Luk 6
6
1Lăp năr pơdơh Sa'bat ei, Yêsu păng lu bơngai pơhrăm păng Sư drong mơ̆t tơ mir, na lu bơngai pơhrăm păng Sư broch găr 'ba kăp sa ngôi. 2Lu bơngai Pharisi 'bôh thoi noh na khan: “Kơlih kơ kiơ iĕm pơm ưh kơ trŏ lăm năr pơdơh lĕ khan jang?”
3Na Yêsu khan kơ lu sư: “Iĕm tam biơh đŏk lăng lăm hla bơar tơdrong pơtao Đawit ôh hă? Sơ̆ sư kư̆m hơdai pơm ưh kơ trŏ kơ tơdrong juăt mơ̆n, sư păng bôl sư pơngot ưh kơ đei tơmam sa. 4Na lu sư mơ̆t lăm hnam akŭm 'Bok Kei-Dei. Đawit sư ưh kơ pơm 'bok soi ră mă-lei sư gơh iŏk sa 'bĕng đe pơyơ̆r kơ 'Bok Kei-Dei mơ̆n. 'Bĕng đe pơyơ̆r kơ 'Bok Kei-Dei noh pôm lu 'bok soi đĕch gơh sa, mă-lei Đawit sư iŏk asong kơ lu bôl sư sa mơ̆n.” 5Yêsu khan dơ̆ng kơ lu bơngai Pharisi: “Inh Kon Bơngai, Inh boih yŏng pơgơ̆r kơ năr pơdơh Sa'bat.”
Yêsu pơklaih bơngai ti kue lăm năr pơdơh Sa'bat
6Minh năr pơdơh Sa'bat nai dơ̆ng Yêsu mơ̆t tơ hnam akŭm 'Bok Kei-Dei bơtho đe. Na đei minh 'nu bơngai ti kue gah 'ma oei lăm ei mơ̆n. 7Na lu thây bơtho tơdrong juăt đe Juđê păng lu bơngai Pharisi răp lăng Yêsu hăm ming pơklaih sư dah ưh kơplah lăm năr pơdơh Sa'bat. Dah sư pơklaih bơngai ti kue noh lei lu sư wă jô̆ kơ Yêsu bơngai yoch yua kơ lu sư khan lăm năr pơdơh Sa'bat ưh kơ gơh jang păng ưh kơ gơh pơklaih bơngai jĭ jăn ôh. 8Mă-lei Yêsu băt hloi kơ lu sư tơchĕng lăm to thoi noh na Sư khan kơ bơngai ti kue ei: “Năm tơ âu bĕ, dơ̆ng 'bơ̆t anăp đe tơpôl.” Na bơngai kue ei iung hloi năm dơ̆ng 'bơ̆t anăp đe tơpôl.
9Na Yêsu khan kơ lu đe ei thoi âu: “Inh wă jet iĕm, lăm năr pơdơh Sa'bat, kiơ̆ kơ tơdrong juăt bơ̆n athei pơm tơdrong 'lơ̆ng dah tơdrong kơnê̆, tơgŭm mơnat kon bơngai dah pơlôch bơngai?” 10Yêsu hue lăng đĭ-đăng kơ lu sư, khan hloi kơ bơngai ti kue ei thoi âu: “Chro ti ih bĕ.” Na bơngai kue ei chro ti sư, na klaih 'lơ̆ng hloi. 11Na lu 'bok thây păng lu bơngai Pharisi ei areh tơpă kơ Yêsu păng pơđâu chă tơdrong wă pơm kơ Yêsu.
Yêsu chă mơjĭt-'bar 'nu bơngai pơhrăm păng Sư
12Kơplah ei Yêsu tŏk tơ groi kông wă krao khan kơ 'Bok Kei-Dei. Sư krao khan tơ noh prăt măng hloi. 13Lăp 'năr boih na Yêsu krao lu bơngai pơhrăm păng Sư năm tơ Sư na Sư rơih iŏk mơjĭt-'bar 'nu. Sư anăn lu mơjĭt-'bar 'nu noh jơ̆ng 'bang Sư. 14Na âu jô̆ tôm lu anăn mơjĭt-'bar 'nu lu sư: Simôn, mă Yêsu anăn Pêtrôs; oh sư Andrê; Yakơ, Yôhan, Philip, 'Barthôlêmi, 15Mathiơ, Thôm, Yakơ kon Alphê, Simôn mă kiơ̆ khŭl đe Sêlôt sơ̆, 16Juđa kon Yakơ bơngai nai păng Juđa Ikariôt, bơngai mă plơ̆ plĕch kơ Yêsu.
Đei lơ bơngai năm tơ Yêsu
17Yêsu đơ̆ng groi kông ei jur tơ teh dơhnă hơdai hăm lu bơngai pơhrăm păng Sư. Na kư̆m đei lơ bơngai nai mă lui kiơ̆ Sư oei tơ ei mơ̆n. Kư̆m đei lơ bơngai nai năm tơ ei đơ̆ng jơ̆p kơ dêh Juđê, mơ'nah đơ̆ng Pơlei Jêrusalem, mơ'nah đơ̆ng Pơlei Tirơ păng Pơlei Siđôn mă oei kiơ̆ jih đak dơsĭ. Lu đe ei năm tơ Sư wă mơ̆ng Sư bơtho păng kư̆m wă kơ Yêsu chă pơklaih tơdrong jĭ jăn lu sư hloi. 18Lu bơngai pơmat-tat yua kơ yang kơnê̆ mơ̆t, Yêsu kư̆m pơklaih ăn mơ̆n. 19Na đĭ-đăng kơ lu đe ei mă năm tơ Yêsu wă 'maih pel Sư yua kơ mưh pel 'bơm akâu Yêsu na mă jĭ kiơ kiơ kư̆m klaih ngăl, yua đơ̆ng tơdrong mơsêh Sư.
20Klaih kơ noh Yêsu hue lăng lu bơngai lui kiơ̆ Sư na khan:
“Pŭn dêh lu iĕm bơngai dơnuh hin,
yua kơ 'Bok Kei-Dei wă pơgơ̆r iĕm.
21“Pŭn dêh lu iĕm mă pơngot rơwĕt dang ei,
iĕm gô phĭ jơnap.
Pŭn dêh lu iĕm mă nhơ̆m hmoi dang ei,
iĕm gô hiĕk, gô chơt.
22“Hiôk bĕ lu iĕm mă đe areh arĕnh, pơm kuă kơ iĕm, pơjăm pơjuă iĕm, khan iĕm bơngai kơnê̆ yua kơ iĕm lui kơ Inh Kon Bơngai. 23Mưh đe pơm thoi noh iĕm rai hiôk 'nă hal bĕ, yua kơ 'Bok Kei-Dei gô apah iĕm lơ tơpă tơ Pơlei 'Lơ̆ng ning-mônh. Kư̆m thoi noh mơ̆n lu 'bok lu sư sơ̆ pơm kơnê̆ kơ lu bơngai pơtruh nơ̆r 'Bok Kei-Dei adrol sơ̆.
24“Mă-lei lu iĕm mă mơdrŏng dang ei, ning-mônh iĕm pơmat-tat dêh.
Lu iĕm hiôk dang ei đĕch, ning-mônh iĕm ưh pă hiôk boih.
25“Lu iĕm mă phĭ jơnap dang ei,
ning-mônh iĕm kư̆m pơmat-tat mơ̆n yua kơ tơmam sa ưh kơ đei.
“Lu iĕm mă 'nă hal dang ei,
ning-mônh iĕm gô nhơ̆m hmoi pơmat-tat mơ̆n.
26“Dah đĭ-đăng bơngai khan iĕm bơngai 'lơ̆ng, lei ning-mônh iĕm kư̆m pơmat mơ̆n. Lu bơngai đe anăn bơngai pơtruh nơ̆r 'Bok Kei-Dei sơ̆, mă-lei sư chă hơlĕnh đĕch, lu 'bok iĕm sơ̆ kư̆m khan sư bơngai 'lơ̆ng mơ̆n.”
Athei 'mêm kơ bơngai pơm kơnê̆ kơ bơ̆n
27Yêsu oei bơtho lu sư thoi âu: “Na Inh pơma kơ iĕm mă mơ̆ng Inh: Iĕm athei 'mêm mơnat kơ lu bơngai mă pơm kơnê̆ kơ iĕm, pơm 'lơ̆ng kơ lu bơngai mă areh kơ iĕm. 28Pơma rơngơp kơ lu bơngai mă hiap iĕm, krao khan apinh 'Bok Kei-Dei tơgŭm lu bơngai hil kơ iĕm. 29Tơ̆ng đe tap 'bŏ iĕm gah 'ma, iĕm athei ăn hloi gah 'ngiĕo. Tơ̆ng đe iŏk ao iĕm minh blah, iĕm athei ăn hloi 'bar blah. 30Bu apinh tơmam kiơ đơ̆ng iĕm, iĕm athei asong hloi. Tơ̆ng đe iŏk tơmam iĕm, iĕm 'nĕ pă pơdrĕo. 31Bơ̆n wă kơ đe pơm 'lơ̆ng kơ bơ̆n dang yơ, bơ̆n athei pơm 'lơ̆ng kơ đe dang ei mơ̆n.
32“Dah iĕm 'mêm pôm lu bơngai mă 'mêm kơ iĕm đĕch, lei 'Bok Kei-Dei ưh kơ lăp đon ôh. Bĭ lu bơngai yoch kư̆m băt băi 'mêm kơ bơngai mă 'mêm kơ sư mơ̆n. 33Dah iĕm pơm 'lơ̆ng kơ lu bơngai mă pơm 'lơ̆ng kơ iĕm đĕch, lei 'Bok Kei-Dei ưh kơ lăp đon ôh. Bĭ lu bơngai yoch kư̆m băt băi pơm 'lơ̆ng kơ lu bơngai mă pơm 'lơ̆ng kơ sư mơ̆n. 34Gah tơdrong ăn kơ đe mơng jên iĕm, dah iĕm ăn kơ pôm lu bơngai mă iĕm băt sư gô pơdrĕo kơ iĕm tơpă đĕch, lei 'Bok Kei-Dei ưh kơ lăp đon ôh. Lu bơngai yoch, dah sư băt kơ tơduă lu sư bơngai yoch gô pơdrĕo tơpă, lei sư kư̆m ăn kơ lu bôl sư mơng jên sư mơ̆n. 35Thoi noh na iĕm athei 'mêm, pơm 'lơ̆ng kơ lu bơngai mă pơm kơnê̆ kơ iĕm. Iĕm athei ăn kơ đe mơng jên iĕm păng 'nĕ pă hơmĕng kơ jên noh. Tơ̆ng iĕm pơm thoi noh, 'Bok Kei-Dei gô apah iĕm tih tơpă păng iĕm jing kon Kră Yang Tih Hloh, yua kơ Sư kư̆m pơm 'lơ̆ng kơ lu bơngai kơnê̆ păng lu bơngai mă ưh kơ băt bơnê kơ Sư mơ̆n. 36Iĕm athei 'mêm mơnat kơ đe kư̆m thoi lĕ 'Bă bơ̆n 'Bok Kei-Dei 'mêm mơnat kơ đe mơ̆n.
37“Iĕm 'nĕ bâu roi đe, khan đe bơngai ưh kơ 'lơ̆ng. Dah iĕm jô̆ kơ đe bơngai ưh kơ 'lơ̆ng, kơnh 'Bok Kei-Dei kư̆m jô̆ kơ iĕm bơngai ưh kơ 'lơ̆ng mơ̆n. Iĕm 'nĕ kơ jâu đe, na 'Bok Kei-Dei huay kơ jâu iĕm. Iĕm 'nĕ kơ jô̆ yo kơ đe wă kơ 'Bok Kei-Dei huay kơ jô̆ yo kơ iĕm. 38Iĕm athei mơnat, tơgŭm đe, na 'Bok Kei-Dei kư̆m mơnat tơgŭm iĕm mơ̆n. Sư gô tơgŭm iĕm lơ tơpă kư̆m dang lĕ đe ăn đĕch kơ iĕm minh kơ'mŭng 'ba 'bĕnh blai rơkah rơkai. Iĕm tơgŭm đe dang yơ, 'Bok Kei-Dei gô tơgŭm iĕm dang noh mơ̆n.”
39Đơ̆ng noh Yêsu pơma minh tơdrong pơtih gia kơ lu sư thoi âu dơ̆ng: “Bơngai măt tol ưh kơ gơh chông ba bôl sư măt tol ôh, hli kơ bre sư nơnăm gô huŏng tơ sơlŭng. 40Bơngai mă pơhrăm ưh kơ lah layơ pơm tih hloh kơ bơngai mă bơtho sư. Mă-lei dah sư adrin pơhrăm truh tôch na sư kư̆m dang ăi kơ bơngai mă bơtho sư mơ̆n.
41“Lơliơ iĕm jô̆ kơ đe đei tơdrong yoch mă iĕm đei tơdrong yoch tih hloh kơ đe dơ̆ng, dang iĕm 'bôh 'bruih iĕ đom lăm klong măt 'nhŏng oh iĕm, mă iĕm ưh kơ mơn kơ 'long tih oei đom lăm klong măt iĕm kơdih? 42Lơliơ iĕm pơ̆n khan kơ 'nhŏng oh iĕm khan: Lê̆ inh iŏk 'bruih đom lăm klong măt ih, lăm klong măt iĕm kơdih 'long tih oei đom ră mă-lei kơdih iĕm ưh kơ mơn? Ơ bơngai 'bơ̆r đak klak ŭnh, iĕm iŏk tŭk 'long tih đom lăm klong măt iĕm 'mơ̆i wăi, na iĕm gơh 'bôh hơdah iŏk tŭk 'bruih iĕ đom lăm klong măt 'nhŏng oh iĕm.
Bơ̆n băt bơngai 'lơ̆ng kơnê̆ thoi yơ?
43“'Long 'lơ̆ng ưh kơ layơ pơjing plei kơnê̆. 'Long kơnê̆ ưh kơ layơ pơjing plei 'lơ̆ng. 44Lăng plei băt kơ tơm. Bơ̆n ưh kơ lah layơ wă năm phĕ plei hơra khan năm chă tơ tơm 'long jơla. Bơ̆n ưh kơ lah layơ wă năm phĕ plei hơmu khan năm chă tơ tơm 'long bơmrôm. 45Bơngai bu đei jơhngơ̆m đon 'lơ̆ng, sư kư̆m pơm 'lơ̆ng mơ̆n. Bơngai bu đei jơhngơ̆m đon kơnê̆, sư kư̆m pơm kơnê̆ mơ̆n. Lăm jơhngơ̆m đon bơ̆n thoi yơ, bơ̆n kư̆m gô pơma thoi ei.
'Bar 'nu bơngai pơm hnam
46“Yua kơ kiơ iĕm krao Inh Yŏng iĕm, mă-lei iĕm kuă kơ pơm kiơ̆ kơ đon Inh bơtho? 47Bơngai bu năm tơ Inh wă mơ̆ng nơ̆r Inh bơtho, na sư pơm kiơ̆ dôm nơ̆r Inh pơkă, 48sư noh thoi lĕ kơ bơngai sir jrăng hnam jrŭ pơm hnam tơ kơpal tơmo kŭk. Na lăp đak krong tih blŭng hnam noh ră, mă-lei hnam noh oei kơjăp, na sư ưh kơ kĕ adrŏ ôh, yua kơ sư pơm kơpal tơmo kơjăp tơpă. 49Bơngai bu mơ̆ng nơ̆r Inh bơtho, mă-lei ưh kơ pơm kiơ̆ thoi Inh bơtho, bơngai noh thoi bơngai pơm hnam kơpal teh pŭk đĕch. Na lăp đak krong tih blŭng pŭng hơlŭng pơchah hoch đĭ.”
Yêsu pơklaih jĭ đĭch 'bok tih linh
Currently Selected:
Luk 6: bdq
Highlight
Share
Copy
Want to have your highlights saved across all your devices? Sign up or sign in
©Bahnar Bible Association. All rights reserved.