1 Мусэ 34
34
Екъуб ипхъу Динэ лей къызэрырахар
1Леа Екъуб къыхуилъхуа Динэ дэкӀащ а щӀыналъэм ипхъухэм еплъыну. 2Ар къилъэгъуащ а щӀыналъэм ипщ хъыу лъэпкъым щыщу Хамор и къуэ Щэхэм, ар иубыдри здигъэгъуэлъащ, леи кърихащ. 3Абдеж абы и игу кӀэрыпщӀащ Динэ, Екъуб и пхъум, абы пщащэр фӀыуэ илъагъури, псалъэ гурыхькӀэ епсэлъащ. 4Арати, Щэхэм епсэлъащ Хамор, езым и адэм:
– Къысхуэшэ а пщащэр фызу, – жиӀэри.
5Екъуб зэхихащ Хамор и къуэм езым и пхъур, Динэ, къызэригъэпудар, ауэ езым и къуэхэр Ӏэщыр ягъэхъуу губгъуэм щыӀэти, Екъуб зиущэхуащ, ахэр къэкӀуэжыху. 6КъыдэкӀащ Хамор, Щэхэм и адэр, Екъуб деж, абы къепсэлъэну. 7Екъуб и къуэхэри къикӀыжащ губгъуэм, къэхъуар щызэхахым; я жагъуэ хъуащ а лӀыхэм, къызэщӀэнащ губжькӀэ, сыт щхьэкӀэ жыпӀэмэ Израилым и напэр трихащ Щэхэм, Екъуб и пхъум дэгъуэлъри, атӀэми ар мыхъуну щытащ. 8Хамор абыхэм епсэлъэну къригъажьэри, жиӀащ:
– Щэхэм, си къуэр, кӀэрыпщӀащ псэкӀэ фи пхъум; атӀэ къефт ар абы фызу. 9Ӏыхьлы фыкъытхуэхъу; къэдвгъашэ фипхъухэр, дэ дипхъухэри фшэ. 10ТщӀыгъуу фыкъыддэпсэу; мы щӀыналъэр фи пащхьэм илъщ, фыщыпсэу икӀи фыщыщакӀуэ абы, зыӀэрывгъэхьэ ар фыфейуэ.
11Езы Щэхэм яжриӀащ абы и адэми и дэлъхухэми:
– НэфӀкӀэ фыкъызэплъ къудеймэ, сэ фэстынущ сыт фыхуейуэ къызжефӀэми. 12Вгъэнахуэ нысэ уасэу я нэхъ лъапӀэри тыгъэри; сыт къызжефӀэми, фэстынщ; пщащэр фызу къызэфт закъуэ, нэхъыбэ сыхуейкъым.
13Екъуб и къуэхэм жэуапу къратыжащ Щэхэми абы и адэ Хамори хьилагъэ хэлъу; апхуэдэу ахэр щӀэпсалъэр абы езыхэм я шыпхъу Динэ лей къызэрырихар арат;
14– Дэ ар тхуэлэжьынукъым, – къыжраӀащ абыхэм, – ди шыпхъур сунэт ямыщӀа цӀыхум етту; напэншагъэщ ар дэркӀэ. 15Мы зы закъуэрщ дэ дызэрызэгурыӀуэ хъунур: дэ тхуэдэу, фи цӀыхухъу псори сунэт фщӀынырщ. 16Апхуэдэу хъумэ, фэдгъэшэнщ дипхъухэр, къэтшэнщ фипхъухэри, дывдэпсэунщ, зы лъэпкъи дыхъунщ. 17Ауэ сунэт зевмыгъэщӀмэ, ди пхъур тшэжынщи, дыкӀуэжынщ.
18Ягу ирихьащ а псалъэхэр Хамор, Хамор и къуэ Щэхэм. 19ЩӀалэм зимыӀэжьэу игъэзэщӀащ ар; сыт щхьэкӀэ жыпӀэмэ фӀыуэ илъагъурт Екъуб и пхъур. Абы и адэм и унэм исхэм ящыщу псоми нэхърэ нэхъ пщӀэ иӀэт. 20ИтӀанэ Хаморэрэ и къуэ Щэхэмрэ езыхэм я къалэм и куэбжэм деж кӀуэри, щӀадзащ епсэлъэн я къалэм дэс цӀыхухэм, мыпхуэдэу жаӀэурэ:
21– Мы цӀыхухэр мамыру къытхущытщ дэ; щретӀыс ахэр мы щӀыналъэм деж икӀи щрещакӀуэ; щӀыналъэри убгъуауэ илъщ я пащхьэм. Къэтшэнщ япхъухэри фызу, едгъэшэнщ дипхъухэри. 22Мы зы закъуэрщ а цӀыхухэр къызэрыдгурыӀуэнур къыддэпсэуну, зы лъэпкъыуи дызэкъуагъэтыну: абыхэм яхуэдэу, дэри ди цӀыхухъу псори сунэт тщӀымэ. 23Дыдей хъунукъэ абыхэм я Ӏэхъушэхэри, я мылъкухэри, я Ӏэщ псори? Арэзы дызэрыхъуу, псэунущ ди гъусэу.
24Къалэдэс псори едэӀуащ Хаморэрэ абы и къуэ Щэхэмрэ, икӀи сунэт ящӀащ цӀыхухъу псори, къалэдэсу хъуар.
25Ещанэ махуэм, ахэр гукъыдэмыжу здэщылъым, Екъуб и къуитӀым, Динэ и дэлъхухэу Симеонрэ Лэуийрэ, къащтащ щхьэж и джатэр икӀи пэрыуэ щымыӀэу къалэм дыхьэри, яукӀащ цӀыхухъу псори; 26Езы Хамори абы и къуэ Щэхэми яукӀащ джатэкӀэ; Динэ Щэхэм и унэм къыщӀашыжри къыщӀэкӀыжащ итӀанэ. 27Екъуб и къуэхэр яукӀахэм я деж кӀуэри зэрапхъуащ къалэр, я шыпхъум лей къызэрырахам папщӀэ. 28Абыхэм къащтащ адрейхэм я Ӏэщ цӀыкӀуи ини, я шыдхэри, апхуэдэу къалэм сыт дэлъми, губгъуэм сыт илъми. 29ЗэщӀакъуащ абыхэм я мылъку псори, я бын псори, я фызхэри гъэр къащӀащ, зэрапхъуащ унэхэм щӀэлъа псори.
30Абы щыгъуэ яжриӀащ Екъуб Симеонрэ Лэуийрэ:
– Бэлыхь сыхэвдзащ сэ мы щӀыналъэм щыпсэу ханаан цӀыхухэмрэ пэриц цӀыхухэмрэ сыкъалъагъу мыхъуу сызэрыфщӀамкӀэ. Сэ цӀыхуу сиӀэр мащӀэщ; зэхуэсынущ къыспэувыну, сыхагъэщӀэнущ, икӀи дыкӀуэдынущ сэри си унагъуэри.
31Ауэ Симеонрэ Лэуийрэ жаӀащ:
– АтӀэ ди шыпхъум лей ирах хъунут, къэхьпэм хуэдэу!?
Currently Selected:
1 Мусэ 34: KbdNTGP2017
Highlight
Copy
Compare
Share
Want to have your highlights saved across all your devices? Sign up or sign in
© Библиер зэдзэкӀыным елжь Институт, 1993, 2007, 2011, 2017
