1 Jon 2

Jisòs Klistù chyate Bì a ghàhnà wù lùk

1Mu nyak a gha ghɨ̂n ha ghàn a mwəlà mâmù shyəma ghàn hi fê nê wi gha a be. Biyani, a ni nâbi nde gha be, wu hì khə na ghàhnà kətalò wùt à chilichili, a mô Jisòs Klistù, wu chyate Bì a ghàhnà wù lùk. 2A mô wûn we a ghɨ fo te yi fô shyəma Yènfù nê hi fê bâŋhè wi lâ, ma wù lèhefo besu ghàhnàsu, bakhe nâbi nì ghɨt à jɨ̀m a mbyî. 3Ghàhnà shìki nî te saktu Fùyèn tù jìsà, ma ghàhnà yen à khɨli hamok na ghàhnà khəlò wûn. 4Wùt shìki jîs na yi khəlò Yènfù, nê wi te saktu wun tu jìsà, ma wùt àtɨ̂n hi wama yi fə̂m, hamok bu a wun a yi təm. 5Biyani à shìki nê nâbi nde gha ye a wù jîsà, ma kôŋì Fùyènì hi mô ma yi ti kpên a wun a chyənà. A ni mò lum we a ghàhnà khə na ghàhnà mò a Yènfù a bàh. 6À hì jîsà nâbi nde na yi mò ghê Yènfù, ma wù hi kəta hi tê gbì kə te Jisòs ndùku gbê.

Mu nyàkà wi sak yi fe

7Mu nyàkà wi sak yi fe ha ghàn a sun samsu. Mu nyàkà sak yi mwu, ma ghàn ndùku khəlò nâ a yìmi. Sak yi mwu mi yîn mô tum ye a ghàn hì mô ma ghàn tî yû. 8Biyani sak mi yîn a mu nyàkà ha ghàn yè yusa mô kə yi fê. Klistù chwûtì tohne a wûn a chyənà na sak mi yîn mò hamok, nâ ghàn hi boŋa chwûtè beka ban ye a yi mô hamok yi hì banalò, fini mê mihè yênà.

9À ki jîsà nâbi nde na yi chyə a yi bân, biyani fê bânà wâ nè wûn, ma yi hi chwûtè na wù baha chyə kə a bɨn a finana. 10Biyani à hì kôŋà nâbi nde wâ nè wûn, ma yi hi chwûtè na wù chyə a yi bân, gha yile bu a wun a chyənà hi nì na wùt fen a fùtɨ̂n à be. 11Wùt we a wù bànà wâ nè wûn chyə a bɨn a finana, gbê chyâ atɨ̂n à bɨn a finana, ma ghɨ ti nî wûn wu yena wi na yi yênà afa agha. 12Mu nyàkà a gha mɨ ghɨ̂n ha ghàn a mwəlà mâmù beka Yènfù ti lêhìfo be sanisu a Jisòs Klistù yi yet. 13Mu nyàkà a gha mɨ ghɨ̂n ha ghàn a ləmanà beka ghàn hì mô ma ghàn ti khɨli wûn we a wù ndùku mô kə nâ a yìmi. Mu nyâkà a gha mɨ ghɨ̂n ha ghàn a ngwàk beka ghàn hì mô ma ghàn ti ta chya deblì. Mu nyâkà a gha mɨ ghɨ̂n ha ghàn a mwəlà mâmù beka ghàn hì khəlò Bì. 14Mu nyâkà a gha mɨ ghɨ̂n ha ghàn a ləmanà beka ghàn hì khəlò wun we a wù ndùku mô kə nâ a yìmi. Mu nyâkà a gha mɨ ghɨ̂n ha ghàn a ngwàk beka ghàn ta, gha Fùyènì mô a ghàn a chyənà, ma ghàn ti fî ta chya deblì.

15Kə ghàn hi kôŋà mbyî yinâ nì mwə̀ me mù mò atîn. À kôŋà nâbi nde mbyî yinâ, ma yi hi chwûtè na wù kòŋà wi Bì, 16beka nâbi ghə ghe à mò a shyə a mbye ni te gha a be ghe a wun wu ghàhnà china ghàhnà na ghɨ hi nê, a mô se a fwona nì ghaŋhi wùni kum mwə, lo kə a mbyî, bu ha Bì. 17Mbyi chyàlà yi chyâ, bakhe nì mwə̀ me a ghɨta nyɨŋa yi bàm atɨ̂n, biyani wùt we a wù nè kə te Yènfù khɨŋa kəta hi bè chyə fâŋ.

Bànà Klistù

18Tuk mù gòkhemù ti bakhâ a mwəlà mâmù. Ghɨ tî fôktì ha ghàn na bànà Klistù kətalò hi bè bèn. Bànàsù Klistù su ni mò chîn dô kə ni. À mò gha ye ghàhnà yena khɨle na tuk mù gòkhemù ti bakhâ. 19Bànàsù Klistù mu sîn fwu kə nâ a ghàhnà fùtɨ̂n, biyani ghɨna chehì laha wijə nì ghàhnà a kak à mòk, bu ya ma ghɨna che faŋ kə ghàhnà ghɨna. Fwu yi ghɨna chwùtè na ghɨna chehì wijə ghàhnà ghɨna a kak à mòk. 20Biyani, Klistù ti fo Yohnà Yulena ha ghàn, ghɨ bênà nâ ha ghàn à jɨ̀m, na ghàn hi khə gha ye a yi mô hamok. 21Mu nyàkà wi gha ghɨ̂n ha ghàn beka ghàn khə wi gha ye a yi mô hamok. Mu nyàkà beka ghàn khə na fəmi kəta wi hi tè mò a yi gha, yi mô hamok.

22Wùt we a wù mò a wut à yì fə̂m ni mò wùni? À mò we a wù tunhe na Jisòs wijə we a ghɨ chwoka lema. Nki wùt mu wûn mò bànà Klistù, tunhe Wan, fê tunhe kəbi Bì. 23À tunhi nâbi nde Wan, ma à hi mô na wù ti tunhi Bì, à bimi nâbi nde Wan, ma à hi mô na wù bimi Bì.

24Ghàn fate lem gha ye a ghàn tì ywo kə nâ a yìmi a ghàn a təm. Ghàn ki nî ni, ma ghàn faŋ hi mô kə ghàn à Wan nì Bì amok. 25Yìna ni mô shyə ghe a wù tì chwùne hi fo ha ghàhnà kə nâ nì ngɨŋ à wûn: A mô chyə ye a yi bè mê wi.

26Mu nyàkà a gha mɨ ghɨ̂n ha ghàn ni, tobhe ghàn kum ghɨt ghe a ghɨ khɨŋa hi tè lehe ghàn. 27À mò ha ghàn ma Klistù hì mô ma wù ti fo Yohnà a wuna ghɨ hì mô ha ghàn, ghàn fê khɨŋa wi wùt na wù hi yike ghàn, beka Yohnà wuna yike ghàn nâbi nì ghə, yike ni, yike kə hamok, fəmi bu atɨ̂n. Ghàn kəta hi tè ywo yi yikî ye a Yohnà a wuna yike ha ghàn kə te ghɨ hì mô ma ghɨ ti yikî, shyəma ghàn faŋ à hi mô kə ghàn à Klistù.

28Nì chîn, a mwəlà mâmù yi ni chwùtè na, ghàn kəta hi faŋ kə ghàn à Klistù shyəma wù bê buŋhê fwu nâbi yini a wun wu yu benanu, ma ghàhnà bê hi mô kə nâ a jûŋ, wume wi a wun ashyə̂. 29Ghàn shìki khə na wù mò chilichili, ma ghàn hi khə na nâbi nde we a wù nè gha ye a yi mô chilichili boŋa mô wâ Fùyèn.

Currently Selected:

1 Jon 2: bmv

Highlight

Copy

Compare