ETALEYEHINA 14

Olosobe iko Aati Honyi

1 # Eta 7:3 Attati ni imi, ette ni igonyuna Olosobe owotia ihide Doŋe Sayon. Owon nyia inyi iko aati 144,000. Igioro nyia afure honyi iko ono Monyonyi ihomomite hosi. 2Etayiru nyia ni obo netuk ottu tedou. Okuat nyia inyi ihuo ecuri hari kuyya ihuo etiri hilai. Itir nyia inyi ihua adorri hunne irribie erribok hosi. 3Idoloi nyia aati hula 144,000 afure aŋejuk ihosiere seger ilohittok, ihosiere asaŋ huna aŋuan hunne isui 'to iko ihosiere lahou. Obeŋ nyia tulo ittiyenu afure enne idoloi isi ania, arari fe isi hama hunyia italahuni ta fau. 4Isi hulia, hullo obeŋi 'to itiboti ahuattek hosi te erre ŋoruo. Obeŋ obo jihosi ottir aŋotte. Isi hulia hulle ijifatie 'to Olosobe imasik 'daŋ hunna alari inyi. Italahuni nyia isi tehiji waati 'daŋ. Arai isi etterita isiorita hunyia isiori jio Hollum iko jio Olosobe. 5Obeŋi nyia itayiruni obo agesem to hutuhe hosi, nyio, obeŋi nyia isi ipali.

Ajilohien hula Hunihoi

6Attati ni igonyuna obo ajilo idarrata ihide dou. Owoni nyia Asayyo Ayijok hunno osioi 'to 'tulaŋ jihonyi, iramaniere jio aati hutta fau 'daŋ, awoi waati 'daŋ, jio ekenita waati 'daŋ iko jio afauhien 'daŋ. 7Ikiana nyia inyi woŋ woŋ jio jio, “Abaŋata Hollum buo fe isiatta jihonyi akuatan! Nyio, attu asaa onno oŋociere inyi eram waati 'daŋ. Itahabuyete inyi, ayyani olo nedou iko nafau buo aari enne ittokon iko olotilihi 'daŋ!”

8 # Eta 18:2 Ijifak nyia obo ajilo etarrihi jio etteri, ette jiaran, “Akuaharu tibuo inyi! Akuaharu tibuo Babilonia, abore gala ehittok! Itaruma inyi awoi waati 'daŋ te esomiti honyi hunna agalihini 'to 'daŋ, ihuo enne itamat inyi isi abalu.”

9Ijifak nyia buo fe obo ajilo etahunihi jio hula arrihai hulia, ette ikiana woŋ woŋ jiojio, “Hia, hunyia itahabuye 'to ahuanyani iko arrijiori honyi, buo fe ifuotuni eherit honyi ihomomite kuyya ihas hosi, 10amati adi buo fe isi abalu Hollum enne iyaŋuno 'to ajore honyi, enne idolok inyi ilamatit te eloŋojita! Ihosiere ajilohien aliborok iko ihosiere Olosobe, ittigemie adi hia 'daŋ hulle ihani 'to ihuo nyia, te eema iko te efuoto onno owulo 'to ahima. 11'Tulaŋ 'tulaŋ, odulo adi afuro duk duk ono eema enne ittigemio isi. Afanni iko arue, obeŋ adi ayiri jio hia 'daŋ hulle itahabuye 'to ahuanyani iko arrijiori honyi, buo fe ifuotuni eherit fure honyi.”

12Jio aati Hollum, hullo ogottierek 'to efahita honyi buo fe iruhi Yesu, awak eram ania oŋida isi odulori adihan.

13Attati ni itaniŋuna obo etuk ottu tedou onno ojio jio, “Igiorok eram ana: Itterio ahana many moi, hotomunohi hia hullo orumani 'to naye te negiama hosi jio Lamonye!”

Itarraŋ Oloholio jio, “Obis hode jio, oyiri adi isi jio afuto hosi, nyio, ofuoi adi ehanita hosi ikiana tesi!”

Adioŋo atta Fau

14Attati ni imi, ette ni igonyuna obo edis aboŋ, buo obo ariŋ itoŋo ihide honyi enne iyyalu atulo, enne iyyafatio egoriai 'yel ihou honyi, buo owon iko ademi edeŋit ihani honyi. 15Attati ajilo ollobo ijiŋuna to tua haji emojit enne ittokon, ette iloŋo woŋ woŋ jio, “Odioŋori ademi hoi, nyio, alum oloŋ ono adioŋo; aŋida amana atta fau!” 16Attati lia, linyia itoŋo 'to ihide idis idioŋori ademi honyi, ette deŋuna amana atta fau.

17Attati ni igonyuna ajilo ollobo ojiŋu to tua haji emojit enne ittokon ettedou. Owon nyia buo fe inyi iko ademi edeŋit onno ofi. 18Attati ajilo ollobo ijiŋuna te ititiek ehumi; inyi ajilo attoŋoni hima. Ikiana nyia inyi woŋ woŋ jio ajilo linyia owon 'to iko ademi edeŋit onno ofi 'to jiojio, “Iduhu ademi hoi, oŋeru eŋija fino hutto mana fau hunia, nyio, adori isi.” 19Ania, ette ajilo lia iŋiarari ademi honyi, ette iŋeruna eŋijiti fino to 'yani hosi, ette ibironia imotit fino ono ajore Hollum. 20#Eta 19:15Omocie nyia eŋijiti fino hunia imotit fino onno owon 'to iller bore gala, ette nooto itihuna te motit fino ania, ette ittittor amaili esiha arrihai. Ara nyia awudori honyi ihuo ayardahien arrihai.

Currently Selected:

ETALEYEHINA 14: EA2003

Highlight

Copy

Compare