1Korinto 11

1 # 1Kor 4:16; Fil 3:17 Tania, ijifatiete ehanita hoŋ, ihuo enne ejifatiere ni ehanita Kristo.

Emuhonia Hou to Maji Imojit

2Oyiji ehanita hatai bebe, nyio, oŋitek 'daŋ, ibiaŋata itai iguotti ani, buo fe ibiaŋata iguotti ettiyenita 'daŋ hunyia efuotok ni jihatai. 3Ati, awak ni itai imijana jio, ilohittok Kristo jio aati 'daŋ, buo alle ilohittok jio ŋoruoi honyi, buo Hollum ilohittok jio Kristo. 4Tania, latulo ollo omojo 'to kuyya elle ittittoyo 'to eram Hollum buo ahou honyi imuho, itanyahi inyi Kristo ariri. 5Buo aŋotte onno omojo 'to kuyya enne ittittoyo 'to eram Hollum ihiji waati buo ahou honyi obeŋ imuho, itanyahi buo fe inyi habi honyi ariri. Orriama inyi iko aŋotte onno ogita hou. 6Alla abeŋ aŋotte imuhok ahou honyi, ijiara ti ogita oofir honyi addi. Ati, ta arahan honyi ariri jio aŋotte isusumari ahou kuyya igitari oofir honyi addi, ijiara inyi imuhok ahou honyi. 7Obeŋ osiru jio alle itihoniere oofir honyi, nyio, iyyalu inyi arrijiori iko akuatan ono Hollum. Ati, iyyalu aŋotte akuatan ono atulo; 8nyio, obeŋi nyia oyyeuni alle to huan ŋotte, ati, oyyeuni nyia aŋotte to huan 'le. 9Obeŋi nyia buo fe oyyeuni alle te eram ŋotte, ati oyyeuni nyia aŋotte te eram 'le. 10Te eram ono ajilohien, ijiara luŋa aŋotte iyyafak amannir ihou honyi, itahutaniere jio awon inyi jio elohittok ono habi. 11Ati jio amanya ottono Kristo, ittallihi aŋoruo iwanan alla abeŋi aliawa, buo fe aliawa ittallihi iwanan alla abeŋi aŋoruo. 12Nyio, ihuo ninyia oyyeunierek aŋotte to huan 'le, ihuo nyia buo fe, isiu aŋotte alle; buo Hollum oyyeu erre 'daŋ.

13Oŋototo eram ania ta ahuattek hatai, alla abis inyi jio aŋotte imojori jio Hollum ihiji waati, buo obeŋ imuhok ahou honyi. 14Obeŋ soho amanya ottoloŋi ittiyenio jio, obeŋi oofir hunno ohodori 'to osiruni jio alle; 15buo arai elamanita jio aŋotte? Nyio, isiori jio aŋotte oofir hunno ohodori 'to oŋida arai emuhi. 16Ati, alla awak obo itarisa te eram ania, ijiara ani ajio jio, ebeŋ hohoi iko eluluŋi heruhok Hollum arriai, ewon iko obo ekoi emojit onno olufa.

Aŋiyo ono Lamonye

(Mat 26:26-29; Mar 14:22-25; Luk 22:14-20)

17Ati, jio ettiyenita hoŋ hunno ofuonni 'to huna, abeŋ ni amuno itai, nyio, iyaŋuno amojo hatai arabotie arrohoji agalik ayiji. 18Ahosiere, iramani jihoŋ jio, owon ebubuanya ihiji hatai, elle imojoti itai arabotie. Eruk ni jio arai erre hunia kai hode. (19Hode, ijiara luŋa ebubuanya hatawana ihiji hatai, oŋida abisak huttehiji hatai ihumi leyo.) 20Elle ittubaniete itai arabotie, obiaŋara aŋiyo ono Lamonye enne iŋiyete itai. 21Nyio, elle iŋiyete itai, itterie omuk aŋiyo buo hullomuk hobeŋi afanyi, ania, arasarik omuk ahaniamak, buo omuk orumai. 22Obeŋi soho ahaŋitek jihatai hunne iŋiyetti itai buo fe imatati? Kuyya iyasiete itai eluluŋ heruhok Hollum buo fe itanyahina alociaŋak ariri? Anyio adi anna ajio ni jihatai? Amuno adi ni itai? Obeŋ, ettallik ni imuno itai!

23Nyio, ettiyenita hunne efotok ni hunia jihatai, efuotu nyia ni isi jio Lamonye. Jio attari ninyia itinyiaŋanierek inyi, iduhu nyia Yesu Lamonye emune, 24ette isiarana ahumo jio Hollum, ette ibeny, ette jiaran, “Ahuan hoŋ ana, anna ara 'to tetai. Ihaniete ihuo nyia, igiluttari ani.” 25Ihuo nyia buo fe, ihalu ŋiyo, ette inyi iduhuna ematit, ette jiaran, “Ara ematit ana ecorit aŋejuk enne itasiruni to nooto hoŋ. Elle imatata itai inyi, ihaniete ihuo nyia, igiluttari ani.”

26Ajiaran ania jio, oŋitek 'daŋ, elle iŋiyete itai emune ana buo fe imatati afino otto ono ematit ana, iramiete itai eram ye ono Lamonye, many ocohuniere inyi.

27Tania, alla anya lobo jihatai emune ania kuyya amat afino otto imatit ono Lamonye te ekoi onno orroho, ihan atulo alia eyyau jio ahuan Lamonye iko jio nooto honyi. 28Tania, ijiara inyi ihum do imi ahuan honyi, attati iŋiyo emune ania buo fe amat afino otto imatit ania. 29Nyio, itaŋotok adi inyi epali ihuan honyi, alla aŋiyo inyi emune ania buo fe amata afino otto imatit, buo obeŋ omijak awoyo hiram ono ahuan Lamonye. 30Inyi onno oluajiarik aŋuak iko ajanak jihatai, buo fe omuk ayei. 31Elle ehum imi ahuattek hohoi, obeŋi adi oŋotoni obo epali jihohoi. 32Ati oŋot Lamonye eram hohoi buo fe ittigemio hohoi jio, oŋida bati obeŋi oŋotoni epali jihohoi arabotie iko aati hutta fau.

33Ihuania, illarak iko haniyarak hoŋ, elle ittubaniete itai iŋiyere aŋiyo ono Lamonye, itilati aati hullomuk. 34Buo alla aniama obo alatai, ijiara inyi oŋiyo ihaŋ, ŋadi irumana aŋotonia ipali elle ittubati itai arabotie. Alla arai erre hunnomuk, attu adi ni ihuhumana alla afany ni.

Currently Selected:

1Korinto 11: EA2003

Highlight

Copy

Compare