1Korinto 6

Asamon Jio Kristiani ihuo Itai

1Alla awon eram ihiji obo alatai iko obo olo Kristiani ihuo inyi, nyioti orinyak inyi etiwwahio Kristiani alia ilokikohien waati atimok Hollum? Nyioti obeŋ inyi isiarak aati Hollum itabisani eram hosi? 2Itimoti itai jio aati Hollum adi oŋoti eram waati hutta fau? Elle iremehina itai iŋot eram waati hutta fau, ogol ti inyi jihatai iŋociere erre hullo omutari 'to? 3Itimoti itai jio, efuo adi iŋot eram ajilohien? Alla ara ihuo nyia, eremik fe luŋa iŋot erre huno amanya ana, agalik 'daŋ. 4Alla adiotoi omuk erre ihuo hunia, nyioti iyatti itai isi jio aati hullo obeŋi 'to oyiji to hosiere heruhok iŋociere isi? 5Ijiara ariri oŋiye itai! Obeŋ tulo tehiji hatai elle ilofioro iŋociere eram ette ihiji omuk hulo Kristiani? 6Ati, inyiak olo Kristiani itawojio illanyi ihosiere waati hullo obeŋi 'to owoni iko neruk iŋociere eram hosi. 7Te eyatta hatai aŋalafita huttehiji hatai ilokikoi, itahutak ania jio ibiaŋata itai luŋa irata a Kristiani. Obeŋ duo soho luŋa iyyak elle ihanie onno orroho jihatai? Obeŋ duo soho luŋa iyyak alla ahorotie erre hatai? 8Ati inyiahata itai ta ahuattek, ihanio onno orroho buo fe ihorotiete, ara duadi bu eruhok hullomuk. 9Imijana itai luŋa jio, ittallihi arrohojak irutana Olobie Hollum. Hènyobiete ahuattek hatai! Duadi bu arrohojak kuyya aati hulle itahabuye 'to arrijiorita jiohin, kuyya asomok, kuyya aliawa hullo ojotorik aliawa ihuo isi iko aŋoruo hunno ojotorik aŋoruo ihuo isi, 10kuyya ahahalak, kuyya aŋarujok, kuyya arumak, kuyya emimorok waati, kuyya ahorok…obeŋi isi 'daŋ ofuoi irutana Olobie Hollum. 11Arai nyia omuk hulatai ihuo nyia. Ati italibori nyia itai, igialani itai a hulo Hollum, buo fe ihanani a habisak to hosiere Hollum, to Yesu Kristo Lamonye iko to Oloholio Hollum hohoi.

Igiamatti Ahuattek Hatai Itakuaciere Hollum

12 # 1Kor 10:23 Ojio adi obo jio, “Aŋatani nani ihaniere erre 'daŋ.” Ati obeŋi erre 'daŋ oyiji jihoi. Aremik ni jiaran jio, aŋatani nani ihaniere erre 'daŋ, ati ettallik ni iŋatana obo ariŋ ihanak nani apit honyi. 13Ojio adi buo fe obo jio, “Ara aŋiyo ahono ohe, buo fe ohe ara ahono aŋiyo.” Ati, itamuhi adi Hollum isi 'daŋ. Obeŋ ahuan ara ehani hirre somon, ati ara ahuan ahono Lamonye buo Lamonye ara a holo nahuan. 14Itubuhu nyia Hollum Lamonye toye, itubuhu adi buo fe inyi hohoi ta agolon honyi.

15Itimoti ti itai jio arai ahuattek hatai aŋacio huan Kristo? Ijiara ti nani eduhu aŋati huan Kristo oŋida ara aŋati huan esomo? Obeŋ 'tuŋ! 16Itimoti ti itai jio, lia elle inosok 'to ahuan honyi iko esomo, arai isi luŋa ahuan abotie? Ihuo igioroni ibuk Hollum jio, “Arai adi isi 'daŋ ahuan abotie.” 17Ati lia elle inosonio 'to iko Lamonye arai adi isi abotie ikonyi to Oloholio.

18Idehina erre somon. Ittallik obo eyyau hama enne ihan atulo ittarroho ahuan tulo; ati atulo elle ihanio 'to erre somon, ittarroho inyi huno ahuan honyi. 19#1Kor 3:16; 2Kor 6:16Itimoti itai jio arai ahuattek hatai ahaji anna amanyari Loholio Olibo linyia isiarak Hollum jihatai? Ibiaŋata itai irata a hulo ahuattek hatai, ati irata a hulo Hollum; 20inyiaŋuni nyia itai te enyiaŋi. Tania, igiamatti ahuattek hatai itakuaciere Hollum.

Currently Selected:

1Korinto 6: EA2003

Highlight

Copy

Compare