ETALEYEHINA 19

1Ihalu erre hunia, etayiru ni obo ariŋ ihuo attorr hutuhe ono eluluŋ waati enne ittok ettedou. Iwuwoŋitai nyia isi jiojio, “Hétahabuyete Hollum! Arai etalahuno iko aduaran buo akuatan a huno Hollum hohoi! 2Obisi eŋotiti hiram honyi buo fe arai hode! Nyio, aŋotok inyi epali jio ehujo somok ninyia ittarrohojio 'to afau te esomiti honyi. Ittigem Hollum inyi inienuniere nooto ono egiamak honyi.” 3Attati isi inyiak iwuwoŋita jiojio, “Hétahabuyete Hollum! 'Tulaŋ 'tulaŋ, adok ahide afuro hima onno oŋiyo 'to abore gala ehittok ania!” 4Attati lahou hula atomuana arrihai haŋuan iko asaŋ huna aŋuan hunne isui 'to irigoŋo ifau, ette itahabuyo Hollum, linyia itoŋo 'to iseger ilohittok. Ojiori nyia isi jiojio, “Amen! Hétahabuyete Hollum!”

Agari ono Ayama ono Olosobe

5Attati obo etuk itayiruno to seger ilohittok onno ojio jio, “Itahabuyete Hollum hohoi, itai egiamak honyi 'daŋ, itai 'daŋ hulle ibaŋata 'to inyi, ikatai 'daŋ aati asai iko elettaha!” 6Attati ni itayiruna obo ariŋ ihuo attor hutuhe ono eluluŋ waati, ihuo ecuri hari kuyya ihuo etiri hilai. Ojiori nyia isi jio, “Hétahabuyete Hollum! Nyio, Hollum hohoi Laduarani, Lamonye, inyi Hobu! 7Hamunoti buo fe esahuta! Hétahabuyete akuatan honyi! Nyio, alum ayama ono Olosobe, buo fe oduoti onno olo inyi iyemuna, ihuhum ahuan honyi. 8Itiyyafani jihonyi aboŋo enne ilaman buo fe opipiak.” (Itahutak aboŋo ania ehanita waati Hollum hunno obisi 'to.)

9 # Mat 22:2-3 Attati ajilo lia jiaran jihoŋ, “Igiorok erre huna: hotomunohi hia, hulle iloŋuni igari yama ono Olosobe.” Ette buo fe jiaran jio, “Ekenita Hollum hunia hode.”

10Aruboho nyia ni ifau ihosiere hejek honyi itahabuyere inyi, buo inyi ette jiaran jihoŋ, “Hèhanio ihou nyia! Ara ni a hegiamani ihuo iyye, buo fe ihuo eruhok hullomuk 'daŋ, hullo ogottierek 'to elahode ninyia italeyehi Yesu. Itahabuye Hollum!”

Elahode ania nyia itajiŋak ekenita itajia hekianak Hollum.

Lia, alla Adahari 'to Akusan Aboŋ

11Attati ni igonyuna edou aŋaa. Owon nyia obo akusan aboŋ diya. Iloŋoi nyia lia, linyia adahari 'to inyi, oloyijio alla ara 'to hode. Obis aŋocio hiram honyi iko erumita honyi. 12Owulori nyia oŋite honyi ihuo eema. Iyyafatio nyia inyi egoriahien arriai ihou honyi. Igioroni nyia obo afure jihonyi, onno obeŋ tulo omijak arari fe inyi hama. 13Iyyafatio nyia inyi aboŋo onno owon iko nooto. Afure honyi “Ekiana Hollum.” 14Ijifani nyia inyi oseŋer huttedou, hunyia adahai 'to ta akusani, buo iyyafani aboŋojin abuoŋi hunne ilamani buo fe opipiahi. 15#Eta 14:20To hutuk honyi, ojiŋu nyia ademi erremit onno ofi 'to, itatturiere afauhien. Ilohittok adi inyi jio afauhien hunia obeŋ amehino. Omot adi inyi eŋijiti fino imotit fino anna ara 'to ajore Hollum Laduarani. 16Jio aŋati boŋo enne itihok 'to olohuya honyi, igioro nyia afure ana: “Inyi Hobu alla agalik 'to 'daŋ buo fe ara a Lamonye alla agalik 'to 'daŋ.”

17Attati ni igonyuna obo ajilo owotia ihide holoŋ, ette ikiana woŋ woŋ jio aheny 'daŋ hunyia iddarratai 'to ihide idou jiojio, “Ifuanna, ettubanio jio agari Hollum enne ittokon! 18Ifuanna ehonya oobuok, ajafiti, oseŋer, akusani iko aati hunyia adaharik 'to isi. Ifuanna ehonya aati 'daŋ; apiti iko hullo obeŋi 'to arai apiti, elettaha iko aati asai.”

19Attati ni igonyuna ahuanyani iko oobuok hutta fau buo oseŋer hosi. Ottubanie nyia isi irriomoniere iko lia, linyia adaha 'to ta akusan, buo fe irriomoniere iko oseŋer honyi. 20#Eta 13:1-18Anyarai nyia ahuanyani ania iko ekianani enyabani ollo ojio 'to jio ekiana inyi eram Hollum, linyia ihanio 'to eduariti ihosiere ahuanyani ania. (Inyob nyia inyi aati hunyia ifuotuni 'to eherit ahuanyani ania iko hia, hunyia itahabuye 'to arrijiori honyi.) Ibironi nyia isi 'daŋ arrihai hesui itua tafar ono efuoto amunek onno owulo 'to ahima. 21Buo ottohori oseŋer hosi ta ademi erremit ninyia ojiŋu 'to to hutuk lia, linyia adaha 'to ta akusan. Attati aheny 'daŋ ihonya isi many oyuhorik.

Currently Selected:

ETALEYEHINA 19: EA2003

Highlight

Copy

Compare