Romanos 13
13
1Nu'pʉjʉn jayajwat ma jayaumayga autoridajat mit jeme más manda̱tcapay, ni'c nu'pʉjʉn jeme manda̱tcapay, Dios iyajcʉs̈p ma manda̱tca. Mit Dios iyajcʉs̈p jeme jinap manda̱tcapay. 2Jemni'c jeme igajayaumaypay autoridajat, igajayaumaypey lo que Dios imanda̱tway. Mit jeme cajayaumaygapay tsʉ̱ngáj castiga̱tic. 3Te nawatcap oy, nagapʉ̱tcáj autoridajat. Je'jat solo iguipʉ̱tcap jeme iwatcapay mal. Te nagawangap nas̈pʉ̱tcawa'n jeme manda̱tcapay, nawátca oy mit je'jat nas̈-oyninʉmgáj. 4Ni'c tu'c manda̱tpay Dios iguiyac pa natsʉ̱nga oy. Po te nawatcap mal, oy napʉ̱tca, ni'c je' ijtʉp derechu pa iguicastiga̱tcʉs̈wa'n maljayajwat. Mit je' Dios iguiyac pa igui-actunas̈wa'n jeme iwatpay mal. 5Jemni'c itp ti najayaumaygawa'n pa nagatsʉ̱nga castiga̱tic, mit we'ney pa najawiga ni'c nayo'ygap oy. 6Jemni'guey oy natsó̱jca tumi̱n-impuestu ni'c autoridajat imuyos̈watcap Dios, mit icumplia̱tcap idebejrat.
7Oy natsó̱jca nu'pʉjʉn napʉ́jquijatway. Tsó̱jca jeme que'chumgapay pa gobernador, mit intso̱jcapey jeme ipʉctsougapay impuestujat. Respetá̱tca jeme imerecia̱tpay respetu. Oyninʉmga jeme merecia̱tpay is̈-oyninʉmgawa'n. 8Camtángaja pʉjqui nepʉn. Solo mipʉ́jquijat ni'c itp ti inyiwangʉjʉwa'n minu'pʉjʉjnat. Ni'c jeme iwampay imupro̱wije̱way, je' icumplia̱tnup lo que inʉmpay ley. 9Ni'c Dios inʉm yename: “Migachajyo'yáj, miga-ago'gáj, miganu'máj, ingawe̱twajtáj nepʉn, ingawa'náj jayje'.” Ayʉ̱́j mandamientu mit nu'pʉjʉn mandamientujat tsʉ̱nap nʉmic en tu'c solo mandamientu: “Inwa'náj inmupro̱wije̱way as̈am mi̱ inyiwajnʉ.” 10Jeme iwampay imupro̱wije̱way igawajtáj mal. Jemni'c ayé jayau iwampay imupro̱wije̱way, icumplia̱tnup lo que inʉmpay ley.
11Cuandu primeru nacupʉ́jcaj, najawigau ni'c Cristu mi'nájatu pa nas̈libra̱tcáj. Mit jinap tomo'ganu ayé tiempu pa nas̈libra̱tcáj. Jemni'c natsʉ̱nga prepara̱tic, caje' as̈am jeme ma̱gapay. 12Tomo'ganu pa icojawa'n ayé s̈ʉjw itumi'námpay Cristu. Jemni'c ʉjtsat nacuyáguiga nu'pʉjʉn mal nawatcaway ámbanu. Mit jinap nayo'ygáj Dios iluzni'c pa natsʉ̱ngawa'n oy. 13Nayo'yga limpiu as̈am jeme yo'ygapay s̈ʉ̱m. Nagawatcadá̱jca tigapa'tu mit naga-u̱ctacyo'yga. Nagachajyo'yga mit naga-aguepca nejʉmay viciu. Nagatsuguinwátca mit nagani-ángʉjʉ. 14Po más oy namuyo'yga el Señor Jesucristu, mit nagache'nga ayé mal iyo'tpay najo̱jtat.
Currently Selected:
Romanos 13: PSNT
Highlight
Share
Compare
Copy
Want to have your highlights saved across all your devices? Sign up or sign in
Nuevo Testamento en Popoluca de Sayula © Sociedad Bíblica de México, [1969].
