1Korinto 12

Esiorita hunne Iyaŋuno Loholio Olibo

1Ihuania, illarak iko haniyarak hoŋ, te eram ono esiorita hunne iyaŋuno Loholio Olibo, abeŋ ni awak itai irasati a hatimok. 2Imijana itai jio ninyia hésata itai a hatimok Hollum, itisiabari nyia itai te ekotia arriai imojori jio arrijiorita hunno obeŋi 'to isui. 3Tania, awak ni itai imijana jio, ittallik atulo alla adaha 'to to Oloholio Hollum jiaran jio, “Ijiara epit ottu jio Yesu!” Ittallik buo fe lobo jiaran jio, “Ara Yesu a Lamonye!” arari fe elle iyyahatio Loholio Olibo inyi.

4 # Rom 12:6-8 Owoni esiorita gele gele, ati ahuan Loholio lia abotie isiorio isi. 5Owoni buo fe ekotia gele gele hunne igiamarik, ati igiamarik jio ahuan Lamonye lia abotie. 6Owoni buo fe egoliti gele gele igiamari, ati ahuan Hollum isiarak isi jihohoi 'daŋ ababo. 7To obo ekoi, italeyehini awanan Loholio jio aati 'daŋ ababo, iyaŋuniere ayiji jihosi 'daŋ. 8Isiarak Oloholio jio lobo agolon ikianari olofioro, buo ahuan Oloholio alia buo fe isiarak jio ollobo agolon ikianari amijana hirre. 9Isiarak buo fe ahuan Oloholio alia jio lobo neruk, buo inyi isiarak jio ollobo aduaran ono etaŋidario. 10Oloholio alia buo fe isiarak jio obo aduaran ihaniere eduariti; buo jio obo agolon ikianari asayyo Hollum; buo jio obo agolon iheruniere esiorita huno Oloholio jio esiorita hunno obeŋi 'to arai ahuno Oloholio; buo isiarak jio lobo agolon ikianari etuhe hunno olufaji; buo jio lobo agolon itahuciere etuhe hunno olufaji 'to hunia. 11Ahuan Oloholio alia ihan erre hunia 'daŋ; inyi ohorio esiorita gele gele jio aati 'daŋ ababo, ihuo awak inyi.

Ahuan Abotie iko Aŋacio Arriai

12 # Rom 12:4-5 Ara Kristo ihuo ahuan abotie, onno owon 'to iko aŋacio arriai. Arasa ahuan abotie, duadi bu owon inyi iko aŋacio arriai. 13Ihuo nyia buo fe, era duo bu Yudei kuyya Alufajak, apiti kuyya obiaŋara apiti, itifuotoni nyia batisimo jihohoi 'daŋ ta ahuan Oloholio alia, irari ahuan abotie. Itufutak Hollum jihohoi 'daŋ ahuan Oloholio alia. 14Nyio, obeŋ ahuan owon iko aŋati abotie ijiai, owon inyi iko aŋacio arriai. 15Alla ajio duo eeju jio, “Ta abiaŋan hoŋ irahan ahani, abeŋ ni ara aŋati huan,” ittallik ania itapuak arahan honyi aŋati huan. 16Alla ajio duo buo fe eyyok jio, “Ta abiaŋan hoŋ irahan onyek, abeŋ ni ara aŋati huan,” ittallik ania itapuak arahan honyi aŋati huan 17Alla ara duo ahuan 'daŋ ahonyek, itayirio duoti inyi aŋai? Buo alla ara duo ahuan 'daŋ ahiyyok, iŋuada duoti inyi aŋai? 18Ati ihuo ara inyi, ittuttubak Hollum aŋacio huan 'daŋ ababo ihuo awak inyi. 19Owon duo ahuan ajia, alla ara duo inyi 'daŋ aŋati abotie? 20Ihuo ara inyi, oluaji aŋacio huan, buo ara ahuan abotie.

21Tania, ittallik onyek ijiaran jio aani jio, “Abeŋ ni awak iyye!” Ittallik buo fe ahou jiaran jio eeju jio, “Abeŋ ni awak iyye!” 22Ati, ettallik tibuo imanya obeŋi aŋacio huan hunna arai 'to ihuo ollo ojoni. 23Ettoŋotio tibuo onno oyyu, aŋacio hunne egigilo jio, arai asai; buo fe ehum ihuhumio onno oyyu aŋacio huan hunna aŋariji 'to to honyek; 24ehuhumio onno obeŋ osiru jio aŋacio huan hunne ilamani 'to. Hollum ta ahuan honyi ittuttubak nahuan arabotie iyaŋuniere ayiji jio aŋacio hunne egigilo jio aŋariji, 25jio oŋida ebubuanya obeŋ to huan. Ati oŋida aŋacio huan 'daŋ ababo igigiloi to hunnomuk. 26Alla adiaha aŋati huan abotie, ette buo fe aŋacio huan 'daŋ hunnomuk idiaha ara abotie ikonyi; elle itahuye aŋati huan abotie, ette buo fe hunnomuk 'daŋ imuno arabotie ikonyi.

27Itai 'daŋ ahuan Kristo, irata 'daŋ ababo aŋacio huan honyi. 28#Efe 4:11Jio eluluŋ heruhok, isiarak Hollum jihosi amasik ababo, etteri jio efahat, etarrihi jio ekianak honyi, etahunihi jio ettiyanak, attati teya jio ehanak iduariti, etaŋidarak, aluak, ellettaha, ekianak hutuhe hunno olufaji 'to. 29Arai ti isi 'daŋ elefahat? Arai ti isi 'daŋ ahekianak Hollum? Ihanie ti isi 'daŋ eduariti? 30Owoni ti isi 'daŋ iko aduaran itaŋidariere? Ikianai ti isi 'daŋ te etuhe hunno olufaji? Isi ti 'daŋ itahucie etuhe hunno olufaji 'to hunia? 31Otuhonia atajia hatai 'daŋ jio esiorita hunna agalihini 'to ta ayiji. Ekoi anna agalik 'to 'daŋ inyi ana.

Currently Selected:

1Korinto 12: EA2003

Highlight

Copy

Compare