1 Jon 4

A yohnà ghe a ghɨ mô hamok nì ghɨ fəma

1À ki bên nâbi nde ha ghàn a sun samsu jis na yi kəta Yohnà Fùyènà, kə ghàn bimi kə yi bimî. Ghàn kəta hi fate ke wùt we wù jìsa na yi kəta Yohnà Fùyènà hi yen na wù jìsà hamok agha. Ghàn kəta hi nì ni beka fòktìsù fəmsu gbè a mbyî dô kə ni. 2Ghàn mò hi khɨli na wùt kəta Yohnà Fùyènà a wù lum afân na, nâbi nde we a wù kəta Yohnà Fùyènà bimelò na Jisòs Klistù tî bên a mbye afân a wu wùn wu wûtù. 3Nâbi nde we a wù bime wi ha Jisòs kəta wi Yohnà Fùyènà, bɨlà kəta yohnà a bànà Klistù, a mô ghe a ghàn tì ywo na ghɨ bênàlò. Ghɨ hì mô kə nâ a mbyî chîn.

4Ghàn mò ghɨt a Fùyènà, a mwəlà mâmù, ma ghàn ti ta chya ghɨt mɨ ghɨ̂n beka We a wù mò a ghàn a fùtɨ̂n chyàlò we a wù mò a mbyî. 5Fòktìsu fəmsu mò kəbi ghɨt a mbyî, à ni mò gha ye a ghɨna jìsà kə jîs yi ghɨt a mbye, ghɨt a mbye ywo jîs yi ghɨna. 6Ghàhnà mò ghɨt a Fùyènà, ma à khə nâbi nde Yènfù, ma wù hi ywo gha ye a ghàhnà jìsà, à hì ma nâbi nde Yènfù, ma wù nê hi ywo wi. A ni mò lum we a ghɨ khɨle yohnà ghe a ghɨ mô hamok nì ghɨ fəma.

Yènfù mò yi kôŋ

7Yi jwôfàlò a sun samsu na ghàhnà hi kôŋà ngɨŋsu ghàhnàsu, beka kôŋì lò bênà ha Yènfù. À shìki kôŋà nâbi nde ghɨt ale, ma wù hi mô wâ Fùyèn, khə Yènfù. 8Nâbi nde we a wù kòŋà wi ghɨt ale khə wi Yènfù beka Yènfù mò yi kôŋ. 9Yènfù tî chwûtì kôŋ yì wuni ha ghàhnà a wu lum na wù tì tum Wâ wun a mbyî, kə wù mòk we a wù ndùku kəta, shyəma ghàhnà khɨti chyənà tohne ha wûn. 10Kàntè yì kòŋ mò yìna ni: Yi bu na ghàhnà ndùku kôŋàlò Yènfù, biyani fu koŋ ghàhnà tum Wâ wûn te yi fô na wù bê kpu shyəma fu nê hi fê bâŋhè wi lâ ha ghàhnà lehèfo besu ghàhnàsu.

11Ghàhnà ni kəta hi tè boŋa kòŋà ngɨŋsu ghàhnàsu a sun samsu, beka Yènfù tî koŋ ghàhnà wu lum afân. 12Wùt tà timi yen jə Yènfù, biyani ma ghàhnà shìki kôŋà ngɨŋsu ghàhnàsu, ma Yènfù hi mô a ghàhnà fùtɨ̂n, kôŋ yì wuni kpenê a ghàhnà chyənà.

13Ghàhnà khə na Yènfù làwû a ghàhnà fùtɨ̂n, ghàhnà mô a wun a fùtɨ̂n beka wù ti fo Yohnà a wuna ha ghàhnà. 14Ghàh ti yên, hì fôktè ha ghɨt ale na Bì ti tum Wâ wûn na wù bê bonhi mbyî. 15À bimi nâbi nde na Jisòs mò Wâ Fùyèn, ma wù hi mô ghê wûn, wu mô ghê Yènfù. 16Ghàhnà hi fate khə kôŋ ye Yènfù kəta ha ghàhnà fê yikte kə atɨ̂n.

Yènfù mò yi kôŋ. À kòŋà nâbi nde ghɨta ma wù hi chyə̂ ghê Yènfù, Yènfù chyə ghê wûn. 17Yènfù ti nî na kôŋì hi mô a ghàhnà chyənà shyəma ghàhnà bê hi mô kə nâ a jûŋ wu tuk wu saku, beka chyəna ghàhnà a mbye afân mò kəbi te ghɨ Klistù. 18Fânì wijə a fùtɨ̂n à yi kòŋ. Kôŋ ye a yi kpene jùmà fihelò fânì nâ yì jɨ̀m, beka fânì chwùtè na ghɨ kəta hi fo ngə̂k ha wùt. Wùt shìki fân, ma kôŋì Fùyènì hi kpene wi a wun a fùtɨ̂n.

19Ghàhnà kəta kôŋì beka Yènfù tî yitì koŋ ghàhnà ashyə̂. 20À ki jîs nâbi nde na, “Mu kòŋàlò Yènfù,” biyani bânà wâ nè wûn, wù ya wamalò fəmi beka wùt wi hi tè bànà wâ nè wûn we wù yena, jîsà na yi kòŋàlò Yènfù teka wù timè yen. 21Sak ye a Yènfù fo ha ghàhnà mò na, à hì kôŋà nâbi nde Yènfù, wu hi boŋa kôŋà wâ nè wûn.

Currently Selected:

1 Jon 4: bmv

Highlight

Copy

Compare