ETALEYEHINA 18

Akuaharu Babilonia

1Ihalu erre hunia, egonyu ni obo ajilo ottu tedou. Owon nyia inyi iko elohittok, buo akuatan honyi ette itafaŋ afau 'daŋ; 2#Eta 14:8ette ikiana woŋ woŋ jiojio, “Akuaharu tibuo inyi! Akuaharu tibuo Babilonia, abore gala ehittok! Amanyarik inyi aminiaŋa, oloholioo hunno orrohoji 'to, awoi heny 'daŋ hunno orrohoji 'to iko hunne iboti 'to. 3Nyio, itaruma inyi awoi waati 'daŋ te esomiti honyi hunna agalihini 'to 'daŋ, ihuo enne itamat inyi isi abalu. Ojotorik obuok fau 'daŋ inyi, buo apocok hutta fau ette isaman ta asomon honyi onno orroho 'to.”

4Attati ni itayiruna obo etuk hama tedou ojio:

“Aati hoŋ, ifuanna addi to Babilonia!

Hèjiŋana luŋa jio eyyata honyi;

ŋadi ifuatta irumana ettigemita hunno olo inyi irumana!

5Nyio, ifuroi eyyata honyi delle many lidou,

agilu buo fe Hollum eyyata honyi.

6Ihaniete jihonyi ihuo ihanio inyi jihatai.

Inienuna enyiahita arrihai ehanita 'daŋ hunne ihan inyi jihatai.

Itufutana ilamatit honyi abalu onno odua 'to bebe enyiahita arrihai,

agalik ninyia isiarak inyi jihatai.

7Isiatta jihonyi ettigemio iko ejiriŋa onno oremik 'to

te etahuoro honyi ahuan honyi iko ta amanya honyi te etadara.

Nyio odulo nyia ekiana hama jiojio:

‘Etoŋo ni ihuania, a hobu!

Abeŋ ni ara ehidak,

abeŋ ni ajio arumak obo ejiriŋa!’

8Te eram ania, orumak adi inyi obo oloŋ ettigemita…

aŋuai, ejiriŋa, iko ahure.

Osuahini adi inyi Ihima,

nyio, odua Hollum Lamonye, ollo oŋot 'to eram honyi.”

9Atarihai adi oobuok fau hunyia ojotorik 'to inyi buo fe amanyai ikonyi arabotie te etadara. Oyyooi adi isi elle igonyuni isi afuro hima onno oŋiyo 'to inyi. 10Itabaŋi adi ettigemita hunne ifuotu inyi isi, ette isi iwotia alamarai, ette jiaran, “Yii nani! Yii nani! Babilonia, abore gala ehittok onno ohu 'to! Ihuania, attu ettigemio jihoi turunyaŋ!”

11Te eram honyi, atarihai adi apocok hutta fau buo oyyooi, nyio, abeŋ tulo inyiak inyiaŋa erre hosi. 12Abeŋ tulo inyiaŋu jihosi ayyel, abilata aboŋ, amoruoi hunno opipiahi 'to iko asihira hunna arai emuluyak; aboŋojin hunne igarawaji, hunna arai eregio iko hunno odori; awoi heyek 'daŋ hunno oŋuoji gir gir, erre 'daŋ hunne ihuhumuni to halai tome, to heyek hunno ogoli te enyiaŋa, te efelek, to bilata iko to moruoi hunne ilamani 'to. 13Obeŋ nyia tulo inyiaŋu jihosi, awoi riahien iko ayali 'daŋ hunne iyalai; afino, eyali huŋuro, neefua, nemma, nesuŋ, akioro, akusani iko akarlohien, apiti iko aati hullomuk. 14Ojiori nyia apocok jihonyi jio, “Abeŋi erre 'daŋ hunyia iwak iyye a hunohoi. Atuhoroi esamiti iko elamanita hoi; ibeŋ adi iyye inyiak irumana isi!” 15Itabaŋi adi ettigemita hunne ifuotu abore gala ania apocok hunyia orumani 'to esamiti ta apoco hosi diya. Owotia adi isi alamarai ette iyyoo buo ijiriŋai, 16ette jiaran, “Yii nani! Arroho jio abore gala ehittok! Iyyafatio nyia inyi aboŋojin hunne igarawaji, hunna arai eregio iko hunno odori; buo fe oburuhak ahuan honyi ta ayyel iko ta amoruoi hunno opipiahi 'to buo asihira hunna arai emuluyak. 17Ati jio turubeny, atuhoroi esamiti honyi 'daŋ ta asaa abotie.”

Owotiai nyia ajafiti hayirok baburi alamarai; isi iko adak baburi buo ayirok baburi iko aati hullomuk 'daŋ, hulla amanyai 'to ta apoco itua hari enne ittok. 18Ninyia igonyuni isi afuro hima ninyia oŋiyo 'to Babilonia, ette isi jiaran, “Anani bore gala onno orriamari 'to iko abore gala ehittok ania!” 19Opurani nyia isi aboro ihossi hosi, ette iluluo buo fe oyyooi jiojio, “Yii nani! Arroho jio abore gala ehittok! Abore gala ninyia asamarik aati hullo opocoi 'to itua hari enne ittokon ta ababuri, ta asaman ottononyi! Ati, jio turubeny, atuhoroi erre honyi 'daŋ ta asaa abotie!”

20Ijiara amuno hatawana lidou, jio aati Hollum, jio lefahat iko jio ekianak Hollum; nyio, aŋotok Hollum epali jihonyi te ehanita honyi jihatai.

21Attati obo ajilo ellettok iduhuna amoruo anna ara ihuo nonye hiriai, ette iruoŋonia itua hari enne ittok, ette jiaran, “Ihua ana adi opuasari Babilonia, abore gala ehittok. Obeŋ adi inyi inyiak iwanan. 22Teyya, obeŋi adi inyiahi itayiruna erribok dorri, edolok, ahutak cuwali, iko ahutak furuju. Otuhoroi adi buo fe ehuhumak hirre hatai 'daŋ; obeŋi adi erieyo hatai inyiak itayiruno! 23Obeŋ adi obo allomo inyiak iwulori jihoi. Obeŋ adi obo ayama inyiak iwanan dinia. Agalihini nyia apocok hoi apocok 'daŋ ta fau. Inyobio nyia iyye aati 'daŋ ta fau ta abuana hoi!”

24Itua bore gala hoi, onyurani nyia nooto hekianak Hollum iko ono aati honyi buo ono aati 'daŋ hunyia ottohori ta fau.

Currently Selected:

ETALEYEHINA 18: EA2003

Highlight

Copy

Compare