1 Мусэ 35

Екъуб Бэтэл деж

1Тхьэм Екъуб къыжриӀащ:

– Ежьэ, Бэтэл кӀуэи, щыпсэу абдежым; щыухуэ къурмэнщӀыпӀэ абы уи къуэш Эсау зыщыбгъэпщкӀуу ущыщӀэпхъуэжам къыпхуэлъэгъуа Тхьэм папщӀэ.

2ЖриӀащ Екъуб езым и унагъуэми, къыдэщӀыгъу псоми:

– ХыфӀэвдзэ хамэ тхьэ сурэтхэу фэ фиӀэхэр, хыфӀэвдзи, зывгъэкъэбзэж, зэфхъуэкӀ фи щыгъынхэри; 3ЗытӀэтынщи, дыкӀуэнщ Бэтэл; абдежым щызухуэнщ сэ къурмэнщӀыпӀэ си тхьэмыщкӀэгъуэ махуэм сызэхэзыха икӀи сызытета гъуэгум щызигъуса Тхьэм папщӀэ.

4Арати, хамэ тхьэ сурэту абыхэм яӀыгъа псори, я тхьэкӀумэхэм ярылъа тхьэгъухэри иратащ Екъуб; Екъуб ахэр щыщӀитӀащ Щэхэм и гъунэгъуу щыт жыгейм и лъабжьэм деж.

5ИтӀанэ ежьащ ахэр. Тхьэм и шынагъуэм Ӏэгъуэблагъэм щыӀэ къалэхэм дэсхэм зэщӀищтати, зыри кӀэлъыпхъэракъым Екъуб и къуэхэм.

6Арати, кӀуащ Екъуб Ханаан щӀыналъэм щыӀэ Лузэ, нэгъуэщӀу жыпӀэмэ Бэтэл, езыри абы и гъуса цӀыху псори. 7Щиухуащ абдежым къурмэнщӀыпӀэ, фӀищащ а щӀыпӀэми: Ел-Бэтэл#35:7 Ел-Бэтэл – пасэрей журтыбзэкӀэ абы къикӀыр: Бэтэл и Тхьэщ.; сыт щхьэкӀэ жыпӀэмэ мыбдежым абы къыщыхуэлъэгъуащ Тхьэр, езым и къуэшым зыщигъэпщкӀуу къыщыщӀэпхъуэжыгъам щыгъуэ.

8ЛӀащ Дэборэ, Ребеккэ зыпӀа бзылъхугъэр, щыщӀалъхьэжащ ар Бэтэл нэхъ и щӀагъкӀэ щыт жыгейм и лъабжьэм. Екъуб а жыгейм фӀищащ: хьэдагъэ жыгей.

9Паддан-Арам къыкӀыжа нэужь, къыхуэлъэгъуащ Тхьэр Екъуб, и нэфӀи къыщыхуащ абы. 10КъыжриӀащ Тхьэм абы:

– Уи цӀэр Екъубщ;

ауэ иджы щыщӀэдзауэ уэ ЕкъубкӀэ къоджэнукъым,

атӀэ уиӀэнущ уэ цӀэуэ Израил.

Апхуэдэуи къыфӀищащ абы цӀэуэ Израил.

11АдэкӀи къыжриӀащ Тхьэм абы:

– Псори зыхузэфӀэкӀ Тхьэр Сэращ;

багъуэ икӀи хэхъуэ;

лъэпкъ икӀи лъэпкъ куэд дыдэ къыптехъукӀынущ уэ, пащтыхьхэри къыптехъукӀынущ.

12Сэ Ибрэхьимрэ Исхьэкърэ еста щӀыналъэр

естынущ уэ къыптехъукӀыну цӀыхухэми.

13Абы къыщепсэлъа щӀыпӀэм зыщиӀэтри, Тхьэр уафэм дэкӀуеижащ. 14Екъуби Тхьэр абы къыщепсэлъа щӀыпӀэм деж мывэ фэеплъ щигъэуври, трикӀащ абы санэри дагъэри. 15ИкӀи фӀищащ Екъуб Тхьэр къыщепсэлъа щӀыпӀэм Бэтэл#35:15 Бэтэл – пасэрей журтыбзэкӀэ абы къикӀыр: Тхьэм и унэщ..

Рахэл Биниамин къызэрыхуэхъуамрэ зэрылӀамрэ

16ИтӀанэ къабгынащ Бэтэл. Ефрат нэсыным зымащӀэ къэнэжауэ, Рахэл лъхуащ, лъхугъэм гугъу иригъэхьурэ. 17Ар лъхугъэм и хьэзабхэм щыхэтым, бынжэпыупщӀ фызыжьым абы къыжриӀащ:

– Умышынэ, иджыри къуэ уиӀэщ.

18Абы и псэр щыхэкӀ дыдэм, сыт щхьэкӀэ жыпӀэмэ ар лӀэрт, цӀэ фӀищащ и быным: Бэн-Они#35:18 Бэн-Они – пасэрей журтыбзэкӀэ абы къикӀыр: си нэщхъеигъуэм и къуэщ.. Ауэ адэр еджащ абы БиниаминкӀэ#35:18 БиниаминкӀэ – пасэрей журтыбзэкӀэ абы къикӀыр: сиӀэ ижьым и къуэщ..

19Арати, Рахэл лӀэри, щыщӀалъхьэжащ Ефрат, нэгъуэщӀу жыпӀэмэ Бэтлэхьэм ухуэзышэ гъуэгум деж. 20Екъуб тригъэуващ абы и кхъащхьэм мывэ сын. Рахэл и сыныр щытщ нобэр къыздэсым. 21ИтӀанэ Израил ежьэри щригъэувыкӀащ и шэтырхэр Эдэр чэщанэм и щӀыбкӀэ.

Екъуб и къуэхэр

22Израил а къэралым щыщыӀэ зэманым Рубэн кӀуэри, и адэм и унэӀут бзылъхугъэ Билхьэ дэгъуэлъащ. Зэхихыжащ ар Израил.

Екъуб иӀэт къуэ пщыкӀутӀ.

23Леа и къуэхэр: Екъуб и щыпэлъху Рубэн, абы и ужькӀэ Симеон, Лэуий, Иудэ, Иссашхар, Зэбулун сымэ.

24Рахэл и къуэхэр: Исуфрэ Биниаминрэ.

25Рахэл и унэӀут бзылъхугъэ Билхьэ и къуэхэр: Данрэ Нафталийрэ.

26Леа и унэӀут бзылъхугъэ Зилпэ и къуэхэр: Гадрэ Ащэррэ. Ахэр Екъуб и къуэхэрщ, Паддан-Арам къыщыхуалъхуауэ.

Исхьэкъ зэрылӀар

27КъэкӀуащ Екъуб езым и адэ Исхьэкъ деж, Мамрэ, е Кириат-Арбэ, нэгъуэщӀу жыпӀэмэ Хэврон, Ибрэхьими Исхьэкъи здэщыӀам.

28Хъурт Исхьэкъ и ныбжьыр илъэсищэрэ ищӀрэ. 29Исхьэкъ и псэр хэкӀри лӀащ, икӀи хыхьэжащ езым и лъэпкъым, жьы хъуауэ, гъащӀэкӀи ирикъуауэ; щӀалъхьэжащ ар Эсаурэ Екъубрэ, езым и къуэхэм.

Currently Selected:

1 Мусэ 35: KbdNTGP2017

Highlight

Copy

Compare