Luk 6:27-49

Yêsu oei bơtho lu sư thoi âu: “Na Inh pơma kơ iĕm mă mơ̆ng Inh: Iĕm athei 'mêm mơnat kơ lu bơngai mă pơm kơnê̆ kơ iĕm, pơm 'lơ̆ng kơ lu bơngai mă areh kơ iĕm. Pơma rơngơp kơ lu bơngai mă hiap iĕm, krao khan apinh 'Bok Kei-Dei tơgŭm lu bơngai hil kơ iĕm. Tơ̆ng đe tap 'bŏ iĕm gah 'ma, iĕm athei ăn hloi gah 'ngiĕo. Tơ̆ng đe iŏk ao iĕm minh blah, iĕm athei ăn hloi 'bar blah. Bu apinh tơmam kiơ đơ̆ng iĕm, iĕm athei asong hloi. Tơ̆ng đe iŏk tơmam iĕm, iĕm 'nĕ pă pơdrĕo. Bơ̆n wă kơ đe pơm 'lơ̆ng kơ bơ̆n dang yơ, bơ̆n athei pơm 'lơ̆ng kơ đe dang ei mơ̆n. “Dah iĕm 'mêm pôm lu bơngai mă 'mêm kơ iĕm đĕch, lei 'Bok Kei-Dei ưh kơ lăp đon ôh. Bĭ lu bơngai yoch kư̆m băt băi 'mêm kơ bơngai mă 'mêm kơ sư mơ̆n. Dah iĕm pơm 'lơ̆ng kơ lu bơngai mă pơm 'lơ̆ng kơ iĕm đĕch, lei 'Bok Kei-Dei ưh kơ lăp đon ôh. Bĭ lu bơngai yoch kư̆m băt băi pơm 'lơ̆ng kơ lu bơngai mă pơm 'lơ̆ng kơ sư mơ̆n. Gah tơdrong ăn kơ đe mơng jên iĕm, dah iĕm ăn kơ pôm lu bơngai mă iĕm băt sư gô pơdrĕo kơ iĕm tơpă đĕch, lei 'Bok Kei-Dei ưh kơ lăp đon ôh. Lu bơngai yoch, dah sư băt kơ tơduă lu sư bơngai yoch gô pơdrĕo tơpă, lei sư kư̆m ăn kơ lu bôl sư mơng jên sư mơ̆n. Thoi noh na iĕm athei 'mêm, pơm 'lơ̆ng kơ lu bơngai mă pơm kơnê̆ kơ iĕm. Iĕm athei ăn kơ đe mơng jên iĕm păng 'nĕ pă hơmĕng kơ jên noh. Tơ̆ng iĕm pơm thoi noh, 'Bok Kei-Dei gô apah iĕm tih tơpă păng iĕm jing kon Kră Yang Tih Hloh, yua kơ Sư kư̆m pơm 'lơ̆ng kơ lu bơngai kơnê̆ păng lu bơngai mă ưh kơ băt bơnê kơ Sư mơ̆n. Iĕm athei 'mêm mơnat kơ đe kư̆m thoi lĕ 'Bă bơ̆n 'Bok Kei-Dei 'mêm mơnat kơ đe mơ̆n. “Iĕm 'nĕ bâu roi đe, khan đe bơngai ưh kơ 'lơ̆ng. Dah iĕm jô̆ kơ đe bơngai ưh kơ 'lơ̆ng, kơnh 'Bok Kei-Dei kư̆m jô̆ kơ iĕm bơngai ưh kơ 'lơ̆ng mơ̆n. Iĕm 'nĕ kơ jâu đe, na 'Bok Kei-Dei huay kơ jâu iĕm. Iĕm 'nĕ kơ jô̆ yo kơ đe wă kơ 'Bok Kei-Dei huay kơ jô̆ yo kơ iĕm. Iĕm athei mơnat, tơgŭm đe, na 'Bok Kei-Dei kư̆m mơnat tơgŭm iĕm mơ̆n. Sư gô tơgŭm iĕm lơ tơpă kư̆m dang lĕ đe ăn đĕch kơ iĕm minh kơ'mŭng 'ba 'bĕnh blai rơkah rơkai. Iĕm tơgŭm đe dang yơ, 'Bok Kei-Dei gô tơgŭm iĕm dang noh mơ̆n.” Đơ̆ng noh Yêsu pơma minh tơdrong pơtih gia kơ lu sư thoi âu dơ̆ng: “Bơngai măt tol ưh kơ gơh chông ba bôl sư măt tol ôh, hli kơ bre sư nơnăm gô huŏng tơ sơlŭng. Bơngai mă pơhrăm ưh kơ lah layơ pơm tih hloh kơ bơngai mă bơtho sư. Mă-lei dah sư adrin pơhrăm truh tôch na sư kư̆m dang ăi kơ bơngai mă bơtho sư mơ̆n. “Lơliơ iĕm jô̆ kơ đe đei tơdrong yoch mă iĕm đei tơdrong yoch tih hloh kơ đe dơ̆ng, dang iĕm 'bôh 'bruih iĕ đom lăm klong măt 'nhŏng oh iĕm, mă iĕm ưh kơ mơn kơ 'long tih oei đom lăm klong măt iĕm kơdih? Lơliơ iĕm pơ̆n khan kơ 'nhŏng oh iĕm khan: Lê̆ inh iŏk 'bruih đom lăm klong măt ih, lăm klong măt iĕm kơdih 'long tih oei đom ră mă-lei kơdih iĕm ưh kơ mơn? Ơ bơngai 'bơ̆r đak klak ŭnh, iĕm iŏk tŭk 'long tih đom lăm klong măt iĕm 'mơ̆i wăi, na iĕm gơh 'bôh hơdah iŏk tŭk 'bruih iĕ đom lăm klong măt 'nhŏng oh iĕm. “'Long 'lơ̆ng ưh kơ layơ pơjing plei kơnê̆. 'Long kơnê̆ ưh kơ layơ pơjing plei 'lơ̆ng. Lăng plei băt kơ tơm. Bơ̆n ưh kơ lah layơ wă năm phĕ plei hơra khan năm chă tơ tơm 'long jơla. Bơ̆n ưh kơ lah layơ wă năm phĕ plei hơmu khan năm chă tơ tơm 'long bơmrôm. Bơngai bu đei jơhngơ̆m đon 'lơ̆ng, sư kư̆m pơm 'lơ̆ng mơ̆n. Bơngai bu đei jơhngơ̆m đon kơnê̆, sư kư̆m pơm kơnê̆ mơ̆n. Lăm jơhngơ̆m đon bơ̆n thoi yơ, bơ̆n kư̆m gô pơma thoi ei. “Yua kơ kiơ iĕm krao Inh Yŏng iĕm, mă-lei iĕm kuă kơ pơm kiơ̆ kơ đon Inh bơtho? Bơngai bu năm tơ Inh wă mơ̆ng nơ̆r Inh bơtho, na sư pơm kiơ̆ dôm nơ̆r Inh pơkă, sư noh thoi lĕ kơ bơngai sir jrăng hnam jrŭ pơm hnam tơ kơpal tơmo kŭk. Na lăp đak krong tih blŭng hnam noh ră, mă-lei hnam noh oei kơjăp, na sư ưh kơ kĕ adrŏ ôh, yua kơ sư pơm kơpal tơmo kơjăp tơpă. Bơngai bu mơ̆ng nơ̆r Inh bơtho, mă-lei ưh kơ pơm kiơ̆ thoi Inh bơtho, bơngai noh thoi bơngai pơm hnam kơpal teh pŭk đĕch. Na lăp đak krong tih blŭng pŭng hơlŭng pơchah hoch đĭ.”