô hamok, yi fê nê təm a ghàhnà kəta yutìnì a Yènfù ashyə̂, 20saka wi ghàhnà, beka Yènfù ngaŋte chyâlò kwâktì tù ghàhnà tù, khə nâbi ghə. 21Təm mu ghàhnà shìki saka wi ghàhnà a sun samsu, ma yi hi bɨlà chwùtè na ghàhnà mò a jûŋ a Yènfù ashyə̂ 22ma ghàhnà nê hi bufa nâbi ghə ha wûn, wu fo beka ghàhnà ywo saktu Wun tu, nê a gha ghe fu kôŋà. 23Sak yi Fùyènì mi yina mò na, ghàhnà bimi ha Wâ wûn Jisòs Klistù, ma ghɨ hi kôŋà ngɨŋsu ghàhnàsu te wù jìsà. 24Ghɨt ghe a ghɨ nê te saktu wun tu jìsà chyə ghê wûn kə nâ hamok. Ghàhnà hi khə na fu chyə nì ghàhnà amok tohne a yohnà afa a wù fo ha ghàhnà.

Currently Selected:

1 Jon 3: bmv

Highlight

Copy

Compare